Bafilipi 4 - BAEBELE e e Boitshepo

Ditaelo

¹ Ke gone bagaetsho ba ba rategang, le ba ba tlhologeletsweng boitumelo jwa me, le serwalo sa me, ka re, baratwa ba me, emang ka tlhomamo jalo mo Moreneng.

² Ke laya Euodia, ke laya Senthuke, gore ba nne pelo nngwe fela mo Moreneng.

³ Ee, le wena ke a go rapela, mmelegajokwe ka nna wa mmaanete, ka re, thusa basadi bao, gonne ba kile ba dira le nna mo Mafokong a a Molemo, le ene Kelemente, le ba bangwe badiri ka nna, ba maina a bone a mo lokwalong lwa botshelo.

⁴ Itumeleng mo Moreneng ka metlha yotlhe; ke tlaa ba ke re: Itumeleng.

⁵ A boiphapaanyo jwa lona bo itsiwe mo bathong botlhe. Morena o gaufi.

⁶ Lo se ka lwa tlhobaediwa ke sepe; mme mo dilong tsotlhe a ditopo tsa lona di itsisiwe Modimo ka thapelo le kokotlelo, di na le tebogo.

⁷ Kagiso ya Modimo e e fetang tlhaloganyo yotlhe, e tlaa dibela dipelo tsa lona le megopolo ya lona mo go Keresete Jesu.

⁸ Sa bofelo, bagaetsho, dilo tsotlhe tsa boammaaruri, dilo tsotlhe tse di tshwanetseng go tlotlwa, dilo tsotlhe tse di itshekileng, dilo tsotlhe tse di rategang, dilo tsotlhe tse di bolelwang ka molemo; fa go na le molemo mongwe, fa go na le pako, lo gopole dilo tse.

⁹ Dilo tse lo di ithutileng, lwa ba lwa di amogela, lwa ba lwa di utlwa, lwa ba lwa di bona mo go nna, dilo tseo, lo di dire; mme Modimo wa kagiso o tlaa nna le lona.

Go lebogela dimpho tsa Bafilipi

¹⁰ Ke itumela thata mo Moreneng, ka jaana lo bile lo tsosolositse mogopolo wa lona ka ga me; le gale lo kile lwa nna lwa nkgopola, mme lwa tlhoka lobaka.

¹¹ Ga se go re ke bua ka ga go tlhoka; gonne ke ithutile gore, le fa ke ka nna mo popegong e e ntseng jang, ke be ke itumele fela mo go yone.

¹² Go kokobediwa ke a go itse, le go huma ke a go itse; mo go sengwe le sengwe, le mo dilong tsotlhe ke ithutile bokwateng jwa go kgora le go bolawa ke tlala, go atlanegelwa le go tlhoka.

¹³ Nka dira dilo tsotlhe ka ene yo o nnonotshang.

¹⁴ Le fa go ntse jalo lo dirile sentle, ka lo ikopantse le nna mo pitlaganong ya me.

¹⁵ Le lona ka losi lo a itse, lona Bafilipi, fa e rile mo tshimologong ya Mafoko a a Molemo, jale ka ke tloga mo Maketonia, go se ka ga dira le epe phuthego e e ikopantseng le nna mo tirong ya go aba le go amogela, fa e se lona fela;

¹⁶ gonne le mo Thesalonika lo kile lwa nna lwa roma gangwe le gape go nthusa mo go tlhokeng ga me.

¹⁷ Ga se go re ke batla mpho; mme ke batla loungo lo lo tlaa totafalelang lona.

¹⁸ Ke na le dilo tsotlhe, ke bile ke atlanegetswe, ke kgotshe, ka ke amogetse mo go Epaferodito dilo tse di tswang koo go lona, e le lonko lo lo nkgang monate, e le setlhabelo se se lebosegang, se se kgatlhang Modimo.

¹⁹ Modimo wa me o tlaa lo naya sengwe le sengwe se lo se tlhokang, ka fa lohumong lwa one mo kgalalelong mo go Keresete Jesu.

²⁰ Jaana, a kgalalelo e nne go Modimo le Rra wa rona ka bosenabokhutlo le ka bosaengkae. Amen.

Ditumediso tsa bofelo

²¹ Dumedisang moitshepi mongwe le mongwe mo go Keresete Jesu. Bakaulengwe ba ke nang nabo ba a lo dumedisa.

²² Baitshepi botlhe ba a lo dumedisa, segolo bone ba e leng ba ntlo ya ga Kaesare.

²³ A tshegofatso ya Morena Jesu Keresete e nne le mewa ya lona.