Bafilipi 3 - BAEBELE e e Boitshepo

Tshiamo ya nnete

¹ Sa bofelo, bagaetsho, itumeleng mo Moreneng. Go nna ke lo kwalela dilo di le dingwe fela, le gale ga go ntapise, ka ga lona ke go lo direla tlhomano.

² Lo itise mo dintšeng, lo itise mo badiring ba bosula, lo itise mo go ba ba rupisang.

³ Gonne bogwera ke rona ba re obamang ka Mowa wa Modimo, re ipelafatsa ka Keresete Jesu, re bile re se na boikanyo bope mo nameng.

⁴ Le fa go ntse jalo, nna ka nosi, ke ne ke ka nna le go ikanya le mo go yone nama; fa motho mongwe o sele a gopotse go ikanya mo nameng, nna bogolo,

⁵ ka ke rupisitswe ka letsatsi la bo 8; ke wa sešaba sa Iseraele; ke wa losika lwa ga Benjamine, ke Mohebere wa Bahebere; ka fa molaong ke Mofarisai;

⁶ ka ga tlhoafalo, ke ne ke bogisa phuthego; ka ga tshiamo e e leng ya molao, ka fitlhelwa ke se na molato.

⁷ Le fa go ntse jalo dilo tse di neng di le thuso mo go nna, ke tsone tse ke di kaileng fa di ntatlhegetse ka ntlha ya ga Keresete.

⁸ Ee, ruri, ke kaya dilo tsotlhe di ntatlhegetse ka ntlha ya molemo o mogolo wa go itse Keresete Jesu Morena wa me; yo ke latlhegetsweng ke dilo tsotlhe ka ntlha ya gagwe, mme ke di kaya malele fela, gore ke tle ke bone Keresete.

⁹ Le gore ke fitlhelwe ke le mo go ene, ke se na tshiamo e e leng ya me, e bong yone e e leng ya molao, fa e se yone e e ntseng ka tumelo mo go Keresete, e bong tshiamo e e tswang mo Modimong ka tumelo;

¹⁰ gore ke itse ene, le thata ya go tsoga ga gagwe, le go tlhakanela nae dipogiso tsa gagwe, ke bopegela mo tshwanong ya loso lwa gagwe;

¹¹ e tle e re kgotsa ka mokgwa mongwe ke ye go fitlha mo go tsogeng ga baswi.

Go lekela pele kwa phenyong

¹² Ga se go re ke setse ke fitlhile, le fa e le gore ke setse ke itekanetse; mme ke lekela kwa pele, e tle e re kgotsa ke tshware se e leng sone le nna ke se tshwaretsweng ke Keresete Jesu.

¹³ Bagaetsho ga ke ikaye gore ke setse ke tshwere; mme selo sengwe ke a se dira, ka re, ke tlhokomologa dilo tse di kwa morago, ke gagamalela kwa dilong tse di kwa pele.

¹⁴ Ke lekela ka thata kwa sekaong, ke ya go tsaya sekgele sa piletsogodimo ya Modimo mo go Keresete Jesu.

¹⁵ Ke gone, botlhe ba ba itekanetseng mo go rona, a re nneng maikutlo a a ntseng jalo; mme fa lo le maikutlo a sele mo selong sengwe, le sone Modimo o tlaa se lo senolela;

¹⁶ fela kwa re setseng re fitlhile teng, a re ke re nneng re sepele ka fa sekaong seo fela.

¹⁷ Bagaetsho, lo nne baetsi ba me mmogo, lo ele tlhoko ba ba sepelang jalo, fela jaaka lo na le rona re le sekao.

¹⁸ Gonne batho bantsi ba sepela e le baba ba mokgoro wa ga Keresete, e le ba ke ba lo boleletseng gantsi, mme gompieno ke lo bolelela fela ka go lela;

¹⁹ ke ba bokhutlo jwa bone e leng tatlhego, ke ba modimo wa bone e leng mpa fela, le ba boipelafatso jwa bone e leng ditiro tsa bone, ke ba ba tlhokometseng dilo tsa selefatshe.

²⁰ Gonne motse wa rona o kwa legodimong; kwa le gone re lebeletseng Mmoloki go tswa teng, e bong Morena Jesu Keresete;

²¹ yo o tlaa bopang seša mmele wa boikokobetso jwa rona, gore o bopege jaaka mmele wa kgalalelo ya gagwe, ka fa go direng mo o nonofileng go ipeela dilo tsotlhe mo taolong ya gagwe ka teng.