Amose 3 - BAEBELE e e Boitshepo

¹ Utlwang lefoko le Jehofa o lo nyaditseng ka lone, lona bana ba Iseraele; ke nyatsa losika lotlhe lo ke lo ntshitseng mo lefatsheng la Egepeto, ka re:

² “Ke itsile lona fela lo le losi mo ditshikeng tsotlhe tsa lefatshe; ke gone ka moo ke tlaa lo kgopololela maikepo otlhe a lona.”

Tiro ya Moperofeti

³ A batho ba le babedi ba ka tsamaya mmogo, fa ba se ka ba dumalana?

⁴ A tau e tle e dume mo sekgweng fa e se na sepe se e se bolayang? A ledumedi le tle le dumadume le le mo mongobong wa lone fa le sa bolaya sepe?

⁵ A nonyane e ka wela fa fatshe mo serung, fa seru se sa raelwang gone? A mutlwane o ka tsipoga fela mo mmung, o sa tshwara sepesepe?

⁶ A lonaka lo ka lediwa mo motseng, batho ba se ke ba boife? A bosula bo tlaa wela motse, Jehofa a sa bo dira?

⁷ Ruri Morena Modimo o tlaa bo a sa dire sepe, fa e se ka go senolela batlhanka ba gagwe baperofeti leoma la gagwe.

⁸ Tau e dumile, e be e le mang yo o se ketlang a boifa? Morena Modimo o buile, e be e le mang yo o ka nnang fela a sa perofese?

Phelelo ya Iseraele

⁹ Utlwatsang mo matlong a dikgosi kwa Ašetota, le mo matlong a dikgosi mo lefatsheng la Egepeto; lo re: “Phuthegelang mo dithabeng tsa Samaria, lo bone dipheretlho tse dikgolo tsa teng, le dipatiko tse di mo gare ga teng.”

¹⁰ “Gonne ga ba itse go dira tshiamo,” go bua Jehofa: “e bong ba ba bolokang tsa thubakanyo le bogodu mo matlong a bone a dikgosi.”

¹¹ Ke gone ka moo Morena Modimo o bua jaana, a re: “Go tlaa nna moganetsi, e bong mo tikologong ya lefatshe; mme o tlaa folosa thata ya gago mo go wena, matlo a gago a dikgosi a tlaa thopiwa.”

¹² Jehofa o bua jaana, a re: “Jaaka modisa a tla a swabole dirope di le pedi kgotsa ntlhanngwe ya tsebe mo ganong la tau; bana ba Iseraele ba tlaa swabolwa jalo; e bong ba ba dutseng mo Samaria mo boikaegelong jwa sekanamelo, le mo mesamong ya sei ya bolao.

¹³ Utlwang, mme lo supe lo nyatse ba ntlo ya ga Jakobe;” go bua Morena Modimo, Modimo wa masomosomo.

¹⁴ “Gonne e tlaa re mo motlheng o ke kgophololelang Iseraele ditlolo tsa gagwe ka one, le gone ke tlaa kgopholola dibeso tsa Bethele, mme dinaka tsa sebeso di tlaa kgaolwa, di wela fa fatshe.

¹⁵ Ke tlaa itaya ntlo ya mariga le ntlo ya selemo mmogo; le matlo a dinaka tsa ditlou a tlaa nyelela, le matlo a magolo a tlaa nna le bokhutlo.” Go bua Jehofa.