3 Yohane 1 - BAEBELE e e Boitshepo

Tumediso

¹ Ke nna mogolwane; ke kwalela Gaio moratwa, yo ke mo ratang ruri.

² Moratwa, ke rapela gore mo dilong tsotlhe o tle o tlhogonolofale, o robale sentle, fela jaaka mowa wa gago o a bo o ntse o tlhogonolofetse.

³ Gonne nkile ka itumela thata jale ka bakaulengwe bangwe ba tla, ba supa ka ga boammaaruri jwa gago, fela jaaka o ntse o tsamaya mo boammaaruring.

⁴ Ga ke na boitumelo bope jo bo fetang jo, jwa go utlwa fa bana ba me ba ntse ba tsamaya mo boammaaruring.

Gaio o a bokiwa

⁵ Moratwa, o dira tiro ya boikanngo mo go sengwe le sengwe se o se direlang ba e leng bakaulengwe, e bile e le baeng;

⁶ ba ba supileng ka ga lorato lwa gago fa pele ga phuthego; ba e tlaa reng o ba tsamaisetsa pele mo loetong lwa bone, ka mokgwa o o tshwanetseng Modimo, o tlaa bo o dira sentle;

⁷ ka ba bolotse ka ntlha ya Leina fela, ba sa amogele sepe mo go Baditšhaba.

⁸ Ke gone, re tshwanetse go gorosa ka pula ba ba ntseng jalo, gore re tle re nne badiri mmogo le boammaaruri.

Dioterefese le Demeterio

⁹ Nkile ka kwalela phuthego lefoko lengwe; mme Dioterefese, yo o eletsang ya bo e le ene tlhogo mo go bone, ga a re tshole.

¹⁰ Ke gone, fa ke ka ya koo, ke tlaa gakologelwa ditiro tsa gagwe tse o di dirang, ka a ntse a re balabalela ka mafoko a a bosula; mme le mo, go bo go sa lekane; go le ene ga a tshole bakaulengwe, le ba ba eletsang go dira jalo o a ba itsa, a ba leleke mo phuthegong.

¹¹ Moratwa, o se ka wa etsa se se bosula, fa e se se se molemo fela. Yo o dirang molemo ke wa Modimo; yo o dirang bosula ga a ise a bone Modimo.

¹² Demeterio o na le tshupo ya batho botlhe, le ya jone boammaaruri ka josi. Ee, le rona re a supa; mme o a itse fa tshupo ya rona e le boammaaruri.

Ditumediso tsa bofelo

¹³ Ke ne ke na le dilo di le dintsi go di go kwalela, mme ga ke rate go di go kwalela ka enke le pene.

¹⁴ Ke solofetse gore ke tlaa akofa ke go bona, mme re tlaa bua re lebanye. Kagiso e nne nao. Ditsala di a go dumedisa. O tle o dumedise ditsala ka maina.