2 Samuele 1 - BAEBELE e e Boitshepo

Dafite o utlwalela loso lwa ga Saule

¹ Ga dirala e rile morago ga loso lwa ga Saule, Dafite a sena go hulara kwa go bolayeng Baamaleke, Dafite a bo a bile a tlhotse malatsi a le mabedi mo Sikelage;

² ga dirala, ya re ka letsatsi la boraro, ga tla motho a tswa kwa bothibelelong jwa ga Saule, diaparo tsa gagwe di gagogile, le mmu o le mo tlhogong ya gagwe; ga nna jaana, ya re a fitlha kwa go Dafite a wela fa fatshe, a ikoba.

³ Dafite a mo raya a re: “O tswa kae?” Mme a mo raya a re: “Ke falotse kwa bothibelelong jwa Baiseraele.”

⁴ Dafite a mo raya a re: “Go ile ga nna jang? Ke a go rapela, a ko o mpolelele.” A mo fetola a re: “Batho ba tshabile mo ntweng, le gone batho ba le bantsi ba ole ba sule; boSaule le Jonathane morwawe le bone ba sule.”

⁵ Dafite a raya motho wa lekau yo o mmolelelang a re: “O itse jang fa Saule le Jonathane morwawe ba sule?”

⁶ Motho wa lekau yo o mmolelelang a re: “Ka tshogana ka ke le mo thabeng ya Gileboa, ka fitlhela Saule a itlhabeditse ka lerumo la gagwe; mme bona, ka fitlhela dikara le bapalama dipitse ba mo konateletse ka thata.

⁷ O rile a gadima a mpona a mpitsa. Ka araba ka re: ‘Ke fano.’

⁸ A nthaya a re: ‘O mang?’ Ka mo raya ka re: ‘Ke Moamaleke.’

⁹ A nthaya a re: ‘Ke a go rapela, a ko o eme fa go nna o mpolaye, gonne ke tshwerwe ke sedidi ka go bo botshelo jwa me bo sa le mmogo mo go nna.’

¹⁰ Ka ema fa go ene, ka mmolaya, ka ke ne ke itse sentle fa a sa ka ke a tshela a sena go wa; ka tsaya serwalo se se mo tlhogong ya gagwe, le mofitshana mo letsogong la gagwe, ke di lerile kwano go morena wa me.”

¹¹ Foo Dafite a itshwara diaparo, a di gagola, le banna botlhe ba o nang nabo ba dira jalo.

¹² Ba hutsafala, ba lela, ba ba ba ikitsa go ja go ya maitseboeng, ka ga Saule le ka ga Jonathane, le ka ga batho ba ga Jehofa, le ka ga ntlo ya Iseraele; ka ba ole ka tšhaka.

¹³ Dafite a raya motho wa lekau yo o mmoleletseng a re: “O mokae?” A mo fetola a re: “Ke morwa moeng, ke Moamaleke.”

¹⁴ Dafite a mo raya a re: “Go ntse jang ka o se ka wa boifa go ntsha letsogo la gago wa bolaya motlodiwa wa ga Jehofa?”

¹⁵ Dafite a bitsa lekau lengwe a re: “Mo atamele o mo wele.” Mme a mo itaya a swa.

¹⁶ Dafita a mo raya a re: “A madi a gago a nne mo tlhogong ya gago; gonne molomo wa gago o supile ka ga gago, ka o re, O bolaile motlodiwa wa ga Jehofa.”

Dafite o lelela Saule le Jonathane

¹⁷ Dafite a hutsafalela Saule le Jonathane morwawe ka khutsafalo e.

¹⁸ A raya batho a re ba rute bana ba Juta sefela sa bora; bonang se kwadilwe mo lokwalong lwa ga Jašare.

¹⁹ A re: “Iseraele we, a bo kgalalelo ya gago e bolaetswe mo mafelong a gago a a godimo! Ana diganka di ole jang!

²⁰ Lo se ka lwa go bolela mo Gathe, lo se ka lwa go utlwatsa mo mebileng ya Ašekelone; bomorwadia Bafilisitia ba ka tla ba itumela, bomorwadia bone ba ba sa rupang ba ka tla ba ja koma.

²¹ Lona dithaba tsa Gileboa, a go se ne monyo, le fa e le pula mo go lona, le fa e le maota a ditshupelo; gonne ke gone kwa thebe ya seganka e latlhetsweng gone ka bobe, thebe ya ga Saule, jaaka ekete ke ya yo o sa tlodiwang ka lookwane.

²² Mo mading a ba ba bolailweng, le mo mahureng a diganka, bora jwa ga Jonathane ga bo a ka jwa bowa fela, le tšhaka ya ga Saule ga e a ka ya bowa e iphotlhere fela.

²³ Saule le Jonathane ba ne ba le bantle, ba le natefo mo matshelong a bone, le mo losong lwa bone ba ne ba sa kgaogana; ba ne ba le bofefo bogolo go bontswi ba batona, ba le thata bogolo go ditau.

²⁴ Lona bomorwadia Iseraele, lelelang Saule yo o ne a lo apesa bohibidu jo bo letlhololo mo go kgatlhang, a baya mekgabo ya gouta mo diaparong tsa lona.

²⁵ Ana diganka di ole jang mo gare ga tlhabano. Jonathane o bolaetswe mo mafelong a gago a a godimo.

²⁶ Ke mo tlalelong ka ga gago Jonathane, mogolole; mo go nna, o ntse o le natefo thata; lorato lwa gago mo go nna lo ne lo gakgamatsa lo feta lorato lwa basadi.

²⁷ Ana diganka di ole jang, le dibolao tsa ntwa di nyeletse jang!”