1 Petero 2 - BAEBELE e e Boitshepo

Lentswe le le tshedileng le morafe o o itshepileng

¹ Ke gone, latlhang boikepo jotlhe, le boferefere jotlhe, le maitimokanyo, le mapelotshetlha, le dipuo tsotlhe tse di maswe.

² Fela jaaka banyana ba e leng gone ba tsalwang, lo tlhologelelwe maši a semowa a a se nang boferefere, gore lo tle lo golele polokong ka one.

³ Ke raya fa e rile lo mo lekeletsa lwa fitlhela Morena a le pelotshweu.

⁴ Yo e reng lo tla mo go ene, e le lentswe le le tshedileng, le gale e le le le gannweng ke batho, mme mo Modimong e be e le le le itshenketsweng, le le tlhokegang.

⁵ Ka re, le lona, jaaka maje a a tshedileng, go agiwa ntlo ya semowa ka lona, go tla lo nna boperisiti jo bo itshepileng jwa go isa ditlhabelo tsa semowa, tse di lebosegang mo Modimong ka Jesu Keresete.

⁶ Gonne go mo Lokwalong, ga twe: “Bonang ke baya mo Sione lentswe le legolo la kgokgotsho, le le itshenketsweng, le le le tlhokegang: yo o dumelang mo go ene ga a ketla a tlhabisiwa ditlhong.”

⁷ Ke gone botlhokego bo kwa go lona ba lo dumetseng; mme kwa go ba ba sa dumelang: “Lentswe le baagi ba le ganneng, ke lone le dirilweng la tlhogo ya kgokgotsho.”

⁸ Gape: “Lentswe la kgokgweetso, le lefika la kgopiso,” gonne ba kgweetsega mo lefokong, ka e le ba sa utlweng; e le mo ba bileng ba go laoletswe.

⁹ Mme lona lo losika lo lo itshenketsweng, lo boperesiti jwa segosi, morafe o o boitshepo, lo tšhaba e e ruilweng ke Modimo ka sebele, gore lo tle lo bonatse go tlotlomala ga yo o lo biditseng, a lo bitsa lo le mo lefifing, a lo isa leseding la gagwe le le gakgamatsang;

¹⁰ e bong lona ba e rileng mo metlheng e e fetileng lwa bo lo se tšhaba epe, gompieno lo tšhaba ya Modimo; lwa bo lo ne lo ise lo bone boutlwelobotlhoko, mme gompieno lo bonye boutlwelobotlhoko.

Go tshela jaaka batlhanka ba Modimo

¹¹ Bagaetsho, ke a lo rapela jaaka bajaki ba baeti, ka re, lo ithibe mo dithatong tsa senama tse di tlhabanang le mowa wa motho;

¹² lo bo lo tshele ka mokgwa o montle mo go Baditšhaba; e tle e re mo ba lo bolelang jaaka badira bosula ka teng, bo ba galaletse Modimo mo motlheng wa tekolo, ka ditiro tsa lona tse di molemo, tse ba di bonang.

¹³ Lo ineele mo taolelong nngwe le nngwe ya motho ka ntlha ya Morena: le fa e le mo kgosing ka e le tlhogo;

¹⁴ le fa e le mo balaodisiweng, ka ba romilwe ke yone go tla ba lefetsa badira bosula, le go baka ba ba dirang sentle.

¹⁵ Gonne go rata ga Modimo go ntse jalo, gore lo tle lo didimatse botlhoka go itse jwa ba ba dieleele ka go dira sentle ga lona.

¹⁶ Lo nne jaaka ba ba gololesegileng, kgololesego ya lona lo se e ntshe kobo ya go bipa boikepo, lo nne jaaka batlhanka ba Modimo.

¹⁷ Tlotlang batho botlhe. Ratang bokaulengwe. Boifang Modimo. Tlotlang kgosi.

Go tsaya malebela mo go bogeng ga Keresete

¹⁸ Lona batlhanka lo nne kutlo mo go beng ba lona ka poifo yotlhe; e seng mo go ba ba molemo, le ba ba bonolo fela, e leng le mo go ba ba logala fela.

¹⁹ Gonne mo, go a lebosega, fa e ka re ka ntlha ya go gopola Modimo, motho a ba a itshokela mahutsana, a utlwa botlhoko a se na molato.

²⁰ Gonne pelafalo lo bo lo na le efe, fa e ka re lo leofa, lo itewa ka ntlha ya gone, lwa go itshokela ka bopelotelele? Mme fa e tlaa re lo dira sentle, lo utlwisiwa botlhoko ka ntlha ya gone, lwa go itshokela ka bopelotelele, mo go bo go lebosega mo Modimong.

²¹ Gonne lo bileditswe gone moo; gonne Keresete le ene o bogile botlhoko mo boemong jwa lona, a lo tlogelela sekao, gore lo tsamaye mo dikgatong tsa gagwe:

²² “Yo o se kang a dira boleo bope, le boferefere bo se kang jwa fitlhelwa mo molomong wa gagwe.”

²³ Yo e rileng a kgojwa, a se ka a ba a kgoba; yo e rileng a boga botlhoko, a se ka a bopa; mme a ineela fela mo go yo o atlholang ka tshiamo;

²⁴ yo e leng ene ka esi o belegeng dibe tsa rona mo mmeleng wa gagwe a le mo setlhareng, gore rona, ka re sule ka ga dibe, re tle re tshelele tshiamo; yo e leng ene yo lo fodisiwang ka dingalo tsa gagwe.

²⁵ Gonne lo ne lo timela jaaka dinku; gompieno lo boetse mo go Modisa le Mookami wa mewa ya lona.