1 Bakorinta 16 - BAEBELE e e Boitshepo

Go ntshetsa baitshepi

¹ Jaana, ka ga madi a a phuthelwang baitshepi, jaaka ke laotse diphuthego tsa Galatia, le lona lo dire jalo.

² E re ka letsatsi la ntlha la beke, a mongwe le mongwe wa lona a beele sengwe fa thoko, ka fa o bonyeng go bapala ka teng, gore e tle e re ke tla, go bo go sa tlhole go na le go phutha.

³ E tlaa re ke fitlha, ba lo tlaa ba kayang ka dikwalo gore ba tshwanetse, ke bone ba ke tlaa ba romang, ba isa dikatso tsa lona kwa Jerusalema.

⁴ Fa e le tshwanelo gore le nna ke tsamaye, ba tlaa tsamaya le nna.

Dithulaganyo tsa ga Paulo

⁵ Ke tlaa tla koo go lona ke sena go ralala Maketonia; gonne ke tlaa bo ke ralala Maketonia;

⁶ e tlaa re kgotsa ke diege mo go lona, le fa e le go nna mariga, gore lo tle lo nkise kwa pele mo loetong lwa me lwa kwa ke yang teng fela.

⁷ Gonne ga ke rate go lo bona gompieno fa ke feta, gonne ke solofetse go diega mo go lona ka lobaka, fa e le go rata ga Morena.

⁸ Mme ke tlaa diega mo Efeso go ya go fitlha mo lobakeng lwa Pentekoste;

⁹ gonne ke buletswe kgoro teng, le e go nang le tiro mo go yone, mme go na le baganetsi ba le bantsi.

¹⁰ Jaana fa Timotheo a ka tla, lo bone koo gore a nne mo go lona a se na poifo; gonne o dira tiro ya Morena, jaaka le nna ke dira.

¹¹ Ka re, a go se nne motho ope yo o mo nyatsang. Lo mo tswedisetse pele mo loetong lwa gagwe ka kagiso, gore a tle kwa go nna; gonne ke mo lebeletse go tla le bakaulengwe.

¹² Mme ka ga Apolose mogaetsho, ke mo rapetse thata, gore a ye koo go lona le bakaulengwe; mme e ne e se go rata ga gagwe gope go ya ka lobaka lono; o tlaa ya mogang o bonang lobaka.

Kopo ya bofelo le ditumediso

¹³ Disang, lo eme ka tlhomamo mo tumelong, lo dire jaaka banna, lo nne thata.

¹⁴ Gotlhe mo lo go dirang, a go dirwe ka lorato.

¹⁵ Ke a lo rapela bagaetsho, lo a ba itse ba ntlo ya ga Setefanase, fa e le mabutswapele a lefatshe la Akaia, e le ba ba ineetseng go direla baitshepi.

¹⁶ Ka re, le lona lo ingotlele ba ba ntseng jalo, le mo go mongwe le mongwe yo o thusang, le yo o dirang mo tirong.

¹⁷ Ke itumelela go tla ga Setefanase, le Foretunato, le Akaiko, gonne se se neng se tlhokafala ntlheng ya lona ba se tladitse.

¹⁸ Gonne ba lapolositse mowa wa me le wa lona, mme ka re: Tsholanang le ba ba ntseng jalo.

¹⁹ Diphuthego tsa lefatshe la Asia di a lo dumedisa. Akwila le Perisila ba lo dumedisa thata mo Moreneng, ba na le phuthego e e mo ntlong ya bone.

²⁰ Bakaulengwe botlhe ba a lo dumedisa. Dumedisanyang ka katlo e e boitshepo.

²¹ Tumediso ya me, ke le Paulo, e kwadilwe ka seatla sa me.

²² Fa motho mongwe a sa rate Morena, a a hutsege. Morena o etla.

²³ Tshegofatso ya Morena Jesu Keresete e nne le lona.

²⁴ Lorato lwa me lo nne le lona lotlhe mo go Keresete Jesu. Amen.