Tite 2 - New Testament in Mitsogo

Meekédu masapenganani

¹ Géé éwe Tite, ikéda te mane masapengana n’amuene Nzambé.

² Beenda peeye yamôgôô mbe: Digaani ékenge, n’esima éamisôba, n’eodo. Beenda ahngô mbe: Sipani gô nzéa éaJésus étôkeani édué. Na bakani n’etondo na ôbibo.

³ Obeenda peeye yageto te mônongovo. Beenda ahngô mbe: Digaani pitsi yetso gô mônongo ageto amatsimamani. Beenda ahngô mbe: Nômbiakea nôgiangana. Nômbiadigaa g’ôvéga amaduku. Buedi mbe agetoe ane oongô akaô ndongi yamisôba.

⁴ Ndongiye te gôéékéda tômbôye mbe: Nyôngéôni omée wanyô n’etondo. Nyôngéôni anee wanyô na gényônga.

⁵ Agetoe anye angeekéda tômbôye gôéba n’esima éamisôba na mitéma mimagôgéani. Angeekéda ahngô gôékenea yeba yaô na géômbé saô n’ekenge. Na gôégobeda omée waô kabaga atsuavéda Mane Mamavovo Nzambé.

⁶ Na gôndé minzambu te mônongovo. Beenda ahngô mbe: Bakani n’esima éamisôba.

⁷ Ewe Tite, ôtévéda ahngô gô mônongoe woo gayanza mônzambu mabégô mamisôba. Odigaa na môtéma ômasumani gôéékéda mabégô mavôni mandéké n’ewe.

⁸ Ikéda na mavovia mamatsimamani na gébé n’oési. Gô étsimamee éoo, adudeoe woo angasanéa na tsoyi gébé na ébégô évo gôégôeséda.

⁹ Beenda avéga mbe: Gobedani kooko yanyô. Indaani metso manyôngéô ahngô. Nômbiagoméa ahngô.

¹⁰ Beenda avéga mbe: Nômbieesua ta na sôma gévo. Ivô éôtéa ényepa mbe atubéda kooko yaô mônongoe waô amôsôba na amavôma buta mbe meekédu maMooboyi asô n’anyô Nzambé makumédu.

¹¹ Menya mbe Nzambé amatsutsuéda ngeba yedi gôéoboo oma muetso.

¹² Ngebaye yedi dine ditubéda we ganyôngéô Nzambé mbe tôviié ngima môdigédi asagô na tsôvé yetso yava tsina. Na ganyôngéô angô mbe tôdigéé na mavôma gô tsengene na ésima éamisôba ésapengana n’ene ényôngéô amuene.

¹³ Ngeba yedi ditôékéda gôédigaa kuanakue gôéenéa gévigéô sanyee ôvôni agényônga ôtôténdédani. Nyee ône ôvôni ôngatsutsuga ôbébayi ôtubéda ôndômba aMooboyi asô n’anyô Jésus‐Christ, angô te Nzambéne éasô n’anyô épôni ésaba na gégoni.

¹⁴ Amaadeekeda amuene gôéwa gôndé wa n’anyô, gôéyuua we gô mabégô metso mabévani na gôégôgéda we mbe tôngaba omedi, asi évambevo n’edi. Na mbe tôngaba na gényônga na môvinéné gôéénda mane mamisôba.

¹⁵ Oôkiô Tite, mane te mane mangeekédewe. Ikéda n’enyangee éoo éetso gôékasôgéda na gôésemba ane ookôni. Ombiasinga mbe deti yoma digôyungéda môtémee.