Tite 1 - New Testament in Mitsogo

Mikudéga na kômbô

¹ Oô te me Paul, môyanzi aNzambé. Namatômu na Jésus‐Christ. Namasevou gôéweseda na gôndé Nzambé ane amanyôngéô Nzambé amôétsa mitéma miaô gébé na buétsé. Namasevou gôémenyeda ahngô mabégô metso mapie, te mane meekédu gô ésôgee éneegeda we Nzambé.

² Nzambé anyôngéô mbe abé na tsoongo gô monyo ôsakôdéakani. Angô te Nzambé asapatani na amavangéa wa n’anyô monyoe ône, tsinane madeo ésikanô.

³ Gô ndéône émanyôngéô amuene amatsutsuéda wa n’anyô monyoe ône te gô ngudi yôgie wedi. Angô te meekédume manigôa me g’ôtômu aMooboyi asô n’anyô Nzambé.

⁴ Me nagôtendéa Tite, éwe muanami amôtéma agô mbumu éaNzambé. Wa n’oo muetso abaé tômamôétsa mitémamie gébé na paga. Nanyôngéô mbe Tétasô n’oo Nzambé na Mooboyi asô n’oo Jésus‐Christ agôétsa mate na gétabé.

Eyanzee émeetsô Tite gô Crète

⁵ Me Paul namagôtsika gô tsenge éaCrète buta mbe ômangôa ékônza mabégôme magô mbumu éaNzambé. Na mbe ôétsa ényangee éopeeye gôndé ane angasevouni gô mbumu éaNzambé gô môsenge na môsenge. Bangôa gamatévéda me éwe gô ébégôe éne.

⁶ Oétsa ényangee éopayie te gôndé mômôgôô andé na môdigédi agébé n’oési, na andé na môgeto môvo na koo. Anedi abaké ameetsa Jésus mitémamie na amenyanganô mbe ahndé na midigédi miamisôba na amenya égobéda ane atômani.

⁷ Endé te nane. Pene étôma mbumu éaNzambé andé n’eyanza évôni gôéweseda gésaô saNzambé gô mbene na gô mbene na gétabé. T’ebandô gôndé angô ésanyepa mbe gôôkanô ta na vibégô vianzongodi. Te buedi mbe môma nône abaka gébé na bôpeeo, na gébé na ôpisa, na gébé na gésima senyua maduku. Abaké gébé môgenyi na gébé n’onzôô adode gôédidiia gô divooti na gô diboe.

⁸ Na buedi mbe ône eetsô ényangee éopayi abaké môma amenya ékenea agenda na abaké môma anyôngéô te mane mamisôba. Abaké dôta na môtéma ômasumani, n’etsimama, na abaké gépenganédé mavovia. Na amenya étôma ôtôe wedi.

⁹ Buedi mbe abaké môtémee wetso gô mabégô mapie gékiné ta na vibégô vivo viaNzambé. Vane angaba n’eodo na ngudi gôéongô akedi ndongi na meekédume mapie. Angaba na ngudi dôta gôétévéda nzéa éapie gôndé ane adigaa g’ôési, na gôékoa ahngô matasame.

¹⁰ Menya mbe gôndéké oma ayekani, ti gandé gô géômbé sAjuif amasinga Jésus, andé akékôani na abôméda akaô gô mavovia maô masaba na tsoongo.

¹¹ Ibéda ahngô miônyamie mbe akôda gôébégô andé gôéyungéda mbumu amôbongo gômeekédahngô mane masaba kuanakue gôéékédu. Eékéda nane te g’ônzôô adode gôédidiia gô mangônzô maô.

¹² Môsi tsenge éaô éaCrète amapandôéda mônongoe waô va mbeego mbe: Asi Crète, bandôa va mbeego te asi môkôbé, n’asi dibagaa, n’asi dakadaka. Saô gémba te aakagane.

¹³ Ene émavovo môpandôédine ône, môsi Crète, asipaté. T’ebandô nagôénda mbe: Semba ahngô ti v’ekôdéô éasembaga buta mbe asipa gô nzéa éaJésus étôkéani édué.

¹⁴ Na mbe asakôngéda matangôtangô mapakéda Ajuif mbe mabégô mapie. Na mbe asagobeda mitômamie na migemie miane amanôtôga gô nzéane éamabégô mapie.

¹⁵ One andé na môtéma ômagôgéani, mane medi metso te mamagôgéani. Géé ône andé na môtéma apaga ôsigôgéni, mane medi metso te masigôgéni. Gôébégô muangee amôtémedi ôndé gô évitsi ôsoongôa émôtsundéda.

¹⁶ Eenda mbe: We tôsabômu Nzambé, tambô. Esimee na mayanza maô matubéda mônongoe waô ôsavambangô na Nzambé. Andé ga sôma gébooni sambônga ébévani. Akina Nzambé. Na asoongôa éyanza ta n’ebégô évo éamôsôba.