Romains 8 - New Testament in Mitsogo

Gédidi SaNzambé gétôétsa monyo

¹ Ekôdéô éebégôe te édué. Gôsabadô géesédéô gôndé ane andé na vitoo na Jésus-Christ.

² Gôébégô ôtômu aGédidi SaNzambé, géne gétôvambéda monyovo na Jésus-Christ, gémayuua me g’ôtômu amabégô mabévani na g’ôtômu owa.

³ Migemie mimatsikéô we na Moïse misibé na ngudi gôndé oma gamabôtu angô gôébégô ébéva éamitéma mioma émamiyungéda. Ene ésiôngôé mige éyanza, amuene Nzambé amayanza éangô. Amakudéga Muanedi amagono na wa n’anyô oma abévani gôétônôtôa ébévee éamitéma miasô n’anyô émabôtu na môma. Na ameeséda éangô.

⁴ Tambô gôndé wa n’anyô tôndé n’evamba na Gédidi SaNzambé, na tôsadigaadô gô ébéva gamabôtu we, ndongi na mitôma na mige miaNzambé misadaga égobeda.

⁵ Gôébégô ane adigaa gô ébéva gamabôtu ahngô, matasame maô metso te gô mane manyima yôtô yaô. Ivô ane adigaa évambevo na Gédidi SaNzambé, matasa maô metso te gô mane manyôngéô Gédidige géne.

⁶ Mikebanganô miamane manyima ôtô mikeda môma na g’ôwa. Ivô gékéneo samane manyôngéô Gedidi SaNzambé gétôétsa monyo na gétabé.

⁷ Ane eetsa matasa metso gô mane manyôngéô yôtô yaô, ahndé adudeo aNzambé. Ahsasinga égobeda mige miaNzambé. Akanégéyee, asangoongôa émigobeda.

⁸ Ane aténdéda ndugi yaô gamabôtu ahngô, asangoongôa éénda éne ényôngéô Nzambé.

⁹ Ivô anye, nôsadigaa gô ngudi yaanyene na gô manyima mayôtô yanyô. Gédidi SaNzambé géndéké gô mitéma minayô. N’anye nôdigaa ganyôngéô sangô. One asaba na Gédidi SaChrist gô môtémedi, angô asamenyanganô na Nzambé.

¹⁰ Buéyé mbe yôtô yanyô dimani éwa ti wakaga gô mabégô mabévani, ôkô mbe Christ andé gô mitéma mianyô, Gédidi SaNzambé génôétsa monyo. Gôébégô Nzambé anôena ti eembe nôsabadô n’oési.

¹¹ Nzambé amakunda Jésus g’ôwa. Okô Gédidi sedi géne gémakundua Christ g’ôwa gôéba na monyo gédigaa gô mitéma mianyô, sangô dôta génganôétsa monyo gô yôtôye yanyô disaba na ngudi.

¹² Menyani mbe wa n’anyô ana aTéta, tôsaba na môtete na yôtô yasô n’anyô mbe tôngatômu na yangô gô manyima maô.

¹³ Okô tôgobeda yôtôye yasô n’anyô na manyimama maô tôngawa. Okô wa n’anyô gô ngudi yaGédidi SaNzambé tôpangi ékina manyimame mane mamabôtu na wa n’anyô, tôngaba na monyo.

¹⁴ Ane asinga Gédidi SaNzambé mbe gétôma ahngô, te ana aNzambé.

¹⁵ Gédidi gémeetsô wa n’anyô na Nzambé gésatônikéda gôéba avéga atômu na gomo. Ivô Gédidige géne gétôbôta ana aNzambé. Gôndé we gô mbumu éedi, Gédidi sedi gétôwedéa gôémôneegeda mbe: Téta, Téta.

¹⁶ Gédidige sedi géwanyéda moonga na géne sasô n’anyô oma mbe na gô pie tôndé ana amabôtu gô mbumu éaNzambé.

¹⁷ Tôndéké ana apie aNzambé na tôngadiia mikuanyamie mimakôkéga angô gôndé omedi. Okitie wetso ômeetsangô Jésus-Christ, ôndé te asô n’anyô. Okô tôbé môvo n’edi gô maguga, tôngaba dôta môvo n’edi g’ôndômba.

Ondômba ôngaba n’asô n’anyô gô mbene

¹⁸ Me Paul namenya mbe, na maguga meena wa n’anyô va tsina, na ôndômba ôngaba n’asô g’ôba, ôndômba ôsaba makanégéô na maguga. Ondômbee ôvôô.

¹⁹ Metso mamakana Nzambé mandé môtie gôéenéa ndéône éngatsigéda Nzambé anedi.

²⁰ Tsinane nyetso éndéké g’ôtômu one asaba na tsoongo. Tsinane ésibaké nane v’ebandô, ivô émakokou na Nzambé gô pesu andéô. Ivô gôndé ébégô éténdéduni.

²¹ Tsinane éténdéda mbe ngudiye dibévani disangabadô n’otômu gôébunganéda, na gôébooeda éôma émakanôni. Vangakusédu tsinane g’ôvégee ôndé yangô, éngeetsô ôndômba ôvo n’ana aNzambé gô ngudi yedi.

²² Tôsabômu mbe ndéô nedué tsinane nyetso ébisa na pievia ga môgeto abisa na misongo andé gôébôta.

²³ Ivô kaka tsinane étévô. Buéyé na wa n’anyô tôbisa gô mitéma miasô n’anyô gôéenéa géobogeo sayôtô yasô n’anyô vangatôkusédu na v’ekanga mbe: Adua te ana aNzambé. Tôndéké tômakatô na Nzambé môkodi te Gédidi sedi. Na sangô gétôbangôéda éne éngatôdiiani.

²⁴ Wa n’anyô tômoobou na tôndé na môténdéda gô géobogeo sasô n’anyô. Okô môma eena éne ématéndédangô, gôsabadô môténdéda. Ene éenanôni ésaténdédu.

²⁵ Ivô vatôténdéda éne ésatôenani, tôenéa éangô na môvinéné.

²⁶ Wa n’anyô oma tôdagéô énigôgéô. Gédidi SaNzambé géviga gôétôwedéa. Gôébégô tôsamenya évovo na Nzambé ganyôngéô amuene. Ivô Gédidige géndé gô mitéma miasô n’anyô gévovo na Nzambé gôndé wa n’anyô, na géaama gô panda disoongôa wa n’anyô ébubua.

²⁷ Amuene Nzambé, ône avasa gô mitéma miasô n’anyô asabômu éne éduka Gédidi gôndé wa n’anyô. Gôébégô Gédidige gévovo na Nzambé gôndé asi mbumu éedi gô mane manyôngéô Nzambé.

²⁸ Menyani mbe Nzambé ayanza gôétônyepeda gô mabégô metso mabuéa gôndé wa n’anyô. Endé te nane gôndé wa n’anyô tôndé tômabambéô na Nzambé gamavanga amuene.

²⁹ Gôébégô Nzambé amasevoa omedi v’ebandô. Na amavanga dôta v’ebandô mbe omee adua angagono na Muanedi. Vane Muanedi Jésus te kuuane apingô yanéyee.

³⁰ V’ebandô Nzambé amasevoa ane angaba eedi na amabambéa ahngô. Ane amabambéôni, na amaabéani, Nzambé amatsimaméda ahngô ti eembe asaba n’oési va mbene edi. Ane amatsimaméduni, Nzambé amagésangana n’ahngô g’ôbébayi ôtubéda ôndômbee wedi.

Etondo éaNzambé éndé évôni

³¹ ?Gô mabégôme mavôni éma tôngeenda nayee? Okô mbe Nzambé andéké na wa n’anyô ?ône angatôvingani indaa?

³² Nzambé asibé na ninga gôétôétsa Muanedi na amadeekeda angô gôéwa gôndé wa n’anyô muetso. Buéyé muanedi amatôétsa ?tambô na éômee éetso nayee asangatôétsa éangô?

³³ ?One angasunda ane amasevou na Nzambé indaa? Kaka Nzambé. Gôébégô te Nzambé eetsa ahngô mitayi.

³⁴ ?One angeeséda ane amasevouni indaa? Kaka Christ. Gôébégô te Jésus-Christ amawa, na va ngongone vane amakunduga. Na angô andé digaa gô géeyo gémôgôô saNzambé gôétôsungéa.

³⁵ ?Ene éngaaganédana wa n’anyô n’etondo na ngeba yaChrist éndé? ?Te maguga? ?Te mindôngamie? ?Vo gékuanôge? ?Vo nzaa? ?Vo ôsuga? ?Vo mabégô madagani? ?Vo ôwa? Mabégô mema masangoongôa étôaaganédana n’etondo éaChrist.

³⁶ Matendeo MaNzambé matônigôa mbe: Pitsi yetso navetsu n’owa te gôndé éwe. Oma atôena eembe tôndé mandombo matsuaô na va gétsatséô.

³⁷ Ivô mabégôme mane mandé g’ebadi égenyuni. Gô mangô tôdiia te diiaga gô ndugi yone atônyôngéôni.

³⁸ Me Paul tsatsuma étondoe éedi paga. Gôsaba ta n’ebégô évo éngaaganédana me na éangô, buéyé mbe ôwa, buéyé mbe monyo, buéyé n’asi g’ôba avigédu na Nzambé, vo dipo ditômu na dipo ngudi yagésa na gésa, buéyé mabégô madeo noo, na mane mavigani.

³⁹ Kaka ngudiye yag’ôba, kaka ngudi yava tsina, kaka éôma émakanôni na émavangôni. Gôsaba sôma géngoongôa éaaganédana wa n’anyô n’etondo éaNzambé. Etondoe éne émeenanô gô mane mamayanza Kumu éasô n’anyô Jésus-Christ.