Romains 6 - New Testament in Mitsogo

Okô mbe Christ atôtômani mabegô mabévani masatôtôma

¹ ?Wa n’anyô vo tôngeenda nayee? ?Tôomba te édigaa gô ébévee buta mbe ngeba yaNzambé diomba éyuua we gô éangô-a?

² Géndégégé. Tômani éwa gô mane mabévani. ?Tôngoomba éyanza gô mangô nayee?

³ Vamabatésu wa n’anyô gôéba monyo ôvo na Jésus-Christ gô monyoe wedi ?tambô nôsamenya mbe tômabatésu gôéba môvo n’edi g’ôwedi-a?

⁴ Gô ngudi yabateme tômawa n’edi na tômagunyu n’edi gô ngii. Gamakunduga Christ gô ngudi dipôni yondômba okumaka aNzambé gôéba na monyo, na wa n’anyô dôta tôndé na wene monyo gô ngudiye yedi dine.

⁵ Okô mbe tôndé môvo n’edi gô ôwee ômawa angô, tambô tôngaba dôta môvo n’edi gôékunduga g’ôwa gamakundugangô.

⁶ Tônigôgéôni buedi édué. Mônongoe ômabaka n’asô n’anyô va mbeego ômakomedu na Christ kukepo gôéwa n’edi va gésumu sowa. Te gômbe mônongoe wasô n’anyô ôbévani ômadimbana. Na wa n’anyô tôsabadô g’ôvéga amabégô mabévani gôétômu na mangô.

⁷ Nzumbi asatômukudô na mabégô mabévani. Endé émanzeegedu na mangô.

⁸ Okô mbe mônongoe wasô n’anyô ôbévani ômawa na Christ, tambô tôka na wene mônongoe amonyo ôdigaa wa n’anyô n’edi.

⁹ Tôsabômu mbe vamakunduga Jésus g’ôwa gôéba na monyo asangadôwa. Owee ôsabadô n’otômu gôndé angô.

¹⁰ Christ amawa kukepo gôémana ôtômu ômabaka na ôwa. Gô monyoe ôndéké n’edi n’atsatsee andé te môvo na Nzambé.

¹¹ Gôndé wa n’anyô te mônongovo. Tôndéké ga nzumbi ésatômuku na mabégô mabévani. Ivô tôndé misiki na monyo gôédigaa gôndé Nzambé na monyovo na Jésus-Christ.

¹² Nômbiasinga mbe mabégô mabévani matôma yôtô yanyô. Nômbiagobeda tsôvéyé dibévani ditômu anye na yôtô yanyô.

¹³ Nômbiadeekeda éeme éayôtô yanyô gôéyanza mabégô mabévani. Kabaga kumu éebéva ayanza na éangô gô mane medi mabévani. Ivô deekedani anyene na gôndé Nzambé, anye nômakunduga g’ôwa gôéba n’edi monyovo. Itsani anyene gôéyanzéa Nzambé gômbe amuene angayanza na éeme éanyô éne ényôngéô angô.

¹⁴ Mabégô mabévani masatômadô anye gôébégô nôsabadô gô tsina otômu amige miaNzambé, ivô nôndé gô tsina angeba yaNzambé gôétômu na yangô.

Nôndé avéga akôô aNzambé

¹⁵ ?Tôngeenda nayee? Wa n’anyô tôenanô na Nzambé ngeba ?tôngoomba éénda mabégô mabévani tsangô mbe tôsaba gô tsina amige miedi-a? Géndégégé.

¹⁶ ?Tambô anye nôsamenya mbe nôndé na ngudi yesevoa kumune ényôngéô anye, ône angayanzéa anye-a? Okô nôsevoa mabégô mabévani gôégobeda mangô, manganôétsa ôwa. Okô nôsevoa ôgi aNzambé gôégobeda angô, ônganôtsimaméda gôéba gébé n’oési va mbene aNzambé. Nôngaba avéga akumune éngagobedanye.

¹⁷ Tôneegedekeni Nzambé. Va mbeego nômabaka g’ôvéga gôétômu na mabégô mabévani. Ivô ndéô nedué nômeetsa mitéma mianyô pepe gôégôbeda meekédu maNzambé mane mamadiianye.

¹⁸ Nômoobou g’ôvéga ômatômu anye na mabégô mabévani. Nôka avéga akôô aJésus gôéénda éne ényôngéô Nzambé.

¹⁹ Me Paul navovo n’anye nakanéga na tsavane éovéga te gôdagéô anye énigôgéô mabégô mema. Gô mbeego nômatsôkéa gôéadeekeda anyene g’ôvéga amayanza mabévani manzooh, na nômadigaa sagô. Tambô n’atsatsee deekedani anyene na gényônga ga avéga akôô aJésus gôéba na môdigédi ômagôgéani.

²⁰ Vamabakanye g’ôvéga ômatômu anye na mabégô mabévani, nôsitindégu gôéénda mane manyôngéô Nzambé.

²¹ ?Tsoongo ndé gô mabégôme matsoyi mayanzanye-a? Ekôdéô éamangô te ôwa.

²² Ivô ndéô nedué nôndé nômoobou gô mabégô mabévani. Na nôndé avéga akôô aJésus gôéyanzéa Nzambé. Tsoongone yanyô te môdigédi ômagôgéani ônyôngéô Nzambé. V’ékôdéôe angô te monyo ôsakôdéakani.

²³ Môvanô ôétsa ébévee gôndé môma te ôwa. Ivô éne éétsa Nzambé ôbiia gôndé môma te monyo amôbô na môbô gôédigaa na vitoo na Kumu asô n’anyô Jésus-Christ.