Romains 2 - New Testament in Mitsogo

Géesédéô SaNzambé gôndé oma

¹ ?Ewe ôeséda akoo éwe ndaa? Omuene gébé na mitayi. Veeséda éwe akoo, éwe dôta ôénda te mônongovo ga ahngô, ôndé gôéasiséda ômuene tsôgôô.

² Tôsabômu mbe Nzambé asatatôa oma na asapenganéda éne éeséda angô abévie, ane agônga Nzambé na disôba yaô.

³ Ewe ôséda akoo, na éwe ôgônga Nzambé na ôsôbee woo mônongovo geenda akoo. ?Otasa mbe n’ewe ôngabusuga géesédéô saNzambé-a?

⁴ Tambô vabibéda Nzambé na suii na veenéa angô abévi akoa mitéma miaô gôéba wene mônongo ?éwe ôenza Nzambé na ôkanéga Nzambé-a? Osamenya mbe ngeba dienanô éwe na Nzambé dindé mbe ôngakoa môtémoo na mônongoe woo.

⁵ Ti g’ôsôba amôtémee woo ôsasinga ndongi, na ôsasinga ékoga. Menya mbe ôkôva ômuene tsôgôô éôtéa édagani na gôndé ômuene, nyaa ôngeenanô ôpisa aNzambé na géesédéô sedi gésapenganani.

⁶ Te nyee ôngadiia môma na môma gô éne émeenda amuene.

⁷ Ane abuta ôndômbee wedi na ôkumakee wedi na monyoe wedi amôbô na môbô ayanza na môvinéné mane mamisôba manyôngéô Nzambé. Te angô angeetsô monyo ôsakôdéakani ôndé na Nzambé vavo.

⁸ Ane akina Nzambé na akékôa mabégô medi mapie na asuméa keaga gô mane mabévani, Nzambé angatubéda ahngô ôbagee wedi na ôpisedi na ôvembee wedi.

⁹ Maguga na panda dimootéani dingaaga gôndé abévie muetso. Mapangame te Ajuif, na va ngimane vane, te ane asaba Ajuif.

¹⁰ Menyani mbe Nzambé angeetsa ôndômbee wedi na ôkumakee wedi na gétabége sedi gôndé ane eenda ganyôngéô amuene Nzambé. Mapangame te Ajuif, na va ngimane te ane asaba Ajuif.

¹¹ Gôébégô Nzambé asaba na tsevô oma.

¹² Muetso ane eenda mabégô mabévani gémenye ndongi na mige na mitôma mimatsikéô we na Moïse, angawa gétsundédu gô miangô. Na gôndé muetso ane eenda mabégô mabévani amamana éôkô ndongi na migemie na mitômamie ahngatsundédu gô miangô.

¹³ Nzambé asanyôngéô ane ookô mabégô medi na matô matévo. Anyôngéô te ane ookô na agobeda mangô metso gamakitsa amuene na gamatôma amuene Nzambé.

¹⁴ Gôndé ane asibôtu gô éongo éAjuif na asamenya mitôma na mige mindé n’Ajuif, ivô ahngô akitsa mige mianguene na miangô miwanya na mine miAjuif. Andéké na migemie miakuanakue buéyé mbe misikitsô na Nzambé ga mine miAjuif.

¹⁵ Gôwanya mine miamôma na mine miaNzambé mitubéda mbe Nzambé amatenda ndongi na mitôma na mige miedi gô môtéma amôma mbe angamimenya, angô gébeendu miangô. Buéyé na muanga amôtéma amôma, ône ôtsundéda angô gô môtéma amuene, ôwanya na migemie na te angô ôeséda môma ôési, vo ôétsa môma mitayi.

¹⁶ Metso mane mangeenanô nyee ôngatsundéda Nzambé na Jésus-Christ, atsundéda mabégô mamasuégu gô mitéma mioma. Te éne éôkanô gô Tsangô Eamôsôba éékéda me Paul.

Ebégô éAjuif na migemie

¹⁷ Ivô me navovo n’ewe ôakuméda mbe: Me Môjuif. Môtémoo wetso ôndé gôékenea migemie ga meba magô ôvéé. Na ônyemôga gô Nzambéne éoo.

¹⁸ Osabômu éne ényôngéô Nzambé na dôta ndongi na mige miékéda éwe gôésevoa mane mamisôba gôéénda mangô.

¹⁹ Ondé n’etasa mbe: Me te môtévédi anzéa gôndé asi pogu. Me te gévede sane adigaa gô évitsi.

²⁰ Me te môékédi gôndé asi ôdungé, me te payi, mônigôi aanéngé. Metso mane ôakuméda ômuene gôébégô mige na mitôma miaNzambé misapata na mimadugu étsimama éetso na éodo éetso.

²¹ Ii, éwe ôékéda akoo. ?Oseekéda dôta n’omuene nayee? Ewe ôékéda mbe: Nômbieesua. ?Na gô pie ômuene ôseesua-a?

²² Ewe ôékéda mbe: Nômbiakea gésasô. ?Na gô pie ômuene ôsakea gésasô-a? Ewe ôkina mbumba yegoni. ?Na gô pie ôseengéa na gô yeba yaô gôébongo éne émadeekedu gô mbumbaye-a?

²³ Ewe ôkuméda mitômamie na migemie, ivô ôkô ôsagobeda miangô ôndé gôéenza Nzambé ône amakitsa miangô.

²⁴ Matendeo MaNzambé matônigôa mbe: Gô mônongoe wanyô Ajuif, akanyô gô mavo mongo eenza Nzambé.

²⁵ Okô éwe Môjuif ôgebeda migemie na mitômamie tambô na gégeetéôge géne sagémbégéa sAjuif géndé na tsoongo. Okô ôsigobeda migemie na mitômamie tambô na gégeetéôge gésaba na tsoongo.

²⁶ Tôkanéga te mbe: Okô mômôgôô asigeetu gô gésôga sAjuif ivô angô akenea mitôma na mige mietso ?Nzambé asangabono angô ga amageetu-a?

²⁷ Menyani mbe mômôgôône asigeetuni ône akenea migemie angagôeséda, éwe ôsakenea migemie, buéyé mbe ôndé na miangô mimatenduni na ôndé ômageetuni gô gésôgage.

²⁸ Nômenya mbe ône andé Môjuif te gô mônongoe wedi na gômageetu ôtôe wedi gô gésôgage sanyô tambô, Ojuifue te gô môtéma, kaka gô ôtô.

²⁹ One andé na gô pie Môjuif asigeetu gô gékeneo samige mimatenduni, ivô amageetu na Gédidi SaNzambé gô môtémedi. One andé na gô pie Môjuif asakumédu na môma. Akumédu te na Nzambé.