Romains 16 - New Testament in Mitsogo

Paul akômbôa ana aTétee n’edi agô mbumu éaNzambé

¹ Nanôbeenda mbe nôngaba na môgenda, te Phoebé, kadine éasô n’anyô agô mbumu éaNzambé. Ayanzéa Nzambé gô mbumu éedi gô Cenchrées.

² Vangatsigangô na gôndé anye, keneani angô gô ina aKumu geenda wa n’anyô gô mbumu éaNzambé. Wedéani angô gô mabégô metso manganyôngeô angô. Amuene amawedéa oma ayekani, ti gandé me.

³ Kômbôani gô inami Priscille na Aquilas wee yami ahndé éyanzevo n’ami éaKumu Jésus.

⁴ Ahngô abaé amavétsu éwa gôéyuua me vamabaka me mbe nawa. Me nakuméda ahngô ti pepe, ivô kaka me môtévo, buéyé n’asi mbumu éaNzambé muetso gô tsengeye yetso ane asaba Ajuif akuméda ahngô mbe: Mbeka ahngô, we mbe tôsaba na Tsangô éaJésus.

⁵ Kômbôani dôta gô inami asi mbumu éaNzambé muetso môwanya gô eba aPriscille na Aquilas. Kômbôani wee ami Epaïnète gô tsenge éAsie. Te angô amapanga éétsa Christ môtémedi gô tsenge nene.

⁶ Kômbôani Marie gô inami. Amayanzéa anye pepe.

⁷ Kômbôani gô inami dôta kindami Andronicus na Junias. Ahmadigaa n’ami gô eba atsôgôô. Me madeo tsisinga Christ te ahngô aka oma aChrist na ootéa éneegedu va gatse ane amasevou na amatôkuku na Jésus-Christ.

⁸ Kômbôani na wee ami Ampliatus gô ina aKumu.

⁹ Kômbôani gô inami Urbain, wa n’edi ayanzi aChrist na dôta kômbôani wee ami Stachys.

¹⁰ Kômbôani Apelles, te ône amatubéda ga ootéa angô ényôngéô Christ. Kômbôani dôta géômbé sAristobule.

¹¹ Kômbôani tétene éami Hérodion na géômbé saNarcisse, ane ameetsa Kumu mitéma miaô.

¹² Kômbôani Tryphène na Tryphose ayanzi aKumu na dôta wee ami Perside, ône asagogo gôéyanzéa Kumu.

¹³ Kômbôani gô inami môyanzi môvôni aKumu eendô mbe Rufus, na yeedi gôébégô angô te iyami dôta.

¹⁴ Kômbôani dôta Asyncrite, na Phlégon, na Hermès, na Patrobas, na Hermas na ana aTétee muetso andé n’ahngô.

¹⁵ Kômbôani gô inami Philologue na Julie, na Nérée na kayedi Olympas, na asi mbumu éaNzambé andé vavo n’ahngô.

¹⁶ Sambanéani anyene n’anyene ana aTéta na kômbô étsimama. Mbumuye yetso yaNzambé, oma aChrist dinôkômbôa.

Géevedéôge samôyusumédue

¹⁷ Me Paul nanôkeneda mbe wemani gôndé ane anyôngéô étatôa anye. Ayungéda meekédume mamookô anye. Anyôngéô ébôméda anye nômeetsa Jésus mitémamie. Aaganani n’ahngô.

¹⁸ Gôébégô mônongoe oma ane, asayanzéa Kumu asô n’anyô Jésus-Christ. Ayanzéa te mabuyi maô. Gô mavoviame maô na buembee waô abômédu oma andé na mitéma miagésingiasingia.

¹⁹ Oma muetso amani éôkô gagobedanye Kumu Jésus. Me nanôtsôkéa. Nanyôngéô mbe nôba n’eodo gôéénda mane mamisôba na nôgônga mane mabévani va kôbangô kabaga nôdengu n’evindô.

²⁰ Tôsabômu mbe amuene Nzambé, môétsi agétabé, n’atsatsee angayetéda Satan gô makôdô manyô gôémôniga. Te mbe mate maKumu éasô nanyô Jésus mabaké gôndé anye.

²¹ Môwedine wami Timothée anôkômbôa. Kindami Lucius, Jason, na Sosipater anôkômbôa.

²² Na me Tertius môtendine agésangô gegé, nanôkudéga gô ina aKumu Jésus yami kômbô.

²³ Gaïus, kumu eba ôdigaa me, na ôwanya we asi mbumu éaNzambé anôkômbôa. Na Eraste môkenene adodeye yamôsenge ôdôô anôkômbôa. Na dôta muana aTétee Quartus anôkômbôa. [

²⁴ Te mbe mate maKumu éasô n’anyô Jésus-Christ mabaké gôndé anye muetso. Amen.]

Gékumédéô samôyusumédu

²⁵ Tôkumédéni Nzambé. Angô andé na ngudi gôétôsipéda gô nzéane éamonyo edi étôkéani. Atôsipéda gô Tsangô Eamôsôba éékéda me, na gô meekédume mami metso maJésus-Christ. Na dôta atôodeda gômanigôgéô wa n’anyô matasa maNzambé mamabaka ga mamasuégu. Ene émavanga Nazmbé gôndé wa n’anyô oma ésinigôganéô n’oma va mbeego.

²⁶ Ivô ndéô nedué ématsutsuu na v’ekanga va miso moma gô mane mamatenda apandôédi amatasa maNzambé. Na vane Nzambé Amôbô na Môbô ameetsa ôtômu mbe éne émavanga angô gôndé oma éngatsuaô na gô tsenge yetso gômbe oma muetso angookô na angeetsa mitéma miaô gôégôbeda Nzambé gémôtsumé paga.

²⁷ Tôkumédéni Nzambé, Kumu éodo na ôndômbee wetso, gô ina aJésus-Christ, môbô na môbô, amen.