Romains 15 - New Testament in Mitsogo

Tsika mane manyôngéô éwe. Inda mane manganyepeda môkoo

¹ Wa n’anyô tômani éoodo gô mabégô maNzambé mameetsa we mitémamie, tôndé n’eyanza gôéwedéa ane agédeedakani gô mbumu éaNzambé gôésipéda ahngô. Tôsangoongôa édigaa gô monyo ôdôô gô gényônga sawa n’anyôene.

² Môma na môma tôéndé mane manganyepeda akasô gôéwedéa ahngô aweséa gô mbene na gô mbene gô nzéane éamabégô maNzambé.

³ Jésus-Christ asidigee gô monyoe ava tsina gô gényônga samuene. Oôkôni éne étônigôu na Matendeo MaNzambé mbe: Matokime matokou éwe, mamaaga te gôndé me.

⁴ Metso matôtanga gô Matendeo MaNzambé mamatendu mbeego gôétôékéda. Gômbe tôngaténdéda na môvinéné mane mookô we gô Matendeome. Mangô makasôgéda we.

⁵ Môvinéné asô n’anyô na ékasôga éasô n’anyô éviga gôndé Nzambé. Te mbe angô atôétsa ngudi gôédigaa na vitoo gô mbumu éaNzambé mônongovo gadigaa amuene Jésus-Christ.

⁶ Vane wa n’anyô muetso tônganeegeda Nzambé. Tétene éaKumu asô n’anyô Jésus-Christ tôngamôkuméda n’ogi ôvo.

Tsangô Eamôsôba éaJésus-Christ te gôndé oma muetso

⁷ Vambani na gényônga anyene n’anyene gô mbumu éaNzambé mônongovo gamavamba Christ n’anyô gôékuméda Nzambé.

⁸ Bangôani mbe Christ amakou môyanzi aAjuif gôédugéda éne émavanga Nzambé na téteye yAjuif va mbeego. Te éne étôtubéda mbe Nzambé asapata.

⁹ Na Jésus-Christ amaviga dôta gômbe ane asibôtu gô éongo éAjuif angakuméda ngeba yaNzambé. Te gatônigôu na Matendeo MaNzambé mbe: Gô éne, nangagôkuméda gô tsenge yetso yava tsina. Nangeemba ôndômba ainee éoo.

¹⁰ Matendeome matôomba énigôa mbe: Anye asi tsengeye yetso, tsôkéakani n’ane amasevou na Nzambé.

¹¹ Matendeo matôomba énigôa mbe: Anye asi tsengeye yetso, kumédani Kumu Te mbe oma muetso amôkumédé.

¹² Esaïe amatenda mbe: Muana gô ébôta éaJéssé angaviga. Angasevou gôétôma tsengeye yetso. Oma abono miso maô te gôndé angô.

¹³ Gôsatsuma anye Nzambé paga, te mbe angô Kumu atsoongone éasô n’anyô, anôétsa gényônga sedi na gétabé sedi sapie. Okitie wanyô te môténdéda ôndé n’anyô gô ngudi yaGédidi SaNzambé.

Paul andé na mitayi gôétenda mane mamatendangô

¹⁴ Ana aTétee n’ami gô mbumu éaNzambé, me Paul tsabômu gandé anye. Nôndé oma angeba, na nôsabômu metso mane mandé kuanakue gôndé anye gôéénda na gôéongono ndongi.

¹⁵ Buéyé nane, nanôtendéa ti eembe nanôenza ga oma asamenya mabégô, gô mavo mabégô manôtendéa me. Gô gésangô gegé nanôbangôéda te bangôéda. Nanôtendéa ti gô gésooge gémeetsô me na Nzambé.

¹⁶ Amasevoa me gôéba môyanzi aJésus-Christ gôndé ane asaba Ajuif. Eyanzee éami te gôénigôa ane asaba Ajuif Tsangô Eamôsôba émaviga gôndé Nzambé. Nayanza gameenda môdeekedi adigondoku. Nadeekeda ane asaba Ajuif ôbiia na gôndé Nzambé. Gô ngudi yaGédidi sedi, Nzambé asinga ôgondokue ône.

¹⁷ Gô vitoone éndé me na Jésus-Christ natsôkéa éne éyanzéa me Nzambé.

¹⁸ Tsangoongôa éakuméda memuene buétsé te gô mane mayanza Christ na me Paul gôéweseda ane asaba Ajuif na gôndé Nzambé gôémôgobeda. Christ amayanza na me gô mavovia na gô môdigedi.

¹⁹ Amayanza na me gôétubéda émbégéa éangudi yedi, na gô mabégô manyônganéôni masoongôa môma ésupua, na gô ngudi yaGédidi SaNzambé. Te gameekéda me Tsangô Eamôsôba éaJésus-Christ, bandôa gô Jérusalem na nzéaye yetso dine ngu na gô tsenge éaIllyrie.

²⁰ Veekéda me Tsangô Eamôsôba, éne ényôngéô me ti ndi gôékea na gô tunguye madeo disiôkanô Tsangô éaChrist. Me nakina ésaa eba gô ngongo oobôga ômasiga muene môma.

²¹ Me neenda gatônigôu na Matendeo MaNzambé mbe: Ane asibeendu mabégô medi, angeena angô Na ane asiôkôni, anganigôgéô.

Paul anigôa étasa éedi gôéviga na gô môsenge aRome

²² T’ebandô tsiôngôé ébuéa na gôndé anye kuka yetso dimanyôngéô me.

²³ Ivô ndéô nedué namani éseta gô tunguye disibuéké Tsangône na mbeego. Bandôa gô éma émootani namookô tsôvé gôéviga gôénôena.

²⁴ Nangabuéa na gôndé anye gô môtôôe ôkea me na gô tsenge éEspagne. Vangoota me nangasikama gôénôena na gôémana n’anye ôkana angonde. Na te anye nôngawedéa me gôétsiga gô tsenge éEspagne.

²⁵ Ivo n’atsatsee nakea na gô Jérusalem gôéseta asi mbumu éaNzambé andé gône.

²⁶ Asi mbumu éaNzambé gô Macédoine na Grèce amavanga gôéétsa dibiia yaô dingakea na gôndé misuga miagô mbumu éaNzambé mindé gô Jérusalem.

²⁷ Amavanga nane te anguene, ivô éndéké ga môtete ôvanahngô misugamie miagô Jérusalem. Gôébégô Ajuif asi mbumu éaNzambé gô Jérusalem amakaba ôkitie waô aGédidi SaNzambé n’akaô, ane asaba Ajuif. Tambô ane asaba Ajuif apukanéda n’ahngô g’ôsugee waô, gôéétsa ahngô ôkitie waô amanyiva.

²⁸ Vangagôga éyanzee éami gôéétsa asi Jérusalem dodeye dine, nangoota gôndé anye gôébuéa na gô Espagne.

²⁹ Me tsabômu mbe vangaviga me na gôndé anye, nangatsiga gô ngudi yamate maChrist.

³⁰ Oôkôni éne énôduka me ana aTétee agô mbumu éaNzambé. Gô ina aKumu asô n’anyô Jésus-Christ, na gô étondo ématôétsô na Gédidi SaNzambé, wedéani me gô ébadi étôgenyani. Ebadie te gôévovo na Nzambé gôndé me.

³¹ Vovoni na Nzambé mbe me Paul kabaga natsôpu gô tsenge éaJudée n’ane asaneegeda Nzambé. Vovoni dôta mbe asi mbumu éaNzambé gô Jérusalem angeena buedi na dibiiaye ditsuéa me ahngô.

³² Vane, ôkô Nzambé anyôngéyiô, nangabuéa na vandé anye na gényônga gévôni. Nangadunda va gatse anyô.

³³ Te mbe Nzambé, môétsi agétabé abaké gôndé anye muetso. Amen.