Romains 14 - New Testament in Mitsogo

Nômbieeséda muana aTétee n’oo agô mbumu éaNzambé

¹ Singani muana aTétee n’anyô môsi mbumu éaNzambé gôévamba n’anyô buéyé mbe angô madeo asioodo gô mabégô maNzambé mameetsangô môtémedi. Ombiamôsemba gô mônongoe wedi.

² Tôkanéga te mbe, môvo aa miyakô mietso na nyama yetso. Géé môkedi madeo asioodo gô Mane Mamavovo Nzambé mameetsangô môtémee, na angô aa te môyakô ôtévo gébé na nyama.

³ One aa éetso asangoongôa éenza ône asaani. Na ône asaani asangatsundéda ône aani, gôébégô Nzambé amasinga angô.

⁴ ?Ewe ndaa ôtsundéda môyanzine amuene môma? Asipéyee, asasipéyee gô éyanza éedi ébégôé éndé na kooko edi. Angasipa gôébégô Kumu asô n’anyô andé gôémôsipéda.

⁵ Mavooe môma môvo agobeda môsee ônyôngéô angô. Na môkedi amenya mbe minyamie mietso te mônongovo. Buedi mbe môma na môma abaké gétsumé paga gô môtémedi.

⁶ One agobeda môsee, agobeda te gôéneegeda Kumu. One aa éetso, aa te gôénéégeda Kumu gôébégô akuméda Nzambé gô môyakôe wedi. One asaani, akina môyakô gôéneegeda Kumu na akuméda Nzambé.

⁷ Endé te nane. Vadônga wa n’anyô, monyoe ôsaba gô mane masô n’anyôene matévo. Na vawa wa n’anyô, ôwa ôsaba amôma môvo môtévo. Vatôdôngani, monyo asô n’anyô te gôndé Kumu.

⁸ Vatôwaani, ôwa asô n’anyô te gôndé Kumu. Tôwéyee, tôdôngeyee, tôndéké te aamuene Kumu Nzambé.

⁹ Christ amawa na amakunduga gôététu mbe Kumune éane amawani na éane adôngani.

¹⁰ ?Ewe ndaa ôeséda muana aTétee n’oo? ?Ewe ndaa ôdeta muana aTétee n’oo? Wa n’anyô muetso tôngatandama va mbene aNzambé gôétsundédu n’edi.

¹¹ Matendeo MaNzambé matônigôa mbe: Kumu angô mbe: Ti gôndé me nandé na monyo ôdôô. Oma muetso angasiba mabongo maô va mbene ami. Môma na môma angakuméda ngudi yaNzambé n’ogi ôvôni.

¹² Vane wa n’anyô muetso tônganigôa Nzambé mane masô n’anyôene.

Nômbiakuéséda muana aTétee n’anyô môsi mbumu éaNzambé

¹³ Tôtsikéni eesédana wa n’anyôene na wa n’anyôene. Buedi gôévanga mbe: Me tsangeenda ébégô éngapôngéda môkasô na éngakuéséda angô gô mane masanyôngéô Nzambé.

¹⁴ Gôndé ane andé évambevo na Kumu Jésus-Christ, me Paul tsabômu mbe mabégô metso mava tsina mandéké mamagôgéani gamakanô mangô. Ivô te môma akoa mangô maka mevindô. Okô môma andé n’etasa mbe, ébégô édué ésanyepa, menya mbe gôndé angô ébégôe ésaba émagôgéani.

¹⁵ Okô ôbévéda muana aTétee n’oo gô éne éaa éwe, ôsamenya édigaa n’edi gô étondo éaNzambé. Ombiasinga môyakôe woo ôkeda môkoo gôébungana gôébégô Jésus amawa te gôndé môkoo.

¹⁶ Buéyé mbe gôndé ômuene ébégôe ésabéva, ômbieenda éangô kabaga akoo atsuava éwe gô eangô.

¹⁷ Okumu aNzambé ôsangono na môyakô na meba. Oôtéa mane. Mabégô mokumu aNzambé te metsimama, na magétabé, na magényonga meetsa Gédidi SaNzambé.

¹⁸ Okô ôyanzéa Christ gôémôgobeda gô mabégô mema, Nzambé anganyôngéô na akoo dôta angagôsénga ôséngu.

¹⁹ Tôéndékéni éne éndé kuanakue, buta mbe tôdigaa na gétabé na vitoo gôésipanédana gô mbumu éaNzambé.

²⁰ Ombiabunzéda éyanza éaNzambé gô gépede samôyakô. Na gô pie, môyakôe wetso ôndé te aakaga. Ivô éne éndé ébévani te gôékuéséda muana aTétee n’oo agô mbumu éaNzambé gô mabégô mabévani gô môyakô ôngaa éwe.

²¹ Ene éôtéa éamôsôba gôndé éwe, te mbe ôkina éaa nyama na ôkina ényua maduku na ôkina éetso éngoongôa ékuéséda muana aTétee n’oo na kabaga akuéa gékôba gôénika na gô ngima.

²² Ene émani éwe évamba na Nzambé gô ébégôe édué, kenea éangô ômuene, anye na Nzambé gô môtémoo. Ti gô gényônga géndé n’one aseesédu vatsundédu angô na môtémedi amuene.

²³ Ivô gôndé ône andé na paga gô môyakô ôaa angô, angeetsô ôési na Nzambé gôyééyi angô gô paga na gôpukanédi angô mane maNzambé na môyakô. Eetso éyanza môma na mitéma mibaé te éapaga, na te ébégô ébévani.