Romains 13 - New Testament in Mitsogo

Gobedani atômi atsenge

¹ Buedi mbe môma muetso agobede ane atômani gô tsenge édigaangô. Menyani mbe gôsaba ôtômue ôsaviga gôndé Nzambé. Na ane atômani ameetsô ôtômue waô, te na Nzambé.

² Gôndé ône akékôa atômie atsenge, akékôa ôtômue ômakônzéa Nzambé wa n’anyô oma. Môkékôene akôva ôési.

³ Endé te nane. Agobedi amitômamie miatsenge asaba na mikebanganô gôndé atômi. Ane andé na mikebanganô te ane akékôani. Ewe ôsanyôngéô édigaa na mikebanganô, buedi gôégobeda atômie na ôngakumédu.

⁴ Gôébégô atômie ayanzéa Nzambé vadékédangô éwe gô mane mabévani mbe ôénda mane mamisôba. Ivô ôkô ôyanzi ébégô ébévani, tatéa atômie. Gôébégô ngudiye disisédangô oma, kaka yanguene. Atômie ahyanzéa Nzambé gôétubéda oma ôpisa ôndé n’edi gôésiséda abévie.

⁵ Gôndé mabégô mabaé matinda môma gôégobeda atômie. Ebégôe éamapanga te kabaga akôva ôpisa aNzambé. Na ébégô éamôbaé te ganyôngéô môma édigaa, angô géesédu na muanga amôtémedi.

⁶ T’ebandô anye nôvana depuye yanyô. Nzambé amakônza ayanzie avôni gôébongo depuye n’ekena.

⁷ Vanakani mitete mindé n’anyô, môma te môma. Vanani depu gôndé môbongi adepu, na môtete gôndé môbongi amôtete. Vanani n’egobeda. Neegeda ône adigédiô gô gétungu sokumaka.

Nyôngéô môkoo

⁸ Nômbiasombonéa mitete, buétsé te môtete asô n’anyô ôvôni gôényônganéô wa n’anyôene na wa n’anyôene na étondo éapie. One anyôngéô môkedi amani égobeda migemie na mitômamie mietso miaNzambé.

⁹ Migemie miaNzambé midékéda mbe ômbiakea gésasô, na ômbiayôha, na ômbieesua, na ômbianyima sôma sagébé soo. Menyani mbe migemie mine na gôndé na miene, miwanya gô môtôma ôvo mbe: Nyôngéô môkoo ganyôngéô éwe ôtô omuene.

¹⁰ One anyôngéô akedi aseenda ahngô ébégô ébévani. Okô ônyôngéô akoo ômani égobeda migemie mietso.

Bakani kuanakue gôéenéa génikéô saChrist

¹¹ Oôtéani éénda nane gô ndéô nedué étôndéni. Timôgakani gô viovie vindé anye. Géôbogeo sasô n’anyô gésabadô gôdagôda gamabaka sangô vamasinga wa n’anyô. Géka vapévapé.

¹² Evitsi éapitsi éôta. Nyee ôgiia. Tôkinékéni mane mayanzô gô tsina evitsi. Tôaaténi ékeeyi éamigode gôégenya ébadi nyee ômaagiia.

¹³ Tôdigékéni gô ésima ésapenganani, wa n’anyô asi gô gévede. Tônôtôgéni gô évitsi na ésimee yedi éasagô, na édangi, na éagésasô, na éamasaganédana na éangusu.

¹⁴ Bandôa gô matambé na gô môtsé tôaatékéni monyo aKumu asô n’anyô Jésus-Christ gatôaata maduani. Nômbiasingana na manyima mabévani mayôtô yasô n’anyô gôédugéda mangô.