Romains 12 - New Testament in Mitsogo

Gôndé wene mônongo amonvo gôéyanzéa Nzambé

¹ Ana aTétee nanôduka mbe: Itsani anyene na gôndé Nzambé. Mbe yôtô yanyô dibaké ga digondoku didôngani dideekedu na gôndé Nzambé asakina yangô. Gô éne émayanzéa Nzambé wa n’anyô gô ngeba yedi, tônikédé éneegeda angô na yôtôye yasô n’anyô.

² Nômbiagésangana mônongo ôvo na ésima évo n’asi tsengene. Ivô tsikéani Nzambé anôkoa matasame mbe mapengana na mane mamabaka n’anye mbeego. Vane nôngamenya éne ényôngéô Nzambé gôndé anye. Te éne éamisôba, na mane meetsimama na masapengana na matasa medi.

³ Me Paul nanôongo ndongi yedi gô ngudi yamôgôô ômeetsô me na Nzambé gô ngeba yedi. Nômbiaba na nyemo gôéba n’etasa mbe: Me te môma môvôni. Môma na môma abangôé mbe ôkanee wedi te ngudiye dimeetsô angô na Nzambé gôémôétsa môtémee wetso gémôtsumé paga.

⁴ G’ôtô amôma gôndéké éeme éyekani. Géeme na géeme na sedi gébana.

⁵ Endé te nane. Wa n’anyô tôndé ôtô ôvo na Christ. Tôndéké éeme éyekani tômagésangana gôéduga ôtô ôvo. Na tôndé gôéyanza ngudi dipo.

⁶ Nzambé amatôétsa môma na môma wedi môgôô te ôbiia, mbe ayanzé na angô. Okô môvo va gatse awa n’anyô andé na môgôô gôépandôéda ndongi diviga gôndé Nzambé, buedi mbe apandôédéké te gamatômu angô na Nzambé na gandé angô gébé na paga gôndé Nzambé.

⁷ Na ône andé na môgôô gôéwedéa môkedi, awedéké. One andé na môgôô gôéékéda, eekédéké.

⁸ One andé na môgôô gôéongô akedi ndongi, oongéké. One andé na môgôô gôékaba ôkitie wedi, akabéké na môtémedi wetso gébé na ninga. One andé na môgôô gôétôma akedi, atôméké na gétabé. Na ône andé na môgôô gôémogeda na gôéwedéa ane andé gô maguga, eendéké na gényônga.

⁹ Etondo éndé n’anyô ébaké éagébé na buembe. Kékôani ébévee éetso. Nômbiaagana na mane mamisôba.

¹⁰ Bakani n’etondo gôndé anyene gandé ana aTétee ahndé n’enyônganéô évôni. Gobedanani anyene n’anyene na gényônga.

¹¹ Yanzani na ngudi gébé na gésima sadakadaka. Yanzéani Kumu Nzambé na môtéma amôkasa.

¹² Tsôkéakani môténdédee ôndé n’anyô. Bibédani maguga gôéenéa éne éngayanza Kumu. Vovoni na Nzambé gédundé.

¹³ Wedéani asi mbumu éaNzambé gô panda yaô. Keneani agenda na géneega.

¹⁴ Dukani Nzambé mbe eetsa mate gôndé ane akuana anye. Nômbiaduka Nzambé môkokou, nôduka te mate matévo.

¹⁵ Tsôkéakani n’ane atsôkéani. Déakani n’ane adéani.

¹⁶ Bakani n’evamba anyene n’anyene. Nômbiaba na nyemo gôéabatéda anyene ivô bandani buéyé na mayanza moma abobo. Nômbianyemôga gô éodoe éanyene.

¹⁷ Nômbiavénda môma ébévani gô éne ééndi angô anye ébévani. Indakani te mane mamisôba matévo gômbe oma angeena mônongoe wanyô.

¹⁸ Gô gésa sanyô, ôkô mbe nôngoongôa, digaani n’oma muetso na gétabé.

¹⁹ Wee yami, nômbianikéa événda ébégô édagani. Ivô nôtsika ébégôe g’ôpisa aNzambé amuene angayanza ganyôngéô angô. Matendeo MaNzambé matônigôa mbe: MeNzambé, te ône anganikéa événda ébégô édagani. Te me Kumu éanyô navéndéa anye.

²⁰ Matendeo MaNzambé moomba mbe: Okô môdudeone woo ookô nzaa, itsa angô môyakô. Okô ookô sôé, itsa angô meba. Na vane angooba na tsoyi gô mane mabévani meendi angô éwe.

²¹ Nômbiasinga mbe nôtsedu n’ebéva, ivô buedi mbe anye nôtseda ébéva gô ngudi yamane mamisôba mayanzanye.