Romains 10 - New Testament in Mitsogo

¹ Anee aTéta n’ami, éne éôkô me pepe tsôvé gô môtémami, na éné éndé na me géembemba gôéduka Nzambé g’ôsambô gôndé Ajuif, te mbe angoobou.

² Me Paul tsabômu mbe Ajuif andé na géviovio gôéyanzéa Nzambé. Ivô mayanzame maô te magô tsina evitsi, gémenyé éne éyanzahngô.

³ Ene édaga gôndé ahngô te gôsamenyahngô mbe Christ amawa gôétsimaméda ahngô va mbene aNzambé. Ajuif amakônza wene mônongo gôéahtsimaméda anguene. Ahmakina môngongoe ômakônzéa Nzambé ahngô.

⁴ Ene émakônza Nzambé te mbe Christ te gédugédéô samigemie na mitômamie mimeetsô Moïse gômbe muetso ane eetsa Christ mitéma miaô eenanô na Nzambé ti eembe asaba n’oési.

Géobogeo géndéké gôndé muetso eetsa Kumu Jésus mitémamie

⁵ Oôkôni éne ématenda Moïse gôndé ane akanéga égobeda mitôma na mige miaNzambé gôétsimamédu va mbene edi. Moïse mbe: One agobeda migemie, adige pitsi yetso te gô miangô.

⁶ Na ôôkôni dôta éne étôbeendu gôndé ane eetsa Nzambé mitéma miaô gébé na buétsé gôétsimamédu n’edi. Etendu mbe: Ombiatsuma paga ômuene gô môtémoo mbe ?ône angabata na g’ôba gôésutuméda Christ indaa?

⁷ Ombiatsuma dôta paga gô môtémoo mbe ?ône angasuma na gô tsina na gô tungu éane amawani gôébatéda Christ indaa?

⁸ ?Avovo nane gôndé? Oôkôni édué. Ogi ômeetsa Nzambé, ôndé vapévapé n’ewe, ôka gô mônyee woo na gô môtémoo. Ogie ône te meekédume matôékédani gôéétsa Nzambé mitémamie miasô n’anyô gébé na paga.

⁹ Okô éwe ônigôa akoo na mônyee woo mbe Jésus te Kumu éoo, na ôsatsuma ngudi yaNzambé paga mbe amakundua Jésus g’ôwa, éwe ôngoobou.

¹⁰ Gôébégô môma eetsa Nzambé môtémedi gémôtsumé paga, na Nzambé eena angô ti eembe asaba n’oési. Môma anigôa na mônyee wedi amuene na Nzambé amôoboo.

¹¹ Matendeo MaNzambé matônigôa mbe: Gôndé ône eetsa Nzambé môtémedi asangatsikô na tsoyi.

¹² Tambô gôndé Ajuif na ane asaba gô éongo éAjuif gôsaba éômbé ébaé. Kumune éaô te épo. Akaba mane medi mamisôba na gôndé muetso ahwesea na gôndé angô gôémôduka.

¹³ Te gatônigôu na Matendeo MaNzambé mbe: Muetso angabambéa ina aKumu Jésus angoobou.

¹⁴ ?Nayee angamôbambéa, gône atsuma angô paga¿ Angeetsangô mitéma miaô madeo ahsiôkô inedi, nayee¿ Angookô ahngô gébé na môma atsua angô tsangône gôémônigôa, nayee?

¹⁵ ?Tsangône énganigôganéô nayee? môékédi gékudégu na wangô. Te ganigôa Matendeo MaNzambé mbe: Matambé mayeta ône atsua Tsangô Eamôsôba éaGétabé saNzambé, manyepa.

¹⁶ Ivô kaka muetso amasinga Tsangô Eamôsôba éaJésus-Christ. Môpandôédi amatasa maNzambé, Esaïe ameevôa Nzambé mbe: ?Kumu ône ameetsa môtémedi gô meekédume masô, indaa?

¹⁷ Ekegea te nane. Môma eetsa môtémedi gétsumé Nzambé paga te gôôkô angô mane meekéduni. Mane meekéduni dôta te mangô mapandôéda mane mamavovo Jésus-Christ.

¹⁸ Ivô me Paul natsapéô. ?Tambô ahngô madeo asiôkô-a? Na gô pie amookô. Matendeo MaNzambé matônigôa gôndé eekédi mbe: Ogie waô ômookanô gô tsinane nyetso. Mavovia maô mamabuéa na gô tunguye yamakôdéô matsinane.

¹⁹ Me Paul nagéombaka étsapéô. ?Tambô ana aIsraël ahsinigôgéô-a? Amanigôgéô. Oôkôni éne émavovo Moïse. Angô mbe: Nôngooba na tsoyi gô éne éngayanza me, Nzambé n’avo oma asaba avôni na asamenyanganôni. Nongaba n’opisa gô éne éngayanza me n’oma abobo.

²⁰ Na Esaïe amaba na bôkédé gôénigôa mbe: Me Nzambé namadenganô na ane asikanégé ébuta me. Namatsutsuga gôndé ane asiduké me ébégô.

²¹ Ivô gôndé ana aIsraël amavovo mbe: Na pitsi n’omanda namakonyo mogome mami gôndé éongoe ésagobeda me na ékékôa me.