Philippiens 4 - New Testament in Mitsogo

Enyepa mbe nôénda mabégô mema

¹ Endé te nane, ana aTétee amôtéma, me nookô anye ti tsôvé. Gôébégô anye nôkasôgéda me. Me nanyemôga dôta gôndé anye na gényônga. Namani énônigôa gasipa môma gô monyo ôdigaangô na Kumu Jésus.

² Anye ageto abaé, Evodie na Syntyche, nanôtôma ivô tsatôma, nanôgondo te gondogo mbe, vambakani évambevo n’etasevo ga mônô na môdimi agô mbumu éaNzambé.

³ N’ewe môsi éyanzevo n’ami ôsiaagané n’ami gô éyanzee. Wedéa kadi yoo yagô mbumu éaNambé gôébégô ahmagenya ébadi évo n’ami gôétsanzabanéda Tsangô Eamôsôba. Na Clement te mônongovo, n’avo ayekani amayanza n’ami. Mina maô mandéké mamatendu gô môganda amonyo.

⁴ Gô ndéô yetso tsôkéakani gô éne éyanzéa Kumu Jésus wa n’anyô. Noomba énôtôma mbe: Tsôkéakani.

⁵ Buedi mbe émenyanganô na muetso gandéké anye gébé na nyemo. Kumu Jésus amahviga n’atsatsee.

⁶ Nômbiakebangana ta n’ebégôe. Ivô gô mabégô metso vovoni na Nzambé gôémôduka éne égômbéô anye. Vovoni n’edi na mitéma miagéneega na kuma.

⁷ Vane gétabé saNzambé, géne géôtéa pepe gétabé gémenya môma, génganôsuméda mitémamie na génganôsipéda édidie gôndé Jésus‐Christ.

⁸ Endé te nane, ana aTétee. Bakani matasa manyô metso gô mane mamisôba na gô mane makumédu na Nzambé, na gô mane mapie, na mane meegoba, na mane metsimama, na mane mamagôgéani, na mane manyônganéôni na gô mane mandé kuanakue.

⁹ Indakani na ngudi yanyô yetso éne émeekédu anye na éne émeetsô anye na me. Indani dôta éne émookô anye me nanônigôa, na éne émeenanye me neenda. Amuene Nzambé, Kumu agétabé angaba n’anye.

Paul amakuméda asi Philippes gô éne émeetsangô ôbiia

¹⁰ Gô ngudi yaKumu Jésus namookô gényônga gévôni gômawedéa anye me. Gô éne émeetsanye me, nômatubéda ganyôngéô anye me. Me tsangeenda mbe gô dipo ndéô nôsiôkô me tsôvé. Tsabômu mbe ndéône émabaka anye gékudégé me sôma te gôsibaké anye na sangô.

¹¹ Tsavovo nane tsangô mbe nandé gôébuta sôma. Nameekédu na Nzambé mbe nabaké na gényônga nabéyee na sôma, tsabéyee na sôma.

¹² Me tsabômu édigaa g’ôsuga. Tsabômu édigaa g’ôkiti. Nameekédu na Nzambé gôéba na môtéma ômasumani agébé na tsama gô tungu yetso na gô ndéô yetso. Nééyee, nabéyee na nzaa. Nangutéyee, tsangutéyee, ésaba ébégô.

¹³ Me tsadagéô na mabégô mema metso. Nandé gô mangô te gô ngudi yaChrist, ône oodedaka me.

¹⁴ Buéyé nane, nôéndi ti éamôsôba gôégésangana n’ami gô maguga mami.

¹⁵ Anye asi môsenge aPhilippes, nôsabômu gamabaka me vamanôtôga me gô Macédoine gô ndéône émabandôa we étsanzabanéda Tsangô Eamôsôba éaJésus‐Christ. Va gatse ambumuye yetso yaNzambé, te anye nômawedéa me. Te anye atévo nômabaka n’ami gôédiia na gôéétsa.

¹⁶ Buéyé vamabaka me gô Thessalonique te anye nômakudégéa mane mamabaka na me ôgômbô kuka dibaé ditatô.

¹⁷ Kaka mbe nabuta éetsô éôma ôbiia. Ivô nanyôngéô mbe anye nôséngu na Nzambé ôséngu veetsanye gébé na ninga.

¹⁸ Menyani mbe namani édiia te éetso émakudéganye ne éndé éetso émadugani. Vavigi Epaphrodite n’atsatsee na éne émeetsanye ôbiia, tsabutadô sôma. Mane meetsanye ôbiia, magono na ôgondoku ôbékuni. Mbôngane éedi éamôsôba ébutima na gôndé Nzambé éétsa angô môgangu. Ogondokue wanyô ôsingéô na Nzambé.

¹⁹ Nzambé, ône akuméda me, anganôétsa mane magômbéô anye mandéké g’ôkitie ôvôni ôkenea angô gô ina aJésus‐Christ g’ôba.

²⁰ Ondômbee wetso n’okumakee wetso ôbaké môbô na môbô na Tétasô n’anyô Nzambé. Amen.

Kômbôye yamôyusumédu

²¹ Kômbôani gôndé me gô ina aJésus‐Christ asi mbumu éaNzambé muetso. Ane aTétee andé n’ami éva anôkômbôa.

²² Asi mbumu éaNzambé muetso égô duégô, buéyé n’ane andé gô eba apene César gô Rome, anôkômbôa.

²³ Te mbe mate maKumu Jésus‐Christ mabaké gô mitéma mianyô muetso.