Philippiens 1 - New Testament in Mitsogo

Mikudéga na kômbô

¹ Oô te me Paul na Timothée tôndé ayanzie aJésus‐Christ, tônôkudéga gésangô gegé. Te gondé anye muetso asi mbumu éaNzambé nôndé gô môsenge aPhilippes, nômeetsa Jésus‐Christ mitéma mianyô gémôtsumé paga. Tônôtendéa dôta anye nôndé peeye na atômie agô mbumu éaNzambé.

² Tônyôngéô mbe Nzambé, Tétene éasô n’anyô na Kumu Jésus‐Christ anôétsa mate medi na gétabé sedi.

Osambô ômasambéda Paul gôndé oma aChrist gô Philippes

³ Gô mônongoe wanyô, me nakuméda Nzambé éami kuka yetso dibangôa me gandé anye.

⁴ Kuka yetso diteta me miname manyô g’ôsambô, namateta te na gényônga.

⁵ Gényôngage géne te gômawedéa anye me gôétsanzabanéda Tsangô Eamôsôba éaJésus‐Christ bandôa v’ebandô ngu na deo noo.

⁶ Me tsatsuma paga ta na pesu. Tsabômu mbe Nzambé, ône amabandôa n’eyanzee éamôsôba gô mitéma mianyô, asangeenzeegeda. Angeebôngaméda gôéemangôa nyoo ôngaviga Jésus‐Christ.

⁷ Gényôngage géôkô me gôndé anye, kaka sabobo. Géndé n’ebandô. Anye nôndé pepe gô môtémami gôébégô anye nômagésangana n’ami gésoo gévo gémeetsô me na Nzambé. Anye nôndé n’ami nane, buéyé mbe gandé me n’atsatsee gô eba atsôgôô, buéyé mbe gamabaka me gébé gô tsôgôô, namabaka gôésungéa na gôéékéda Tsangô Eamôsôba, n’anye nômabaka n’ami môtémovo.

⁸ Amuene Nzambé te mbangine yami asabômu mbe me tsapata veenda me anye mbe me nanônyôngéô ti na vitoone éangudi éviga gôndé amuene Jésus‐Christ.

⁹ Oôkoni éne évovo me na Nzambé gôndé anye. Namôduka mbe: Ah Nzambé, yanza mbe ényônganéô éaô évutuga na évunda. Yanza dôta mbe ényônganéô éaô ébaké na tsoongo. Tsoongone te vandé ahngô n’eodo éapie gôémenya ébandôe n’ekôdéôe éamabégô mapie. Naduka Nzambé te nane.

¹⁰ Namôduka dôta mbe nôngamenya ésevoa mane mamisôba na gôétsika mane mabévani. Te mbe nôngaba nômagôgéani, gébé na mabégô mabévani mamasuégu na buembe. Na nôsangeetsô ôési nyaa ôngaviga Christ.

¹¹ Osambôe wami te mbe mônongoe wanyô ôbaké ga géétété samôsôba gébôta miônda miedi miamisôba. Te mbe Jésus‐Christ, ône andé gô mitéma mianyô atsigédé ésimee éedi éamisôba gô môdigédie wanyô. Vane Nzambé angakumédu na géneegage setso.

Monyoe wasô n’anyô apie te Jésus‐Christ

¹² Ana aTétee n’ami asi mbumu éaNzambé, nanyôngéô mbe nônigôgéô ébégôe édué. Mane mamabuéa gôndé me masibévé bévaga. Ivô mamanyepa gômaweseda mangô Tsangô Eamôsôba éaJésus‐Christ gô mbene na gô mbene na gô dipo tungu.

¹³ T’ebandô, akasô muetso éva, buéyé na migode mikenea eba amôtômine atsenge, asabômu mbe me Paul nandé gô tsôgôô gôyanza me Christ, ône amasevou na Nzambé.

¹⁴ Buéyé n’ana aTétee amootéa éétsa Kumu Jésus mitéma miaô gémôtsumé paga, te vameenahngô me nandé gô tsôgôô. Vane bôkédée waô ômoomba ékôndama gôénigôa Mane Mamavovo Nzambé gébé na gomo.

¹⁵ Na gô pie va gatse eekédie gôndéké avo andé gôénigôa Tsangô éaChrist gô tsingayi éangusune éenangô me. Ivô gôndé ayekani eekéda na mitéma miagényônga.

¹⁶ Ahngô eekéda gôébégô anyôngéô éwedéa me gô éyanzee évôni émeetsô me gôésungéa Tsangô Eamôsôba éaJésus‐Christ.

¹⁷ Géé avo, andé gôéékéda mabégô maChrist te gandé matséva gôéénda tsaé n’akaô. Ahngô anyôngéô ékôndéga panda yami na pieviane éôkô me gô môtéma gôndé me gô eba atsôgôô.

¹⁸ Ebandôe ékeangô éékéda ényepéyee, ésanyepéyee mbôôkô. Eekédéké. Tsangô éaChrist énigôganéô gô minongo mietso, na me neena te gényônga. Tsangatsika étsôkéa.

¹⁹ Tsabômu mbe gô ngudi yadisambô divovo anye na Nzambé gôndé me, na gô ngudi yaGédidi gémeetsô wa n’anyô na Jésus‐Christ, mabégôme metso makoga maka mamisôba gôndé me.

²⁰ Ekegea te nane. Tsoongone éami te Christ, ône eenéa me mbe angaviga. Namôenéa na môtéma agébé na gomo na gébé na tsoyi. Nandé deo noo gamabaka me na mbeego na môtéma ômasumani gébé na buétsé, ônyôngéô mbe ôkumaka aChrist ôenanô gô ôtôe wami, nawéyiee, tsawéyiee.

²¹ Menyani mbe monyoe wami te Christ. Owee wami te tsoongo gôéômba ékôndéga me mane mamisôba.

²² Ivô mavooe ényepa gôndé me gôéomba édigaa gô monyô ôtôndéni ôdôô, buta mbe namangôa dôta évo éyanza éndé na tsoongo. Na gôéwa, na gôédigaa gô monyoe ôdôô, me tsangamenya éne étéka me.

²³ Gôndé me ébégôe éndé te gésa ômbôe, gésa viangavie. Nanyôngéô énôtôga gô tsina nedué nakedigaa na Jésus‐Christ. Ene te éne étéka me pepe.

²⁴ Ivô gôndé anye, éôtéa ényepa mbe noomba édigaa n’otôe ôdôô va gatse anyô.

²⁵ Gô éne, me tsaba na buétsé tambô namenya mbe tsanganôtôga n’atsatsee. Nangoomba édigaa va gatse anyô gôénôwesedéa na gényônga na gô mbene anzéane éaJésus‐Christ étôkéani édué.

²⁶ Vangeenanye me, môékédine wanyô nanika édigaa va gatse anyô, genyôngage sanyô géngakôndama gôékuméda Jésus‐Christ.

²⁷ Eébéyée nane, digaakani na môdigéô ôsapenganani na Tsangô Eamôsôba éaJésus‐Christ. Navigéyee gôénôena, tsavigéyee nangookô mbe: Ahndé muetso na étasevo gôésipa ti v’ekôdéô, éesipa. Gô ébadi égenyuni, andé muetso na môtémovo gôétseda paga, buta mbe Tsangô Eamôsôba éaJésus‐Christ édiia.

²⁸ Nômbiasinga adudeoe wanyô anôétsa gomo. Bôkédee wanyô te gémbégéa gétubéda mabégô mabaé. Gôndé adudeoe wanyô gétubéda mbe ahkea te gô nzéa éebungana. Gôndé anye gétubéda mbe nôkea te gô nzéa éagéobogeo. Gémbégéage sanyô sabôkédé géviga te gôndé Nzambé.

²⁹ Bangôani mbe Nzambé amatôétsa ébégô évôni ôbiia, te gôéyanzéa Jésus‐Christ. Tômamôyanzéa gô minongo mibaé. Oô mônongo te gôémôétsa mitémamie gébé na paga. Oô mônongo dôta, te gôétubédu gékuanô gô inedi.

³⁰ Deo noo nôndé gôégenya ébadi évo n’ami te éne éagékuanô. Ebadie te éne émagenya me na mbeego na égenya me deo noo gasabômu anye.