Mayanzame 9 - New Testament in Mitsogo

Saul amakoga gôésinga Jésus (Bono na 26:12–18 )

¹ Tambô gô ndéô nene, Saul asitsiké ékuana aneengi aKumu Jésus ngu na gôéyôha ahngô. Amakea na gôndé pene adeekedi adigondoku.

² Amamôduka ésangô étubéda mbe: Odôô te Saul, vambanani n’edi gô yeba yanyô yewanyéô gô Damas. Na ésangôe éne, Saul ameetsô ôtômu gôétsôpa gô yeba yewanyéô yAjuif, amôgôô n’ageto akea nzéepo na Kumu Jésus. Aahtsôpa mbe akea n’ahngô na gô Jérusalem gôétsundéu.

³ Saul amakea na gô Damas. Amabaka aka gôpépôpé gôétsiga na gô môsenge ône. Tsina na tsina gévede gémaviga g’ôba gématana gô kôbangô edi.

⁴ Amamesegea na va tsina. Amookô ôgi ômatsundéda angô mbe: Saul. ?Saul, ôkuana me gôndé?

⁵ Saul amaabéa mbe: ?Kumu éwe ndaa? Ogie ômapandôéda mbe: Ewe Saul ôndé gôékuana me. O te me, Jésus.

⁶ Timôgaka. Tsigaka na gô môsenge. Gône ôngakebeendu éne éngeendewe.

⁷ Avo amôgôô amakea na Saul gôémôveegeda gô Damas, ahmasikama géôngôé évovo. Amookô ôgie ômavovoni, ivô asiene môma.

⁸ Saul amatimôga vamabakangô va tsina. Amapôa misome ivô asiene ta na sôma. Akedi amamôtsôpa gô mogome gôékea n’edi na gô Damas.

⁹ Gô pitsi ditatô amabaka na pogu. Asiôngôé éaa môyakô, na asiôngôé ényua.

¹⁰ Gô Damas gômabaka môneengi môvo amômôgôô inedi Ananias. Kumu Jésus amatsutsuga vandé angô gô ndoti na amamôbambéa mbe: Ananias. Angô te aabéa mbe: Me nangôô Kumu.

¹¹ Kumu amamôtôma mbe: Kiaka n’atsatsee gô nzéa ééndô mbe Droite. Gô eba ôdigaa Judas, ôbambéa mômôgôô eendô mbe Saul, môsi Tarse. Angô n’atsatsee andé gôévovo na Nzambé.

¹² Gô ndotine émeenangô, ameena mômôgôô eendô mbe Ananias aviga gôétsakéga angô mogome mbe miso medi moomba éénéa.

¹³ Ananias amatsunda na Kumu mbe: Ivô Kumu, oma ayekani amanigôa me mane mamômôgôô nône. Me tsabômu mane mabévani metso mameendangô omee woo gô Jérusalem.

¹⁴ Me namookô mbe atsigi gô môsenge ôdôô na ényangee évôni émeetsô angô na tsesuye yadeekedi adigondoku. Enyangee te gôétsôpa muetso ane ateta inee éoo.

¹⁵ Ivô Kumu amamônikéda mbe: Kiaka. Te me namasevoa mômôgôô nône. Nangayanza n’edi gôémenyeda inami gô tsengeye yetso madeo disookanô éangô. Atômi aô angookô. Oma aIsraël angookô te n’edi.

¹⁶ Memuene nangamôtubéda éetso éngeenangô maguga gô inami.

¹⁷ Vane Ananias amakea. Amatsiga gô eba aJudas na amatsakéga Saul mogome. Amavovo n’edi mbe: Saul, éwe te muana aTétee n’ami gô mbumu éaNzambé. Kumu Jésus, ône amatsutsuga gôndé éwe vamavigewe gô nzéa, atômi me na gôndé éwe, buta mbe misome moo mapôga na mbe Gédidi SaNzambé géyuéséda môtémee woo.

¹⁸ Tsina na tsina gômaaga sôma gô miso medi géndé ga magagôa. Na Saul ameena. Amatimôga na ameetsô bateme.

¹⁹ Na vane amaa môyakô. Na ôtôe wedi ômadiia ngudi. Saul amadigaa dipo pitsi n’aneengie gô Damas.

Saul ameekéda gô Damas mane mamavovo Nzambé

²⁰ Asidingé éengéa na gô yeba yewanyéô gôéékéda mbe: Jésus te Muana ANzambé.

²¹ Muetso amookô gameekédangô ahmatsapéô. Ahmasôbasôbana mbe: ?Oô ka te ti ône amakuana gô Jérusalem ane amabambéa ina aJésusa? ?Tambô angô asivigé n’egô gôétsôpa ane ameetsa Jésus mitémamie-a? ?Na gôékeda ahngô na gôndé tsesu yadeekedi adigondoku-a?

²² Vane ngudi dimabaka na Saul gôéékéda dimakôndama ti kôndama. Ajuif amadenganô gô Damas asibédô na ngudi yetsuma ébégôe paga vamanigôa angô mbe: Jésus te Christ, ône amatômu na Nzambé.

²³ Vamoota dipo pitsi, Ajuif amadigaa gô kundu gôévanga gépangô gôéyôha Saul.

²⁴ Ivô éne émavovo ahngô gô gépangô saô, Saul amayetédu éangô. Diômbaye yagô môsenge dimakenéôkô yetso na pitsi n’omandee gôébénga émôyôha.

²⁵ Aneengie amabaka na Saul amamôwedéa na pitsi gôémôkôndéda môgômbe amôsenge. Amamôsutuméda gô gésambi.

Saul amabuéa gô Jérusalem

²⁶ Saul amanika na gô Jérusalem. Vamatsigangô amanyôngéô évamba n’aneengie aJésus. Ivô muetso ahmeena angô gomo. Ahmatsuma paga mbe: Mavooe asikogé na gô pie môneengi n’asô.

²⁷ Vane Barnabas amakea n’edi na gôndé ane amatômukuni. Amanigôa ahngô muetso mbe: Gômakea Saul ôdôô gô nzéa ameena Kumu Jésus. Kumu amavovo n’edi. Bandôa ndéô nene asatsika éékéda ina aJésus na bôkédé gô Damas.

²⁸ Bandôa nyoone, Saul amavamba n’aneengie. Amakénga na Jérusalem nyetso gôéékéda na bôkédé gô ina aKumu Jésus. Ameetsa môtémedi wetso gô éne émeekédangô.

²⁹ Amanigôana n’Ajuif, ane amavovo ôgi aGrec. Ivô omee ane amabuta émôyôha.

³⁰ Vamookô ana atétee n’edi agô mbumu éaNzambé ébégôe éne, amaveegeda Saul na gô Césarée gôémôkeda na gô Tarse.

³¹ Gô tsengeye yaJudée na Galilée na Samarie, asi mbumu éaNzambé amabaka gô gétabé. Amasipa na ahmoodo gô mabégô manzéa éaKumu Jésus. Ahmakea na gô mbene gômookô ahngô Kumu Jésus gomo. Gô ngudi yaGédidi SaNzambé ôtangôe waô ômakôndama te kôndama.

Enée amadôngédu

³² Pierre amaseta tsengene nyetso. Nyovo amabuéa gôndé ane ameetsa Jésus mitéma, ahdigaa gô mbôka étetu mbe Lydda.

³³ Gô Lydda amadenga mômôgôô amakata éeyo, inedi Enée. Amabaka yama v’ekoko te aka mipuma génana n’ebeea éne.

³⁴ Pierre amavovo n’edi mbe: Enée, menya mbe Jésus-Christ agôdôngédi. Timôgaka. Kônzaka ékokoe ébaki éwe. Tsina na tsina Enée amatimôga.

³⁵ Asi Lydda muetso, n’asi gô géndamba gééndô mbe: Saron, ameena éne émabuéani na amakoa matasame gôéétsa Kumu Jésus mitéma miaô.

Dorcas amakunduu g’ôwa

³⁶ Gô môsenge aJoppé gômabaka g’ôtangôe aneengie môgeto inedi Tabitha. (G’ôgi aGrec te Dorcas. G’ôgi aGétsogo te Tsetsi.) Amayanza na pitsi n’omanda gôéénda akedi mabégô mamisôba, na gôéwedéa misuga.

³⁷ Nyovo amabaka n’ebeea na amawa. Akedi amamôôvôa ôtôe na amamôvumba gô môgényé agô ngongo eba.

³⁸ Aneengie aJésus asi Joppé amookô mbe Pierre aka gô Lydda, mbôkane ésatongonéa na Joppé. Amatôma oma abaé na môkudéga mbe: Kokooye éwe Pierre, yavôga éviga na gôndé we égô.

³⁹ Pierre amayavôga ékea na ane amaviga na môkudégee. Vamatsigahngô gô Joppé amakea na Pierre na gô tsongone éagô ngongo eba. Mikué muetso amaweséa na vandé Pierre ahdéa. Agetoe ane ahmamôtubéda édénga na ngoyiye dimatuba Dorcas vamabangô agédôngaka.

⁴⁰ Pierre amapatsa oma muetso mbe: Kusani. Amasiba mabongo medi gôévovo na Nzambé. Amagéngôga gôébono nzumbine na amamôénda mbe: Tabitha, timôgaka. Môgetone amapôa misome. Vameenangô Pierre, amadigaa.

⁴¹ Pierre amamôtsôpa g’ôgogo na amamôwedéa gôétema môtie. Pierre amabambéa ane ameetsa Jésus mitémamie mbe: Ingéani. Nôeni gôkundugi môkanyô.

⁴² Ebégôe émookanô môsenge wetso aJoppé. Ayekani ameetsa Kumu Jésus mitémamie gébédô na paga.

⁴³ Pierre amoomba édigaa pitsi diyekani gô Joppé. Amadigaa gô eba amômôgôône eendô mbe Simon. Angô te môgémbi egôbôkô éanyama.