Mayanzame 7 - New Testament in Mitsogo

Etienne amanigôa

¹ Pene adeekedi adigondoku ameevôa Etienne mbe: ?Ene évovi akoo te na gô pie-a?

² Etienne amasiia mbe: Anye tétee yami yami na aneya, ôôkôni édué. Nzambé, Kumu ondômbee wetso amatsutsuga na gôndé tétasô Abraham vamadigaangô gô Mésopotamie. Te angô madeo asitôta na gô Charan.

³ Nzambé amavovo n’Abraham mbe: Tôta gô tsenge nedué émabôtu éwe. Nôtôga va gatse ambumune éoo. Kiaka na gô tsengene éngagôtubéda me.

⁴ Abraham amatôta gô tsenge émadigaa Achaldéen na amakea gôédigaa gô Charan. Na vamawa tétene éAbraham, Nzambé amatimôa Abraham gô Charan gôébuéa gô tsengene étôdigaa deo noo.

⁵ Gône Nzambé asimôetsé ta na vipesu viatungu gôédugu éyeta buéyé ôkôdôe wedi. Ivô Nzambé amavangana na Abraham mbe: Tsenge nedué éngaba te yoo. Anoo angadigaa gô yangô. Ahngô angaba kumuye va ngimoo. Tambô gô ndéô nene Abraham te madeo asibôta muana.

⁶ Oôkôni éne émavovo Nzambé n’edi. Angô mbe: Anoo angadigaa gô tsenge éogenda na angakoga avéga. Angaba gô tsina amaguga gô mikama minayi miema.

⁷ Nzambé amavovo mbe: Ivô me nangatsundéda tsengene édigaahngô g’ôvéga. N’ahngô angatimôga wangô gôéviga n’eva gôéneegeda me.

⁸ Vamamana Nzambé évangana na Abraham amamôtsika na gémbégéa sovangee. Gémbégéage te gégeetéô samôgôô. T’ebandô Abraham amageeta muanedi Isaac vamabaka angô agébaka muana avembo apitsi tsambué. Isaac dôta amageeta Jacob. Na Jacob amageeta anedi nzima n’abaé, te peeye yasô n’anyô.

⁹ Peeye yasô n’anyô ane, amawéea muanayaô Joseph ngusu. Amamôsômbéda g’ôvéga gô Egypte. Na Nzambé amakenea Joseph.

¹⁰ Nzambé amayuua angô gô panda yedi. Amawedéa Joseph gôényônganéô na kooko edi. Na amamôétsa éodo vamatema angô va mbene aPharaon, môtômi aEgypte. Kooko edi ameetsa Joseph ényanga gôétôma gô Egypte na gô ebee wetso amôtômine va kôbangô amuene Pharaon.

¹¹ Vamabôka nzaane gô tsengene nyetso éEgypte na éne éaCanaan, oma ameena panda. Peeye yasô n’anyô asienedô môyakô.

¹² Vamookô Jacob mbe: Gô Egypte gôndéké môyakô, amapanga ékudéga anedi, te peeye yasô n’anyô na gône.

¹³ Vamabuéa ana aJacob kukane éamôbaé gô Egypte, Joseph amamema mbe: Me te muanayanô. Te vamookô Pharaon mbe Joseph andé na mbumu éedi.

¹⁴ Vane Joseph amakudéga gôéwanyéda tétedi Jacob, na mbumu éedi muetso. Otangôe waô te nzima tsambué n’oma atayi.

¹⁵ Vane Jacob amakea gôédigaa gô Egypte. No amawa te wangô. Na peeye yasô n’anyô dôta amawa te wangô.

¹⁶ Nzumbiye dine dimatsuaô na gô Sichem. Na dimagunyu gô ngiine éamôdungutu émasômbaka Abraham gôndé ana aHémor, asi Sichem.

¹⁷ Ndéône émawesea mbe Nzambé angadugéda éne émavangana angô na Abraham. Ana aIsraël amabôtana na amayeka gô Egypte.

¹⁸ Gô ndéô nene gômaviagana muene môtômi gô Egypte. Angô asimenyanganô na Joseph na asimôbangôé.

¹⁹ G’ôtômu edi amabôméda omasô n’anyô na amakuana peeye yasô n’anyô. Amatindahngô mbe anee waô ageage ayôhu.

²⁰ Ndéô nene te éne émabôtu Moïse. Amabaka muana amôsôba na amanyônganéô na Nzambé. Amanyuésédu gô eba atétedi ngonde ditatô.

²¹ Vamatsikô angô gô mbéyi, muana amôgeto aPharaon amamôinôa na amamôbôngôa ti eembe te muanedi.

²² T’ebandô Moïse ameekédu mabégô metso masibômu asi Egypte. Amakoga aka môma môvôni angudi gô mavoviame na gô mayanzame.

²³ Vamabaka Moïse aka na nzima dinayi yamipuma amaseta tsengene gôéena ana atétee n’edi ana aIsraël.

²⁴ Ameena Môégyptien, kumune andé gôébita môvéga, muana atétee aMoïse. Gôésungéa ône amabitôkôni na gôémôvéndéa, Moïse amayôa Môégyptien.

²⁵ Amamenya mbe anee atétee n’ami anganyôngéô na angatsôkéa me mbe: Mooboyi asô amakudégu na Nzambé gôékuséda we g’ôvéga. Tambô. Ana atétee n’edi ana aIsraël asimenye nane.

²⁶ Ovo enyaa ône. Moïse amadenga ana aIsraël abaé agenya. Amakanéga étunga ahngô mbe: ?Wee yami, anye nôndé ana atéta nôgenya nane nayee?

²⁷ Ivô ône amabaka gôébômôa môkedi amapatséda Moïse mbe: ?One amasevoa éwe gôéba môtômi asô na gévovi sasô indaa?

²⁸ Onyôngéô éyôha me gayôhi éwe kôdôtsé Môégyptien-ma?

²⁹ Vamookô Moïse môkedi avovo nane, amabusuga na gô tsenge ééndô mbe Madian. Amadigaa wangô. Gône amabôta anamôgôô abaé.

³⁰ Vamoota nzima dinayi yamipuma Moïse amabaka agébaka gô tsenge émagasani vapévapé na môkôdi ôéndô mbe Sinaï. Môsi g’ôba amavigédu na Nzambé gôévovo na Moïse. Amatsutsuga va egega agéétété émayôa ga soto.

³¹ Moïse amatsapéô gô gétsutsuku gémeenangô. Amawesea gôébono gamayôa géététége sangô gégôgé. Na amookô ôgi aKumu Nzambé ôbeenda mbe:

³² Me te Nzambéne éneegedu na peeye yoo. Me te Nzambé éneegeda Abraham, na Isaac, na Jacob. Moïse amatatéa na gomo na asiyeegedô ébono géététége.

³³ Kumu Nzambé amavovo n’edi mbe: Sasa ponduye yoo. Totone éndé éwe môtie éne, te tungune édigaa amuene Nzambé n’atsatsee.

³⁴ Me Nzambé, neena maguga momami andé g’ovéga gô Egypte. Nookô mindônga miaô. Nasutuméyi g’ôba gôéoboo ahngô. Wesea n’eva, nagôétsa ényanga gôékea na gô Egypte.

³⁵ Moïse ône, te ône amapatsô v’ebandô na akedi ana aIsraël vamavovo ahngô mbe: ?One amasevoa éwe gôéba môtômi asô na gévovi sasô indaa? Nzambé amamôtôma gôéba môtômi na mooboyi ana aIsraël nyoo ômavigédangô môsi g’ôba gôévovo n’edi gô géétété gémayôa ga soto.

³⁶ Te Moïse amakuséda oma aIsraël g’ôvéga gô Egypte. Amayanza mabégô manyônganéôni masoongôa môma ésupua na émbégéa éangudi yaNzambé gô tsenge nene. Ameeyanza va mubu ôéndô mbe Rouge, na gô tsenge émagasani émakéngahngô nzima dinayi yamipuma.

³⁷ Te amuene Moïse amavovo n’ana aIsraël mbe: Nzambé anganôkudégéa muene môpandôédi amatasa medi angaba gandé me, Moïse. Angaba éongo évo n’anyô.

³⁸ Bangôani mbe Moïse te ône amakénga na omee asô n’anyô gô tsenge émagasani. Amabaka na peeye yasô n’anyô. Amabaka gékambi va gatse ana aIsraël na môsi g’ôba amavovo n’edi gô ngongo amôkôdi aSinaï. Ameetsô na Nzambé mabégô mavôni matôétsa monyo, na amatsika mangô gôndé wa n’anyô.

³⁹ Ivô peeye yasô n’anyô asinyôngéô égobeda Moïse. Amamôkékôéa. Mitéma miaô mimanyima mane maEgypte.

⁴⁰ Ahmavovo na Aaron mbe: Vandéa we mbumbane éngakénga n’asô gôétévéda we nzéa. Géé Moïse, ône amakuséda we gô Egypte, gôkeyi angô tôsamenya, na ndéône énganikangô na gôndé we, tôsamenya.

⁴¹ Peeye yasô n’anyô amavanda gégoni sapagasa na amadeekeda digondokuye yaô gô mbumba nene. Amatsôkéa éne émavandahngô na mogo maô.

⁴² Nzambé amagéngôga gôéviia omee ane ngima. Amatsika ahngô gémôanza gôéneegeda minangamie gamanyôngéô ahngô. Apandôédi amatasa maNzambé amatendéa wa n’anyô éne émavovo Nzambé mbe: Anye omee aIsraël Digondokuye dimadeekedanye nzima dinayi yamipuma gô tsenge émagasani ?Nômadideekeda te me-a?

⁴³ Aé, nôsidideekede me. Anye nômatsua eba ambumbane éanyô ééndô mbe Moloch. Nômakénga na gégoni samônanga ôndé gémbégéa sone amaneegeda anye eendô mbe Réphan. Mbumbaye dine nômavanda yangô te gôédineegeda. T’ebandô nanganôkeda na gô tsenge éagôdagoda éôtéa étongonéa ne Babylone.

⁴⁴ Gô tsenge émagasani, peeye yasô n’anyô amabaka na eba agébandé ômakeneangô mataé mabaé mamatendu migemie miaNzambé. Eba ômayanzô gamatôma amuene Nzambé atôma Moïse mbe: Nôsaa eba te ga gégonige gématubéda me éwe.

⁴⁵ Ahmatsikanéa ebee agébandé ône na anee waô ngu na gô ndéône ématômu ahngô na Josué na gô tsenge émeetsô angô na Nzambé vamapatsangô ane amadigaa wangô. Ebee ône ômadigaa ngu na gô ndéône ématôma David éongo éaIsraël.

⁴⁶ David amaduka Nzambé mbe: Ewe te Nzambé éneegeda téta Jacob. Singa me nagôséa eba ôngadigaa éwe.

⁴⁷ Ivô te Salomon, muana aDavid amaséa Nzambé ebee.

⁴⁸ Môpandôédi amatasa maNzambé amavovo mbe: Nzambé Amôbô na Môbô, ône asaba na gégoni asadigaa gô yeba disaa oma. Môpandôédi amoomba mbe:

⁴⁹ Nzambé amavovo mbe: Gédigaa sami te gô ngongo g’ôba. Gétukéô samakôdô mami te tsinane. ?Anye oma nôngaséa me eba amônongo ndé? ?Me nangoongôa édigaa gôédunda tungu ndé?

⁵⁰ ?One amavanga na amakana éetso éenanôni kaka memuene Nzambé-a?

⁵¹ Vane Etienne amabono ane amadenganôni. Na angô mbe: Ah anye oma akéndé. Mitéma mianyô mindé na bôpeeo na matôme manyô makina mbééane ébambéô anye na Nzambé. Nôkékôéa Gédidi SaNzambé mbe gésayanza gô mitéma mianyô. Anye nôgono na peeye yanyô.

⁵² Apandôédi muetso amatasa maNzambé amakuanô na peeye yanyô. Amayôha ane ameevéda gévigéô sone amatsimamani. N’atsatsee te anye nômakaba na nômayôhéda angô, ône amatsimamani avigini.

⁵³ Môsi g’ôba amavigédu na Nzambé gôénôétsa ndongi na mige na mitôma miaNzambé. N’anye nôkina émigobeda.

Etienne amawa

⁵⁴ Asi kundu épôni éAjuif ahmakambôga vamookô ahngô mane mamanigôa Etienne. Ahmagéa ngeko g’ôpisee ômookô ahngô.

⁵⁵ Gédidi SaNzambé gémayuéséda pepe môtéma aEtienne. Amabôkaméa miso medi. Ameena ôbébayi ôtubéda ôndômba aNzambé. Ameena na Jésus andé môtie gô géeyo gémôgôô saNzambé.

⁵⁶ Etienne amavovo mbe: Oôkôni édué. Me neeni ôbee ôkukugi. Neeni Jésus, Muana Amôma andé môtie gô géeyo gémôgôô saNzambé.

⁵⁷ Amôgôôe ane amaamugana mindônga miopisa, na ameebéda matôme maô mbe: Ombiavovo nane. Ahmakumbuga na amamôkakaméa gôétsôpa Etienne.

⁵⁸ Ahmamôtsua na gô étumba éambôka. Na ahmamôtuma na mataé gôémôyôha. Atubie ebégôe amanôtôa ngoyiye dipôni na amadivumba vandé mômôgôône atetu mbe Saul, mbe akenea yangô.

⁵⁹ Vamabaka Etienne andé gôétumu na mataé, amavovo na Nzambé mbe: Kumu Jésus, maa — bongo gédidi sami na gôndé ômuene.

⁶⁰ Amaaga masibabongo. Amaadôngana mbe: Kumu ami, gô ébégô édué ébévani éénda adua, ômbiétsa ahngô ôési. Vamamanangô évovo nane, amawa.