Mayanzame 5 - New Testament in Mitsogo

Ebégô éaAnanias na Saphira

¹ Gômabaka mômôgôô môvo inedi Ananias. Môgayedi te Saphira. Ahngô abaé amavanga gôésômbéda tsagane yaô.

² Ivô amasuéga ôvo ôkabô amanyiva. Môgayedi asibômu. Ene émasanéakani amakea gôédeekeda ane amatômukuni.

³ Pierre amavovo n’edi mbe: ?Ewe Ananias ôsingi Satan atôma môtémoo gôépatéa Gédidi SaNzambé nayee? ?Osuégi ôvo ôkabô adode dimakusa gô tsaga yanyô nayee?

⁴ Tsagane madeo ôsisômbéda yangô émabaka te yoo. Gômasômbédewe yangô, dodeye dibaki te yoo. ?Nayee ôvangi gô môtémoo mbe: Me nangeenda te nane? Osipatéa môma. Opatéyi te Nzambé.

⁵ Vamookô Ananias mabégôme mane amamesegea na amawa. Muetso amookôni amatatéa na gomo.

⁶ Minzambu amaviga na amamôdipa na môkanda. Amamôtômba na amamôgunya.

⁷ Vamoota pesu andéô, môgayedi Saphira amaviga. Asimenya éne émabuéani.

⁸ Pierre amavovo n’edi mbe: Beenda me ?Nôsômbédi tsagane te ôsunue ôdôô-a? Angô amaabéa mbe: Ii, ôsunue te angôône.

⁹ Pierre amamôévôa mbe: ?Anye abaé nômavanga gôékanéga Gédidi SaNzambé nayee? Oeni, ane agunyi mômioo andé v’ombaa. Avigi gôégunya n’ewe te mônongovo.

¹⁰ Tsina na tsina môgetone amamesegea va makôdô maPierre na amawa. Minzambu ameengéa na amamôdenga te amawa. Amamôtômba na amamôgunya gô ngii va kôbangô amômiedi.

¹¹ Asi mbumu éaNzambé muetso n’ane amookô mebégô mema amatsôpu na gomo ôvôni.

Embégéa éyekani éangudi yaNzambé émeenanô

¹² Ane amatômukuni amayanza va gatse oma émbégéa éyekani éangudi yaNzambé na mabégô mayekani mamisôba masoongôa môma ésupua. Ane ameetsa Jésus mitémamie amaduga muetso va komo ééndô mbe Salomon.

¹³ Gôsibé muene môma amakea gôétema vavo n’ahngô. Buéyé nane, muetso ahmagobeda ane ameetsa Jésus mitémamie.

¹⁴ Géômbé gévôni samôgôô n’ageto ameetsa Jésus mitémamie gébé na paga gôévamba n’asi mbumu éaNzambé. Na amoomba ékondama ôtangôe waô.

¹⁵ Oma amatsua abeeyi aô na gô kôbangô anzéa. Amayaméda ahngô gô ékaka na gô étava gômbe vangoota Pierre gô nzéane n’omanda, gédinadina sedi géngagônga avo abeeyie.

¹⁶ Oma ayekani amaviga gô dipo mbôka disitongonéké na Jérusalem. Amatsua abeeyie na ane amayungédu na édidi ébévani. Muetso amadôngédu.

Ane amatômukuni amatubédu gékuanô

¹⁷ Vane pene adeekedi adigondoku na géômbé sAsadducéen ahmeena ane amatômukuni ngusu. Ahmavangéa ahngô gépangô.

¹⁸ Ahmatsôpéda ane amatômukuni na ameengéda ahngô na gô eba atsôgôô.

¹⁹ Na pitsi nene, môsi g’ôba amavigédu na Kumu Nzambé amasuma g’ôba na amakukua eba atsôgôô gôékuséda ane amatômukuni. Angô mbe:

²⁰ Kiakani. Nôketema gô eba aNzambé. Nôkeékéda oma gakegea monyo aNzambé gô mitéma mioma.

²¹ Ane amatômukuni amamookéô. N’ongôngô na kué, ahmakea na gô eba aNzambé na ahmeekéda. Pene adeekedi adigondoku n’ane ahmabaka n’edi amakôva peeye yetso yAjuif gôédigaa gô kundu épôni. Vane ahmakudéga môma na gô eba atsôgôô gôéwanyéda ane amatômukuni.

²² Vamatsiga migode gô eba atsôgôô, asidenge ane ameengédukuni. Amanika na gôndé ane amadigaa gô kundu gôéahnigôa mbe:

²³ Tômadenga eba atsôgôô ômabandéku ti v’ekôdéô éabandéka. Tômadenga na migodemie mindé môma na môma va sedi gétungu gôékenea dikukéye. Géé, vakukui we ebee tôsidenga wangô ta na môma.

²⁴ Vamookô môtômi amigode mikenea eba aNzambé, na dôta tsesu éadeekedi adigondoku ookô ébégôe éne, amatsapéô mônongoe ômakusa omee ane. Amasôbasôbana gô mitéma miaô gamoota ébégôe éne.

²⁵ Na vane môma amaviga gôébeenda ahngô mbe: Akasô, me neeni omee ane eengédiki anye gô eba atsôgôô, andé gô eba aNzambé na eekéda oma.

²⁶ Môtômine amigode, amakea na migode miedi mikenea eba aNzambé, gôébongo ane amatômukuni. Ahsitsôpé ahngô na ôpisa. Ivô amahvooto te vootogo, kabaga oma amabaka gôéôkô meekédume ahtuma migode na mataé.

²⁷ Migode ahmabuéda ane amatômukuni na va mbene asi kundu épôni éAjuif. Pene adeekedi adigondoku amatsundéda ahngô mbe:

²⁸ Tômadékéda anye na môge mbe: Nômbiekéda gô ina amômôgôô nône, eendô mbe Jésus. ?Anye nômeenda nayee? Anye nômatsanzabanéda meekédume manyô gô môsenge wetso aJérusalem. N’anye nôétsa we ôési g’ôwa amômôgôô nône.

²⁹ Pierre n’akedi ane amatômukuni amasiia mbe: We tônyôngéô te égobeda Nzambé, kaka oma.

³⁰ Nzambé ône amaneegedu na peeye yasô n’anyô na mbeego, amanikéa éétsa Jésus monyo, ône amakomeda anye va gésumu sowa gôémôyôhéda.

³¹ Nzambé amatômba angô na g’ôba na amamôdigéda va géeyo sedi gémôgôô. Ameetsa angô ényangee. Na ameenda angô mbe: Ewe te Mooboyi oma aIsraël mbe angakoa mitéma miaô gôésingéô kokoo gô ébévee éaô.

³² We adua tôndé mbangi éamabégôme matôvovoni éma. Te we adua na Gédidi gémeetsa Nzambé gôndé ane amôgobedani.

³³ Ane amakôvu gô kundu amakambôga vamookô ahngô mabégôme mane. Amanyôngéô éyôhéda ane amatômukuni.

³⁴ Na va gatse aô gômadenganô Môpharisien môvo amaditédu n’oma muetso. Inedi te Gamaliel na amabaka mônigôi amige miaNzambé. Amatema môtie vandé akedi. N’egévovoko amapatsa ane amatômukuni mbe: Kusani pesu andéô.

³⁵ Vane amavovo na ane amabaka gô kundune mbe: Anye amôgôô n’ami, atômi oma aIsraël. Tôwemeni gô éne éngeenda wa n’anyô omee adua.

³⁶ Bangôani gabaki mômôgôône atetu mbe Theudas, ngima akôdôtsé éva. Môsi nyemone ône amaatubéda gandé môma môvoni na amaandô n’aneengi edi mikama minayi miamôgôô. Amayôhu. Aneengi edi amapanzangana. Meekédu medi mamadimbana. Na inedi ésookanô.

³⁷ Va mbene eéne gô ndéône ématendu na ématangô oma muetso, gômatsutsuga muene. Inedi Judas môsi Galilée. Oma ayekani amamôaanda. Na angô dôta amayôhu. Aandi edi amapanzangana.

³⁸ T’ebandô nanôbeenda mbe tôtsikéni omee adua gémôanza. Akiaké. Okô mbe meekédume maô na mayanzame maô te mamôma, mangadimbana.

³⁹ Géé, ôkô mbe mabégô maô maviga ti na gô pie gôndé amuene Nzambé, buéyé mbe kanégakani, nôsangoongôa ébunzéda mangô. Nôkenea kabaga ébadie égenyanye, nôégenya na Nzambé. Asi kundu épôni éAjuif amasinga éne émavovo Gamaliel.

⁴⁰ Amanikéa ébambéa ane amatômukuni. Amabitéda ahngô na amadékéda ahngô mbe: Nômbioomba éekéda gô ina aJésus. Na ameenda ahngô mbe: Kiakani.

⁴¹ Ane amatômukuni amanôtôga gô eba amisoso. Amatsôkéa na gényônga gévôni mbe: Nzambé amasevoa we gôétubédu gékuanô saina aJésus.

⁴² Pitsi yetso amadenganô gô eba aNzambé na gô yeba yoma, éékéda gédundé. Amanigôa Tsangô Eamôsôba éaJésus-Christ, ône amasevou na Nzambé.