Mayanzame 4 - New Testament in Mitsogo

Pierre na Jean amatsuaô na va mbene akundu épôni éAjuif

¹ Vamabaka Pierre na Jean agébaka gôévovo na géômbége, adeekedi adigondoku na môtômi amigode mikenea eba aNzambé na Asadducéen amatsiga.

² Ahngô asinyôngéô gômookô ahngô Pierre na Jean andé gôéékéda mbe Jésus amakunduga g’ôwa. Gôébégô meekédume mane mamenyeda oma mbe va mbene owa gôndéké gékundugéô na wene monyo.

³ Ahmatsôpa Pierre na Jean na ameengeda ahngô gô eba atsôgôô. Ndéône émabaka éka éadikoo. Ameenda mbe: Angeeboga wangô ngu na mene.

⁴ Ivô ayekani ane amookô meekédume mane ameetsa Jésus mitémamie gémôtsumé paga. Otangôe asi mbumu éaNzambé ômakôndama ômabaka ôkana amitônisa mitayi mioma.

⁵ N’ongôngôe ône atômi Ajuif na peeye yaô n’anigôi amige miaNzambé amakôkangana muetso gô Jérusalem.

⁶ Gômadenganô va gatse aô na Anne, pene adeekedi adigondoku na Caïphe, na Jean na Alexandre, na géômbége setso sambumu éapene éadeekedi adigondoku.

⁷ Amatôma mbe Pierre na Jean abuédu na va mbene aô. Ameevôa ahngô mbe: ?Anye nôdôngédi gékonzoge gô ngudi yaanda? ?Na gô ina andaa?

⁸ Vane Gédidi SaNzambé gémeengéa pepe gôndé Pierre na amasiia mbe: Anye peeye yami na atômi ami

⁹ deo noo nôndé gôétsundéda we gô éne éamôsôba ééndi we gôédôngéda gékonzoge. Anye nôévôa we mbe: ?Adôngédiô mônongo ndé?

¹⁰ Vôtaganganôni ébégô édué anye nôévôi we. N’anye oma aIsraël muetso, vôtanganôni édué. Mômôgôône ôdôô atema môtie na makôdô medi va miso manyô te gô ina aJésus-Christ môsi Nazareth, ône amabôkédanye va gésumu sowa. Te ône amakunduu na Nzambé g’ôwa.

¹¹ Matendeo MaNzambé matônigôa ébégô éaJésus mbe: Etaé émakina anye assayi eba Te éango évumbu v’epandaka gôésipa ebee wetso.

¹² Gôsaba géôbogeo go ngudi yamuene môma. Gô tsinane nyetso, gôsaba éene ina, ta n’evo émeetsa Nzambé gôndé wa n’anyô oma mbe tôngoobou gô éangô.

¹³ Asi kundu épôni amatsapéô vameenangô Pierre na Jean avovo gébe na gomo. Amatsapéô asibômu mbe abaé adua te oma abobo asaba na géneenga gévôni. Ahsibômu dôta mbe adua te ane amavamba na amakénga va meego na Jésus.

¹⁴ Asi kundu épôni ameena na gékonzo gédôngédiôni andé môtie va miso maô na asidenge ébégô gôénikéa évovo n’ahngô.

¹⁵ Ahmakuséda Pierre na Jean gô tsongo nene, na ahmadigaa gô kundu gôévanga éna éngeendahngo.

¹⁶ Ahmavovo anguene n’anguene mbe: ?Tôngeenda nayee na amôgôô adua-a? Asi Jérusalem muetso amani éôkô ébégô évôni étubéda ngudi yaNzambé éyanzi amôgôôe abaé adua adôngédi gékonzoge. Tôsoongôa éékékôa.

¹⁷ Tambô kabaga tsangô éomba étsanzabana na gôndé avo oma, tôdékédéni ahngô na tôvediméni ahngo mbe: Nômbioomba éyeega éteta ina aJésus gôndé pati môma.

¹⁸ Amanikéa éengéda Pierre na Jean gô tsongo amisoso na amaahdékéda n’opisa mbe: Nômbiayeega éômba éteta ina aJésus. Nômbiekéda go inedi.

¹⁹ Vane Pierre na Jean amabika n’ahngô mbe: Tasani anyene éne éndé kuanakue va mbene aNzambé gôéénda. ?Enyepa gôégobeda anye-a? ?Vo enyepa gôégobeda Nzambé?

²⁰ Gôndé we, tôsangoongôa ékina évovo mane mameena we na mamookô we.

²¹ Asi kundu épôni éAjuif amoomba évediméa ahngô abaé na amaahnzeegeda. Ahsibédô na ngudi gôésiséda ahngô gôébégô oma muetso amabaka gôékuméda Nzambé gô éne émabuéani.

²² Gékonzoge gémadôngédu gô ngudi yaNzambé disoongôa môma ésupua, gémabaka géka na nzima dinayi yamipuma.

Osambô ômasambéda ane ameetsa Jésus mitémamie

²³ Vamanzeegedu Pierre na Jean amanika na gôndé akaô gôénigôa metso mameendô ahngô na tsesuye yadeekedi adigondoku na peeye yAjuif.

²⁴ Vamookô ane ameetsa Jésus mitémamie, ookô ébégôe éne, ahngô muetso ahmavovo na Nzambé ôgi ôvo mbe: Kumu, éwe te Nzambé Kana, ômakana mbéyi na ngongo n’eetété éamiônda.

²⁵ Te éwe ômavovo gô ngudi yaGédidi soo n’ogi atétasô David, môyanzi oo mbe: ?Mongome eenda tsogosogo na dienza yaô nayee? ?Oma avanga épangô éagébé na tsoongo nayee?

²⁶ Atômie ava tsina amavôtsa misagô miaô gôégenya. Atômie muetso amavanga gôéénda Ebadi na Nzambé na Christ, ône amasevoa angô.

²⁷ Ah Nzambé, te gô môsenge ôdôô mbe Hérode na Ponce Pilate amavanga gépangô na mavo mongo na mabôta metso maIsraël. Amavangéa gépangô gôndé Jésus, môyanzi oo amatsimamani, ône amasevoa éwe.

²⁸ Ewe Nzambé ômasinga ahngô gôéénda éetso émeendahngô te gô ényangee éoo. Te gamamenya éwe va mbeego mbe ébégôe éngaba te nane.

²⁹ Ah Kumu, n’atsatsee ôena gavediméa ahngô ayanzi oo. Singa ayanzi oo anigôa mabégo moo na bôkédé ôvôni.

³⁰ Konyo ôgogoe woo gômbe oma angadôngédu. Na mbe émbégéa éngeendôni na mabégô manyônganéôni masoongôa môma ésupua mangeenanô. Singa mabégô mema meendô gô ina aJésus môyanzi oo amatsimamani.

³¹ Vamamanahngô évovo na Nzambé, tungune émabakahngô ématatéa. Gédidi SaNzambé gémeengéa gôéyuéséda mitéma miaô mietso. Ahmeekédaka na bôkédé ôvôni mane mamavovo Nzambé.

Ane ameetsa Jésus mitémamie amakabana ôkitie waô

³² Géômbé sane ameetsa Jésus mitémamie, gémabaka étasevo na môtémovo. Ta na môma môvo amavovo mbe: Eôma éami éndéké te éamemuene. Ivô éôma éaô éetso ésibé na kumu, émagésu vavo.

³³ Ane amasevouni na amatômukuni amanigôa n’enyangee évôni gamakunduga Kumu Jésus g’ôwa. Na Nzambé ameetsa ahngô muetso mate mavôni.

³⁴ Va gatse aô muetso gôsidenganô môma amagômbéôkô sôma. Emabaka te nane. Muetso amabaka na tsaga yaô na yeba yaô, amasômbéda yangô. Dodeye dimadiiangô dine

³⁵ amaditsua na gôndé ane amatômukuni. Ahmakabanéa muetso dikabô gô éne émagômbéôkô angô môma na môma.

³⁶ Gandé môma môvo, te Joseph môsi ébôta éaLévi, amabôtu gô tsenge ééndô mbe Chypre. (Amoogu na akedi mbe Barnabas, événdégéô mbe, ône akasôgédi akedi.)

³⁷ Joseph amasômbéda tsangane émabaka n’edi na amatsua dodeye, amadideekeda na gôndé ane amatômukuni.