Mayanzame 3 - New Testament in Mitsogo

Gékonzo gémadôngéduni

¹ Nyovo gô ndéô éginda kômbéne, te ndéô éadisambô, Pierre na Jean amakea muetso abaé na gô eba aNzambé gôésambéda.

² Gô eba aNzambé gômabaka ômbaa ôtetu mbe Onyepani. Va kôbangô ombee ône gômadigaa gékonzo sagébôté. Pitsi yetso akedi amamôtsuaka gôémôdigéda v’ombaa Onyepani mbe aduka dode gôndé ane eengéani.

³ Gékonzoge gémeena Pierre na Jean aviga gôéengéa na gô eba aNzambé. Amahduka dode.

⁴ Pierre na Jean amamôbono na nzôô. Pierre amavovo n’edi mbe: Bono we.

⁵ Gékonzoge gémabono ahngô na gégééba gômatasangô mbe: Deo nangeetsô sôma.

⁶ Pierre amavovo n’edi mbe: Gôndé me, tsaba na sôma ta na dode ta na dodo mbe nagôétsa éangô. Ivô éne éndéké n’ami, nagôétsa éangô. Gô ina aJésus-Christ môsi Nazareth, timôga. Kiaka na makôdô moo.

⁷ Vane Pierre amamôtsôpa g’ôgoge ômôgôô gôémôtimôa. Tsina na tsina makôdôme na késéôye dimasipa.

⁸ Gékonzoge gématimôga matséda. Amatema môtie na amakénga. Ameengéa na Pierre na Jean na gô eba aNzambé. Amakea atséda makongo na akuméda Nzambé.

⁹ Géômbége setso gémadenganô gô eba aNzambé gémeena angô akea amuene na akuméda Nzambé.

¹⁰ Oma amabangôa gédimôge sedi mbe ôdôô te ône amabaka pitsi yetso digaa v’ombaa Onyepani eba aNzambé gôédukana dode. Muetso amatsapéô na amasiiô na singididi gô éne émabuéa gôndé gékonzoge géne.

Pierre ameekéda gô eba aNzambé

¹¹ Gékonzoge gémadôngéduni gésiaagané na Pierre na Jean gô eba aNzambé. Muetso amatsapéô na amakôkangana na vandé ahngô atatô va komu épôni ééndô mbe Komu éaSalomon.

¹² Vameena Pierre géômbége, amavovo n’ahngô mbe: ?Anye oma aIsraël nôsôbasôbana ndé? ?Te gôdôngédiô gékonzoge egé-a? Nônabono we mbe tôdôngédi mômane ôdôô gô ngudi yawéene, na gô évambee éndé we na Nzambé.

¹³ Menyani mbe Nzambé, ône amaneegedu na Abraham na Isaac na Jacob, te Nzambéne émaneegedu na peeye yasô n’anyô, ameetsa ôndômbee wedi wetso gôndé môyanzi edi Jésus. Te ône amadeekeda anye na gôndé ane atômani. Nômamôtôna va mbene aPilate buéyé gamamyôngéô amuene Pilate émônzeegeda.

¹⁴ Anye nômatôna ône amatsimamani agébé n’oési mbe ayôhu. Nômaduka Pilate môsi môkôbé mbe anzeegedu.

¹⁵ Gô éne nômayôhéda ône andé Kumu amonyo. Ivô Nzambé amamôkundua g’ôwa. Wa na Jean tôndé mbangi éagékundugéô sedi sowa.

¹⁶ Inee éaJésus éne éndéké na ngudi. Gékonzoge gésabômu anye na géenanye egé, gédôngédiô te gô ngudi yaina aJésus ésitsumé angô paga. Gôétsi angô Jésus môtémee wetso gébe na paga, te gadôngédiô angô. Te geenanye angô nane.

¹⁷ Eébéyée nane, ana aTéta agô mbumu éaIsraël. Me tsabômu mbe anye na atômie wanyô nômabaka n’odungé, gémenye éne émeendéanye Jésus.

¹⁸ Va mbeego Nzambé ameeveda wa n’anyô g’ôgi apandôédi muetso amatasa medi mbe Christ, ône amasevoangô, angeena maguga. Na amameena te gô éne émeendanye.

¹⁹ Tambô koani mitéma mianyô gôéba wene mônongo oma. Géngôgani na gôndé Nzambé mbe anônôtôa ébévee éanyô.

²⁰ Vane Amuene Kumu angavigéda ndéô éagévôgiméô. Na anganôkudéga ône amasevoangô na mbeego, ône atetu mbe Jésus-Christ.

²¹ Gô ndéô nedué Jésus-Christ andé digaa g’ôba. Asanganôtôga gône ngu na vangabuéa ndéône éngakou éetso éka wene mônongo. Amuene Nzambé amatôevéda mbeego mbe éngaba te nane. Te gamavovo apandôédi amatasa medi.

²² Tétasô Moïse amavovo te nane. Angô mbe: Kumu asô n’anyô Nzambé, angatôkudégéa muene môpandôédi agono na me. Angabôtu te gô éongo éasô n’anyô. Nôngookô metso mangabeendangô anye.

²³ Muetso ane asangamôôkéôni angaaganédu n’oma aNzambé na angakea gôébungana.

²⁴ Apandôédi muetso amatasa maNzambé bandôa na tétasô n’anyô Samuel, amavovo môvo môvo te mônogovo gôétôevéda mane mapitsi yedi.

²⁵ Divangaye yamisôba dimavanga Nzambé na wa n’anyô g’ôgi apandôédi amatasa medi dindéké gôndé anye. N’anye nôndé dôta gô évamba émavambéda Nzambé na peeye yasô n’anyô vamavanganangô n’Abraham mbe: Nangeetsa mate gôndé mongome metso mava tsina te gô ina éanoo.

²⁶ T’ebandô Nzambé amakudéga môyanzi edi, mapangame te gôndé anye. Amakudégéa angô na gôndé anye te mbe vangaviianye ngima mabégô manyô mabévani, anganôétsa mate.