Mayanzame 28 - New Testament in Mitsogo

Paul amabaka gô néngé aMalte

¹ Vamamana we éoboogo gô mubu, tômookô mbe néngé nedué te Malte.

² Mbuuane émabandôa ényogo na sodi gévôni. Asi néngé nene ahmakenea we na géneega. Ahmadumua gésotosoto na amakôkanganéda we va kôbangô asangô gôéôkô épiô.

³ Gôékidéa sotoge, Paul amadingôa gékatage satsakida gôégébéka. Tambô gô gékatage gômabaka ôgôsa. Gômookô angô épiô ômakusa na ômambata Paul g’ôgogoe.

⁴ Vameena asi néngé nyogone éviômba émambata g’ôgogo aPaul amavovo anguene n’anguene mbe: Na gô pie mômôgôô nône asanyepa. Te môsi môkôbé. Bononi, buéyé gabusugi angô ôwa agô mubu, môtsundédine oma muetso asangamôsinga aba na monyo.

⁵ Paul amaduméda nyogone émaaga na gô soto. Angô asiôkô ta na pievia.

⁶ Ane amadenganôni amabono mbe buétsé ôgogoe ôngaahnda, na buétsé Paul angaaga na va tsina gôéwa. Ameenéa gôéena éne éngabuéani. Ahmadinga éenéa na asiene ébégôe. Ahmakoa matasame maô na ahmavovo mbe: Tambô mômôgôô nône andé ti ga Nzambé.

⁷ Vabambani na tungu nene vamabaka tsaga na eba amôtômine anéngé. Angô môma okumaka, inedi Publius. Amasambanéa na we na gényônga na amakenea we pitsi ditatô.

⁸ Tétene éaPublius amabaka yama v’ekoko na beeagane. Amabeea nzonzozo na môvanzô anzina. Paul amakea gôémôena. Amavovo na Nzambé gôndé angô na amamôtsakéga mogome. Amadônga.

⁹ Na vane abeeyie muetso amabaka gô néngéne amaviga na amadôngédu.

¹⁰ Asi néngéne amatubéda we géneega gô minongo mietso. Nyee ômapeka we gô mbôngône gôékea ameetsa we éôma éetso mbe tôsangabuta sôma gô môtôôe ômakea we.

Paul amatsiga gô Rome

¹¹ Vamoota ngonde ditatô te vamapeka we gô mbôngône émaviga gô Alexandrie. Ina ambôngône te Nzambé Dibaé Vamavasa. Mbôngô nene émaviga gô néngéye gômadingédu yangô na ndéô éasodi.

¹² Tômasikama gô môsenge aSyracuse. Gône tômadigaa pitsi ditatô.

¹³ Tômatenôa gône gôégônga tsényéne gôébuéa na gô Reggio. N’ongôngôe ône ôpunga ômaviga gésa gédongu gôévumbéa we pitsi dibaé na gô Pouzzoles.

¹⁴ Gô Pouzzoles, tômeenana na ana aTétee asi mbumu éaNzambé. Ahngô amasikéga we tsono épo. Na vane tômabuéa na gô Rome.

¹⁵ Ana aTétee n’asô go Rome amookô tsangône éasô te madeo tôsitsiga na amaviga gôéwanyéda we gô tungu éekasa éAppius na gô yeba yagenda dindô mbe Trois Auberges. Vameenana Paul n’ana aTétee n’edi agô mbumu éaNzambé, amakasôga na amakuméda Nzambé.

¹⁶ Vamatsiga we gô Rome, Paul amatubédu eba ôngadigaangô amuene na môgode ôngamôkeneani.

Paul ameekéda gô Rome

¹⁷ Vamoota pitsi ditatô, Paul amabambéa atômi aAjuif adigaa gô Rome. Vamakôkangana ahngô, Paul amavovo mbe: Ana aTétee n’ami. Menyani mbe me tsiindé ébégô gôébévéda omasô n’anyô Ajuif. Me tsikékôé ésima ématsikéô wa n’anyô na peeye yasô n’anyô Ajuif. Namatsôpu gô Jérusalem. Namadeekedu na gô mogo masi Rome.

¹⁸ Asi Rome amatsundéda me na asidenge ta n’oési ôvo mbe neesédu gôéwa. Amanyôngéô énzeegeda me.

¹⁹ Ivô Ajuif asinyôngéô mbe nanzeegedu. T’ebandô namaduka pene agô Rome gôékônza ébégôe. Natsuéyi ébégôe n’egô, ivô kaka mbe nasunda éongo éami.

²⁰ Nôeni ébégôe ééndi me mbe vigani nôviôkô éne éndé n’ami. Wa n’anyô ana aIsraël tôténdéda ône angavigani. Esengo ékatô me te gôndé angô.

²¹ Ajuif amabika mbe: We égô gô Rome, tôsidiié ta na gésangô gévo géviga gô Judée génigôa we ébégôe éoo. We dôta tôseena ta na muana aTétee môvo aviga gône gôénigôa we éne ébévani émayanza éwe.

²² Ivô tônyôngéô ti pepe éôkô matasa moo. Tôsabômu mbe gô tungu yetso dimeekédu nzéa ékea éwe éne, oma eenda pégôani na meekédu manzéa nene.

²³ Amasevoa inya gôévovo na Paul. Nyoone amaviga ti ayekani na gô eba ômadigaa Paul. Bandôa vamaagiia nyee ngu na vameedangô, te andé wangô. Paul amasupua ahngô mabégôme mokumu aNzambé gômanigôa angô ômbanza aJésus. Amatanga mane mamatenda Moïse na mane mamatenda apandôédi amatasa maNzambé va mbeego gôénigôa mane maJésus. Paul amanyôngéô ékoa ahngô matasame mbe asinga Jésus.

²⁴ Avo amookô na amakoa matasame. Avo dôta amamôtsumaka te paga.

²⁵ Ajuif amatimôga gôénika na gô yeba yaô andé gôétsumana paga. Paul amavovo n’ahngô mbe: Tambô na gô pie Gédidi SaNzambé gémabaka na mitayi vamavovo sangô na peeye yasô n’anyô go mônya aEsaïe môpandôédi amatasa maNzambé mbe:

²⁶ Kiaka na gôndé omeaa. Beenda ahngô mbe: Nôngookô na woo, ivô nôsangamanigôgéô. Nôngeena na vede, ivô nôsangamaanéa.

²⁷ Gôébégô mitéma miomeaa mindé na ndiba. Amani ékugéga matô maô. Amani eema miso maô. Kabaga misome maô meenéa Na kabaga matôme maô mookô Na kabaga mitéma miaô misinga Na kabaga agéngôga na gôndé me mbe naadôngéda. One avovoni te memuene Nzambé.

²⁸ Paul amoomba énigôa mbe: Tambô menyani mbe meekédu magéobogeo gémakônza Nzambé gôndé wa n’anyô mangeekédu ane asaba Ajuif. N’ahngô angamookô. [

²⁹ Vamavovo Paul nane, Ajuif amakea asaganédana anguene gô éne émavovo Paul.]

³⁰ Paul amadigaa mipuma mibaé gô eba ômasombo angô. Amamogo na muetso amaviga gôémôena.

³¹ Ameekéda na bôkédé ôvôni mabégô mokumu aNzambé. Amanigôa Tsangô éaKumu Jésus-Christ gédékédu na môma.