Mayanzame 27 - New Testament in Mitsogo

Paul amakudégu na gô Rome

¹ Emavangô mbe we tôpeka gô mbôngô na gô Italie. Paul n’avo asi tsôgôô ameetsô na gô mogo mamôtômi amigode inedi Julius. Te géômbé samigode gééndô mbe migode miapene éagô Rome.

² Tômapeka gô mbôngône émaviga gô Adramytte na émakea na gô mahbôngôme mandé gô Asie. Tômatenôa. Môsi Macédoine môvo, inedi Aristarque amakea n’asô. Mbôkedi te Thessalonique.

³ N’ongôngôe ône tômatsega gô Sidon. Julius amakenea Paul na ngeba. Amamôsingéa mbe akee gôéduka wee yedi éne ésabaké n’edi.

⁴ Vamanôtôga we gô Sidon, tômagônga gô môvamba anéngé ééndô mbe Chypre gôébégô gékungage gémavigaka gôkea we.

⁵ Tômaabôga mubu vapévapé na Cilicie na Pamphylie. Tômatsega gô mbôka ééndô mbe Myra éndé gô Lycie.

⁶ Gô Myra, môtômi amigode amadenga mbôngône épôni émaviga gô Alexandrie na émabaka na môtôô na gô Italie. Tômapeka muetso.

⁷ Gô pitsi diyekani tômakea vage na vage. Tômabaka na panda dipôni gôébuéa gô môsenge ôéndô mbe Cnide, na tôsitsegé wangô. Gékungage gémeebakanéda we gôéomba éwesea na gésa géne. Vane tômoota gô Cap Salmoné gôégônga gô môvamba anéngé ééndô mbe Crète.

⁸ Tômawesea pesu pesu gôégônga gô kôbangô atsenyene na gôébuéa na gô tungu ééndô mbe Bons Ports, ésatongonéa na môsenge ôéndô mbe Lasée.

⁹ Gômadaga môtôôe tômadinga ébuéa. Vane ndéône émoota, éne ényepa mbôngôye ékea. Ndéône émabaka éka éasodi gévôni na émadaga gôékea môtôôe gô mubu. T’ebandô Paul ameevéda anugie mbe:

¹⁰ Amôgôô n’ami, me neena mbe môtôôe ôdôô ôngadaga. Mbôngône n’ekôta étsua yangô gôngadimbana ôkabô. Na weene oma, tôngavétsu n’owa gô mbôngône édué.

¹¹ Ivô Julius, môtômi amigode asiôkô mane mamavovo Paul. Amookô te mane mamavovo mônugine na kumune ambôngône.

¹² Ehbôngô ésinyepe gôédigaa pitsi diyekani gôémangôa ndéône nyetso éasodi wangô. T’ebandô asi môtôôe amanyôngéô énôtôga vangô gôékea na gô Phénix. Phénix te éhbôngô éndé gô Crète gésa gédôngu gôpénda kômbéne. Te tungune ényepa gô ndéône éasodi.

Gékunga gémakungéda gô mubu

¹³ Nyovo ôpunga ônyepani ôviga gô dongu ômavumbéa. Anugie ameenda mbe: N’opungee ône tôngabuéa. Amaduta môkodie gôéenôa étaé émasipaka mbôngône gô mbéyi kabaga ékea. Na tômakea. Tômagônga gô môvamba aCrète.

¹⁴ Ivô tsina na tsina gékunga gévôni géviga gô ékoo gétetu mbe Euraquilon, gémasuma gô mikôdimie mianéngéne.

¹⁵ Mbôngône ématsôpu na gékungage. Gôsibé môma oongôa égéngôa yangô gamanyôngéô we. Tômatsuaô na gékungage.

¹⁶ Vane tômoota gô dongu anéngé ékeke ééndô mbe Cauda. Na yangô émeebakanédéa we gékungage vipesu. Tômayanza na ngudi yetso gôétômba mbôngône éasô éamôbaé ékeke émaanda we gô ngima ditéga.

¹⁷ Eangô émapekedu gô mbôngône épôni. Ene épôni émakatô na mikodi mivôni gôéoodeda yangô. Anugie ameena gomo kabaga asikama gô misigemie miviga gésa saLibye na kabaga atôndôméa wangô. Amagunya sôma samôtôbô gôésikaméda mbôngône kabaga évéva pita na gékungage.

¹⁸ Ivô gékunga gémakungédéa we pitsine nyetso. N’ongôngôe ône amabandôa égunya ékôta na magumbame gô mbéyi, buta mbe mbôngône étôbôma.

¹⁹ Ovo enyaa ône amagunya na gô mbéyi, ti na mogo maô anguene éômee émakônzaka ahngô mbôngône.

²⁰ Gô pitsi dibaé ditatô gôsienanô kômbéne na minanga. Gékungage gémakungéda ti na ngudi yetso. We muetso tôsiténdédédô mbe tôngadônga.

²¹ We muetso tômabaka gô mbôngône, tôsiéé môyakô pitsi diyekani. Vane Paul amatema môtie na amavovo mbe: Amôgôô n’ami, anye mbe nômookéôkô me, mbe tôsinôtôgé vita gô Crète, wa n’anyô mbe tôsidimbanédana éôma éasô n’anyô éetso.

²² Ivô deo noo, me nanôkasôgéda n’evovie édué mbe: Bakani na bôkédé. Gôsangawa ta na môma môvo. Mbôngône te éngadimbanani.

²³ Menyani mbe Nzambé, kumu ami amonyo, ône ayanzéa me amavigédéa me môsi g’ôba na pitsi.

²⁴ Angô amavovo n’ami mbe: Paul, ômbieena gomo. Nzambé anyôngéô mbe éwe ôtema va mbene apene andé gô Rome. T’ebandô gônyônganéô éwe na Nzambé asangasinga éwe n’ane akea môtôô ôvo n’ewe, nôwa. Akoo angadônga te gô inoo.

²⁵ Amôgôô n’ami, ôôkéôni me. Bakani na bôkéké. Me tsatsuma Nzambé paga. Ene émabeenda angô me, éngeenanô.

²⁶ Mbôngône éngakôngama na va tsényé éanéngé na éngatôndôméa. Géé wa n’anyô tôngaabôga.

²⁷ Gômoota nzima apitsi na pitsi dinayi. Gékungage gémakungéda we tômavéva na gô ngenge amubu ôéndô mbe Méditerranée. Va gatse apitsi, ayanzie agô mbôngô amamenya mbe tôweseyi na gô tsényé.

²⁸ Amagunya môkodi ômakatô sôma géditani gôékanéga gamatiba mubue. Môkodie ômatubéda mbe étibee éndé nzima ditatô na dikana tsambué. Tômoomba éwesea. Amoomba ékanéga étibee. Emabaka te émasusua éka nzima dibaé na dikana génana.

²⁹ Anugie ameena gomo kabaga mbôngône éngôga gô dibobo na kabaga éboéga. Amagunya mataé manayi gésa géngima gôésikéga mbôngône. Na ameenéa ngu na vamaagiia nyee.

³⁰ Ayanzie agô mbôngô amookô tsôvé gôébusuga. Amasutuméda mbôngône ékeke, amapata mbe: We tôkekônza mikodimie misikéga mbôngône gô mbene, tambô.

³¹ Paul amavovo na Julius na migodemie mbe: Okô omeaa asadigaa gô mbôngône n’asô égô, wa anyô muetso tôsangadônga.

³² Vane migode amakitsa môkodi ômatidéguku mbôngône ékeke na émavéva amuene gébé na môma.

³³ Vamabaka nyee ôka gô giiaka, Paul amavovo n’oma muetso mbe: Aakani. Tasani g’eyusumédéa anye éaa môyakô gôka nzima na pitsi dinayi. Pitsiye yetso dine nôndé gôékebangana.

³⁴ Me nanôongô ndongi mbe aakani buta mbe yôtô yanyô didiia ngudi gôéabôga. Vakaba anyô gôsangadimbanéda ta na môma môvo, pengo ta n’osôgé agô miotsé mianyô.

³⁵ N’emana évovo nane, Paul amabongo mipemba na amakuméda Nzambé gô miangô va mbene oma muetso. Amamibukua na amaa.

³⁶ Asi mbôngône muetso amakasôga na amaa.

³⁷ Otangôe wasô gô mbôngône, tômabaka mikama mibaé na nzima tsambué n’oma môtôba.

³⁸ Vamamana muetso éaa, môyakôe ômasanéani ômagunyu gô mubu gôétôbôméda mbôngône mbe kabaga édita.

Mbôngône ématôndôméa

³⁹ Vamaagiia nyee, ayanzi agô mbôngô asibangôé ta na pesu tsényéne mbe édué te tsenge asimbe. Ameena tungu émabaka meba na tééngé, na misige va tsényé. Amanyôngéô étsega na mbôngône te vangô mbe buétsé angoongôa.

⁴⁰ Amatsôbôa mikodimie mimakatô mataé masikéga mbôngône na amagunya mangô go mubu. Amatsôbôa na mikodimie mimakatangô kaviye. Amabatéda môkanda ôvôni gômbe ôpungee ôngavumbéa gôétinda mbôngône na gô tsényé.

⁴¹ Ivô amasikama gô ngongo amisige va ngenge amubu. Môsonoe ambôngône ômatsega gô misige géôngôé épupa. Maténame dôta mamaboéga na ngudi yamiyôkiyôkimie.

⁴² Migode amanyôngéô éyôha asi tsôgôô amabaka n’ahngô, kabaga ahbusuga vangabenzahngô muetso na gô tsényé.

⁴³ Ivô Julius amanyôngéô ékenea Paul n’edi na amadékéda migode mbe: Nômbiayôha asi tsôgôô. Amatôma ahngô mbe: Anye nôsabômu ébenzani, kuyaméakani gôéabôga na gô tsényé.

⁴⁴ Anye nôsamenya ébenzani, pekani gô éatée édué éatimbe éngakôngéga anye na gô tsényé. Vane oma muetso amaabôga na gô tsényé gééndé ébégô.