Mayanzame 23 - New Testament in Mitsogo

¹ Paul amabono asi kundu épôni éAjuif gébé na tsoyi. Amavovo mbe: Ana aTétee n’ami, vatsundédu me na muanga amôtémami, ôseeséda me va mbene aNzambé ngu na deo noo.

² Pene adeekedi adigondoku, inedi Ananias amatôma môma môvo amabaka môtie va kôbangô aPaul mbe: Bômôa angô va mônya.

³ Vane Paul amabono ône amatômani mbe: Amuene Nzambé angagôbômôa. Ewe te môsi enyepa éamônya. Ewe ôndé digaa gôéeséda me gô mige miAjuif, n’ewe ôokua miangô gôbômôédi éwe me.

⁴ Ane amabaka va kôbangô aPaul amanigôa angô mbe: Ewe ôtokoyi te pene adeekedi adigondoku ayanzéa Nzambé.

⁵ Paul amamôbeenda mbe: Me tsimenyaka mbe angô te pene adeekedi adigondoku. Matendeo MaNzambé matôbeenda mbe: Ombiatoko pene atôma omami.

⁶ Paul asibômu mbe asi kundu épôni éAjuif amabaka éômbé ébaé. Egé gésa te Asadducéen. Egé gésa dôta Apharisien. Na amavovo n’ahngô mbe: Ana aTétee n’ami. Me dôta te Môpharisien. Téta te Môpharisien. ?Tambô anye nôtsundéda me te gôténdéda me gékundugéôge sowa-a?

⁷ Vamavovo Paul nane, Apharisien na Asadducéen amatsumana paga. Na vane amasaganédana.

⁸ (Asadducéen akina gékundugéôge sowa. Eenda dôta mbe gôsaba asi g’ôba, ayanzie aNzambé. Gôsaba na édidie. Géé Apharisien asabômu mbe mabégôme metso mane mbe mandéké.)

⁹ Gô ésaganédee éaô, ôpisee ômakôndama ti kôndama. Avo Apharisien angô anigôi amige miaNzambé amatema mitie gôékitsa ébégôe mbe: We tôseena ôési ta n’ovo gôndé mômôgôône ôdôô. One amavovo n’edi, mavooe te gédidi, mavooe te môsi g’ôba amavigédu na Nzambé.

¹⁰ Eômbé ébaé émaagagana pepe gôébégôe éaPaul. Môtômine ameena gomo mbe: Kabaga anyasa Paul, me namôeebakanéda. Amatôma migode miedi mbe: Keani na va gatse omee ane. Nôkebongo Paul. Nôviga n’edi gôémôengéda gô eba ôvôni atsôgôô.

¹¹ Gô pitsine éanyoone, Kumu Jésus amatsutsuga na vandé Paul. Amavovo mbe: Mamisôba. Ombieena panda. Omani énigôa ômbanzee wami éva gô Jérusalem. Nanyôngéô mbe ôkéénda te mônongovo gô Rome.

Oma amavangéa Paul gépangô

¹² N’ongôngôe ône, Ajuif amavangéa Paul gépangô. Amasongéa misongia mbe: Ti we, ta madeo tôsiyôha Paul tôsangaa na tôsanganyua.

¹³ Ane amavangaka gépangôge géne amabaka ôkana anzima dinayi yamôgôô.

¹⁴ Amakea gôénigôa tsesuye yadeekedi adigondoku na peeye yAjuif mbe: We tôsongéyi mbe we géé môyakô ta madeo tôsiyôha Paul.

¹⁵ Tambô anye asi ényanga wedéani we. Kudéga na gôndé môtômi atsenge mbe anôkudégéa Paul. Nômôvooto mbe: Tônyôngéô éôkô gô mônyedi éne ématsuéô angô môsunda. Vane kumu yagépangôge amanigôa mbe: Wéene tôsangasinga Paul atsiga na gôndé anye adeekedi adigondoku. Wéene tôngamôyôha gô nzéa.

¹⁶ Muakadine aPaul amookô ébégô éagépangôge. Amayavôga ékea na gô eba ôvôni atsôgôô ômakeneo Paul. Ameengéa na amanigôa Paul ébégô éagépangôge.

¹⁷ Vane Paul amabambéa môgode môvo na amamôénda mbe: Kea na mônzambu ôdôô akenigôa môtômine éne éndé n’edi.

¹⁸ Môgode amakea na muakadine aPaul na gôndé môtômine. Angô mbe: Paul, ône andé gô tsôgôô ôdôô, eendi me mbe: Kea na muanee amônzambu ôdôô na gôndé môtômine. Andé n’ebégô gôémôbeenda.

¹⁹ Môtômine atsenge amatsôpa mônzambu g’ôgogo gôékea n’edi na va tungu éanguene. Angô mbe: Beendaka me éne évigi éwe.

²⁰ Muanee ône angô mbe: Ajuif amavanga anguene mbe agôduka Paul mbe ômôbuéda mene na va mbene asi kundune éaô épôni. Angagôvooto mbe: Tônyôngéô éôkô gô mônyedi éne étsuéyiô angô môsunda.

²¹ Me nagôbeenda mbe ômbiôôkô mane. Gôndéké avo nzima dinayi yamôgôô amasongéa mbe: We géé môyakô na we gényué meba ta madeo tôsiyôha Paul. Amôgôôe ane andé gôémôenéa gô kôbangô anzéa gôémôyôha. Avengéa vane te vangaabéa éwe.

²² Môtômine amadékéda mônzambue ône mbe: Ombiabeenda muene môma. Na amamôénda mbe: Kiaka.

Paul amatômu na gôndé muene môtômi inedi Félix

²³ Môtômi atsenge amabambéa migode miedi mibaé mimabaka n’enyanga. Angô mbe: Anye abaé kôkanganédani mikama mibaé miamigode mikea gô tsina. Bambéani dôta nzima tsambué yamigode mikea digaa gô nyama. Nôkôva dôta mikama mibaé miamôgôô atsua makongo. Bakani muetso kuanakue gôékea na gô Césarée. Nôngatimôga éva gô ndéône éyamôni. Nôngakea na pitsi na pitsi.

²⁴ Kônzani dôta nyama gôndé Paul gôédigaa buta mbe nôbuéda angô ékenge na gôndé Félix, môtômine môvôni.

²⁵ Na amatendéa gésangô mbe:

²⁶ Oô te me, Claude Lysias. Nagôkômbôa éwe tsesu épôni, Félix môtômi môvôni atsenge.

²⁷ Nagôkudégéa mômôgôône ôdôô. Ajuif amamôtsôpa na amanyôngéô emôyoha. Te gômookô me mbe angô te môsi Rome. Te gamawedéa me angô, wa na migode miami gôémôwata gô mogo mAjuif.

²⁸ Me dôta namanyôngéô éôkô môsunda ômatsuéô angô. T’ebandô namakea n’edi na gôndé asi kundu épôni éAjuif.

²⁹ Gône namookô angô amatsundédu te gô mige miaô Ajuif. Buéyé nane, asiôngôé émôeséda gô miangô. Asidenge ta n’oési ôvo mbe eengédu gô eba atsôgôô vo mbe ayôhu.

³⁰ Na va ngongone vane, namookô mbe Ajuif amamôvangéa gépangô. T’ebandô tsina na tsina nayavôgi émôkudéga na gôndé éwe. Nabeendi ane amôtsundédani mbe: Tsuani môsundee na gôndé Félix, môtômine wasô n’anyô môvôni. Gésangôge gémakôdéa te nane.

³¹ Migode mibaé mimayanza metso mamatômu angô. Amabongo Paul na amakea n’edi na pitsi nene na gô Antipatris.

³² Migode mimakiaka gô tsina gôéveegeda Paul mimanika n’ongôngôe ône na gô mbôkaô. Mine mimabaka digaa gô nyamaye mimakea gôémangôa môtôôe gôéveegeda Paul.

³³ Amatsiga muetso gô Césarée. Migodemie mimabaka gô nyamaye mimeetsa môtômine gésangôge. Amadeekeda dôta Paul na gô mogo medi.

³⁴ Môtômine môvôni amatanga gésangôge. Ameevôa Paul mbe: ?Ewe môsi gôni? Paul angô mbe: Me môsi gô Cilicie.

³⁵ Môtômine angô mbe: Ongatsundédu te vangatsiga ane asundi éwe. Vane amatôma migode gôékenea Paul gô eba ôvôni ômadigaa Hérode, môtômi atsenge.