Mayanzame 21 - New Testament in Mitsogo

Paul amakea na gô Jérusalem

¹ Vamaagana we n’akasô v’ehbôngô, tômakea gô mbôngô na dii na gô Cos. N’ongôngôe ône tômabuéa na gô Rhodes na va mbene vane tômakea na gô Patara.

² Gô Patara tômadengo mbôngône émabaka na môtôô na gô Phénicie. Tômapeka gô yangô na tômakea.

³ Tômagônga néngéne ééndô mbe Chypre. Tômamiena ivô tômoota te ôtaga na gésa gédongu gôékea na gô Syrie. Tômatsega gô Tyr gôésutuméda ékôta émabaka gô mbôngône.

⁴ Gô Tyr tômadenga ane ameetsa Jésus mitémamie, na tômadigaa n’ahngô tsono épo. Gédidi SaNzambé gémabeenda ahngô mbe: Vovoni na Paul mbe asakea na gô Jérusalem.

⁵ Na vamamana we n’ahngô pitsi tsambué, éne éagénana tômaagana n’ahngô gôémangôa môtôô wasô. Muetso ane ameetsa Jésus mitémamie béyé n’ageto n’ana, amaveegeda we na v’etumba éambôka. Va kôbangô amubu tômasiba mabongome gôévovo na Nzambé.

⁶ Na vamamana we ésambanéa n’ahngô, tômapeka gô mbôngône. Ahngô amanika na gô mbôkaô.

⁷ Môtôôe wasô agô mubu ômabandôa gô Tyr na ômakôdéa gô Ptolemaïs. Gône tômakômbôana na ana aTéta, asi mbumu éaNzambé na tômamana n’ahngô pitsi épo.

⁸ N’ongôngôe ône tômatimôga gô Ptolemaïs gôékea na gô Césarée. Gô Césarée tômadigaa gô eba aPhilippe môékédi aMabégô MaNzambé. Philippe te môvo va gatse amôgôô tsambué amasevou gô Jérusalem.

⁹ Philippe amabaka n’anageto anayi asibaaôni. Muetso anayi amapandôéda ndongi dimeetsô ahngô na Nzambé.

¹⁰ Vamabaka we tôka wangô ôkana apitsi tômavigéô na môgenda amaviga gô Judée. Inedi te Agabus na angô te môpandôédi amatasa maNzambé.

¹¹ Mômôgôô nône amaviga na gôndé we. Amabongo édata émaataka Paul. Agabus amakata makôdô medi na mogo medi na édatee éaPaul na ameenda we mbe: Nôeni gakanéga me éakata memuene. Ôokôni éne évovo Gédidi SaNzambé na wa n’anyô. Kumu eedata édué angakatô na Ajuif gô Jérusalem te mônongovo, na angadeekedu na gô mogo magenda.

¹² Vamookô we ôgie ône we tômakénga na Paul mitôô na dôta asi Césarée muetso tômagondo Paul mbe: Kokoo yewe ômbiakea na gô Jérusalem.

¹³ Ivô Paul amakékôa ôgie wasô mbe: ?Anye nôdéa ndé? ?Nayee nôyungéda me môtéma mbe kabaga tsakea-a? Memuene nandé na môtéma ômasumani gôékea, kaka gôékatô ésengo étévo, buéyé na gôéyôhu gô mabégô maKumu Jésus gô Jérusalem me tseena panda.

¹⁴ We tôsibé na ngudi yekoa Paul matasame. Na tômasuméa évovo mbe: Ene ényôngéô Kumu Nzambé ébaké.

¹⁵ Vamoota dipo pitsi tômakata magumba gôékea na gô Jérusalem.

¹⁶ Avo aneengi aJésus asi Césarée, amaveegeda we na gôndé mômôgôô môvo mbe tôdigaa n’edi. Inedi te Mnason môsi Chypre. Angô amakoga gôéétsa Jésus môtémedi te na mbeego.

Paul amakea gôéena Jacques

¹⁷ Vamatsiga we gô Jérusalem, asi mbumu éaNzambé amatsôkéa we na gényônga.

¹⁸ N’ongôngôe ône Paul amakea na we na gô eba aJacques. Gône tômadenga peeye yambumu éaNzambé amakôkangana.

¹⁹ Paul amakômbôana n’ahngô na amanigôa metso mamayanza Nzambé va gatse ane asaba Ajuif gô mane mameekéda Paul wangô.

²⁰ Vamookô ahngô nane, omee ane amakuméda Kumu Nzambé. Na amavovo na Paul mbe: Muana aTétee n’asô, bangôa ôtangôe ôvôni aAjuif amakogani gômeetsahngô Jésus mitémamie. N’ahngô ahsaagana na mige na mitôma mimatsikéô ahngô na Moïse.

²¹ Ene édagéô ahngô te tsangône éamane meekédewe Ajuif adigaa n’ane asaba Ajuif gô dipo tungu. Ahmookô mbe Paul eekéda mbe: Tsikani mitôma na mige miaMoïse. Na ômavovo mbe: Nômbiageeteda anee wanyô. Nômbiadigaa gô mônongoe ôdigaa Ajuif.

²² ?Tambô tôngeenda nayee? Ajuif angookô mbe Paul atsigi, aka gô Jérusalem.

²³ Tambô gôndé éwe Paul, buedi gôéôkô éne évovo we n’atsatsee. Eva tôndé n’amôgôô anayi amakitsana na Nzambé gévégô.

²⁴ Kea n’ahngô. Gésangana n’ahngô gô gésôga segôgéda yôtô yaô. Vanéaka ahngô gésôgage géngatsubua ahngô miôtsémie. Vane ôngeemôa tsangône éamapanga mbe te ôboe. Muetso angeena na vede mbe tambô n’amuene Paul agobeda mige na mitôma miaMoïse.

²⁵ Gôndé asi mbumu éaNzambé, ane asaba Ajuif ébégôe ésadaga. Tômani étendéa ahngô gésangô mbe: Nômbiaa nyama émadeekedu na gôndé mbumba yegoni. Nômbiaa nzina na nyama disivôvéni. Nômbiakea gô minongo mietso miagésasô.

²⁶ Vane Paul amakea n’amôgôô anayi ane. N’ongôngôe ône amagésangana n’ahngô gôégôgédu ôtôe. Na amakea na gô eba aNzambé gôénigôa oma muetso ôtangôe apitsi ôngadigaahngô gôégôgédu. Vane te gôémenyeda oma nyee ôngadeekeda ahngô Nzambé ôgondoku gôndé ane amagôgéduni môvo môvo.

Paul amatsôpu gô eba aNzambé

²⁷ Pitsi tsambué dimoota, dine dimaba Paul n’akedi gô gésôgage segôgédu. Avo Ajuif agô Asie ameena Paul andé gô eba aNzambé. Ajuif ane amakôva géômbége na gékiba gôétsôpa Paul.

²⁸ Amaadôngana mbe: Akasôni, anye oma aIsraël. Wedéani we na mômôgôône ôdôô. Nôeni, angô te ône eekéda tungu yetso n’oma muetso mbe: Nômbieenda geenda oma aIsraël. Nômbiakenea mige miaMoïse. Nômbiagobeda eba aNzambé. ?Nôseena geendi angô n’atsatsee-a? Eengédi gô eba ôdôô aNzambé ane asaba Ajuif buta mbe abévéda éôma émagôgéani éaNzambé éka na évindô.

²⁹ (Amavovo nane gôébégô nyovo ameena Paul ananga gô Jérusalem na môsi Ephèse inedi Trophime. Na amamenya mbe Paul eengéda angô na gô eba aNzambé gô gétungu géengéa Ajuif atévo.)

³⁰ Diyunga na nzongodi dimookanô gô môsengee wetso. Oma amakumbuga na gésa na gésa. Ahmatsôpa Paul na amamôgogoa gôémôkuséda gô eba aNzambé. Amakukéga dikukéye yetso yeba aNzambé.

³¹ Oma amabaka mbe ayôha Paul. Ivô môtômine amigode miaRomain amookô tsangô mbe: Gôndéké ébégô va kôbangô eba aNzambé. Jérusalem nyetso andé na nyanganyanga.

³² Môtômine asitemé. Amayavôga ékea na migode miedi gôébuéa gômabaka ébitie. Vameena oma môtômine na migodemie miedi ahviga, ahmanzeegeda ébômôa Paul.

³³ Môtômine amawesea na gôndé Paul. Amamôtsôpéda. Amamôkatéda ésengo ébaé. Ameevôa oma mbe: ?Odôô ndaa? ?Eendi nayee?

³⁴ Ivô vamaamugana géômbége, mitangômie miaô mimapengana. Gô nzongodine yaô, môtômine asiôkô gamabandôa ébégôe. Amatôma migode mbe: Ingédani angô gô eba atsôgôô ôvôni.

³⁵ Vamabuéa Paul va pandimô gôéengéa gô eba, amatsôpu na amatsuaô na migode gôébusuga ôpisa agéômbége.

³⁶ Muetso amamôaandani amaadôngana mbe: Yôhani angô.

Paul amanigôa mane medi

³⁷ Vamabaka Paul mbe eengédu gô eba ôvôni atsôgôô, amavovo na môtômine mbe: ?Osinga me nagôbeenda vibégô vievi-a? Môtômine amatsapéô g’ôgi ômavovo Paul na amamôénda mbe: ?Tambô éwe ôsabômu évovo ôgi aGrec-a?

³⁸ Me namenyi mbe éwe te Môégyptien, ône amayungéda mbôkane na nyanganyanga pitsi yedi. Na amakea na mitônisa minayi miamôgôô na gô tsenge émagasani gôévanga gépangô. ?Tambô kaka éwe-a?

³⁹ Paul amanigôa mbe: Me te Môjuif. Namabôtu gô Tarse gô tsenge éaCilicie. Mbôkane éami te môsenge ôsabômanôni. Nagôduka mbe, singéa me navovo n’oma adua.

⁴⁰ Môtômine amasinga. Paul amatema môtie va pandimô va komu eba. Amadékéda géômbége n’ogogo edi mbe: Kôdani. Oma amakôda. Paul amabandôa évovo g’ôgi aAraméen ôôkanô n’ahngô muetso.