Mayanzame 14 - New Testament in Mitsogo

Paul na Barnabas amabuéa gô Iconium

¹ Gô Iconium dôta Paul na Barnabas ameengéa na gô eba agéwanyéô sAjuif. Gô mônongo ômeekedangô, ayekani Ajuif n’ane asaba Ajuif, amakoa matasa maô gôéétsa Nzambé mitéma.

² Ivô avo Ajuif, ane amakina Mabégôme mane, amatinda avo oma na mavovia maô gôédudu ane amasingani.

³ Paul na Barnabas amadinga gô Iconium. Ameekéda na bôkédé. Mitéma miaô mietso te gôndé Kumu Jésus. Nzambé dôta ameetsa mate na amatubéda émbégéa éangudi yedi gôéwanyéda na meekédume maô moonga, mbe ahsapata. Embégée te vameetsô Paul na Barnabas ényanga gôéénda mabégô mavôni manyônganéôni masoongôa môma ésupua.

⁴ Asi môsenge ône amatatôana. Avo gô gésa sAjuif. Avo dôta gô gésa sane amatômukuni.

⁵ Ajuif na ane asaba Ajuif amadigaa n’atômi aô gôévanga gékuanôge géngatubédu Paul na Barnabas. Ameenda mbe: Ayôhu, tumugu na mataé.

⁶ Vamookô Paul na Barnabas tsangône, ahmabusuga na gô tsenge éaLycaonie gôédigaa gô misenge mibaé mindô mbe Lystre na Derbe.

⁷ Ameekéda Tsangô Eamôsôba éaJésus tunguye dine.

Paul na Barnabas amabuéa gô Lystre

⁸ Gô môsenge aLystre gômabaka gékonzo samômôgôô. Bandôa gômabôtu angô asitimôgéké. Amabaka te digaa gômakatangô makôdôme.

⁹ Amookô mane mamavovo Paul. Paul amamôbono na nzôô. Ameena mbe mômôgôône ôdôô asatsuma ngudi yaNzambé paga gôédôngédu.

¹⁰ Amamôtôma n’ogi akangégangé mbe: Ewe, timôga. Tema môtie na makôdôme moo. Mômôgôô nône amatimôga matséda. Amakea amuene.

¹¹ Vameena géômbége éne émayanza Paul, amasôbasôbana. Amaamugana g’ôgie waô aLycaonie mbe: Nzambé abongi gégoni samôma gôésutuméa va gatse asô n’anyô.

¹² Ahmooga eekédie miname mambumbaye yaô. Amooga Barnabas mbe Zeus. Amooga Paul mbe Hermès gôébégô angô te ône amavovokoni.

¹³ V’etumba éambôka gômabaka eba ômaneegedu mbumbane ééndô mbe Zeus. Kumu ambumbane amatsôpéda pagasa dibaé yagô mbôka. Amadiaatéda suadô v’ombaa eba ôngayôhu yangô gôédeekedu. Kumu ambumbane na géômbége setso amanyôngéô édideekeda te gô ina aPaul na Barnabas.

¹⁴ Ivô ahngô abaé amookô ébégôe. Amakaka maduanime maô gôétubéda oma mbe tôsanyôngéô éne ééndéanye we éne. Ameengéa va gatse omee na amaadôngana mbe:

¹⁵ Akasô, oma n’asô ?Nayee nôéndéa we nane? We abaé tôndé oma gandé anye. We tônôtsuéa Tsangô Eamôsôba éaJésus-Christ. Tônôtévéda mbe aaganani na mbumbaye yanyô disaba na tsoongo. Géngôgani na gôndé Nzambé, Kumu amonyo. Angô amakana tsina n’oba na mubu na éetso éndé wangô.

¹⁶ Va mbeego Nzambé amatsika oma muetso gémôanza gôékea gô nzéaye dimanyôngéô ahngô.

¹⁷ Eébéyée nane, amatubéda amuene gôndé môma gô mane mamisôba mamayanza angô gôndé môma nône. Anônyôgédéa mbuua éviga g’ôba. Anôkandédéa mbôtô mbe nôngaa môyakô gô ndéôye yetso. Mitéma mianyô mitsôkéa mane mamisôba meetsô anye n’edi.

¹⁸ Buéyé vamavovo ahngô nane, Paul na Barnabas amabaka na panda gôédékéda omee ane mbe: Nômbiayôha pagasaye gô inasô gôédideekeda mbumbane.

¹⁹ Ajuif amaviga gô Antioche na Pisidie na Iconium gôébuéa na gô Lystre. Amatsongono va gatse agéômbége gôéétsa ahngô étasa mbe: Tôyôhéni Barnabas na Paul. Géômbége ahmatuma Paul na mataé gôémôyôha. Vameenahngô mbe amani éwa, amamôgogoa na gô étumba éamôsenge.

²⁰ Ivô ane ameetsa Jésus mitémamie asimôtsiké. Amamôseta va kôbangô. Vane Paul amatimôga na amanikéa étsiga na gô môsenge gôéeboga wangô. N’ongôngôe ône, angô na Barnabas amakea na gô Derbe.

Paul na Barnabas amanika na gô Antioche éndé gô Syrie

²¹ Paul na Barnabas ameekéda Tsangô Eamôsôba éaJésus-Christ gô môsenge aDerbe. Gône ayekani amakoga aka aneengie aJésus. Vane amoomba énika na gô Lystre na Iconium na épo Antioche éndé gô Pisidie.

²² Amoodeda mitémamie mianeengi aJésus. Amoongô ahngô ndongi gôésipa gô mabégô manzéa éaJésus émeetsangô mitémamie gébé na paga. Ahmeevéda ahngô mbe: N’egéengéaka g’ôkumu aNzambé ôndé g’ôba, éngaba mbe wa n’anyô tôngapanga éena maguga na gékuanô gévôni.

²³ Go tunguye yetso dimawanya asi mbumu éaNzambé, Paul na Barnabas amasevoéa ahngô peeye dingatômani. Ahmadigaa amakina môyakô gôévovo na Nzambé na vane ahmadeekeda ahngô na gô mogo maKumu, ône ameetsahngô mitémamie.

²⁴ Paul na Barnabas amakitsangana tsenge éaPisidie gôébuéa na gô Pamphylie.

²⁵ Ameekéda Mane Mamavovo Nzambé gô Perge. Na amakea na gô Attalie.

²⁶ Gône amapeka gô mbôngône gôékea na gô Antioche. Tambô Antioche te môsenge ômatimôahngô abaé vamabandôahngô môtôôe. Te vamasevou ahngô na vamadeekedu ahngô gôésipédu na Nzambé gô éyanzee ékôdédi ahngô éne.

²⁷ Vamatsigahngô gô Antioche, amakôkanganéda asi mbumu éaNzambé muetso gôéahnigôa mane mamayanza Nzambé n’ahngô. Amanigôa gamakukua Nzambé ômbee gôndé ane asaba Ajuif gômbe eengéa muetso na gô Mabégô medi gémôtsumédô paga.

²⁸ Amamana gô Antioche pitsi diyekani n’ane ameetsa Jésus mitémamie.