Mayanzame 12 - New Testament in Mitsogo

Oma amayôha Jacques ameengéda Pierre gô tsôgôô

¹ Gô ndéô nene môtômi atsenge Hérode, amakuana avo asi mbumu éaNzambé.

² Amayôhéda Jacques na yeenga. Jacques te muanaya aJean.

³ Vameena Hérode mbe Ajuif atsôkéa ôwa aJacques, amatsôpéda Pierre. Te ndéô éasueti éaakô môpemba ôsigésu na lévure.

⁴ Vamatsôpu Pierre, Hérode ameengéda angô na gô eba atsôgôô. Gône amakeneo na éômbé énayi éamigode. Géômbé gévo, migode minayi minayi. Hérode amabaka n’etasa mbe Pierre angatsundédu va mbene oma muetso, te Pâquene émoota.

⁵ Emabaka te nane. Pierre amabaka digaa gô eba atsôgôô amakeneo na migodemie. Asi mbumu éaNzambé amavovo na Nzambé na pitsi n’omanda gôémôduka gôndé Pierre.

Pierre amakusédu gô tsôgôô

⁶ Vamoota Pâquene, te pitsine émabambana na nyoo ôngatsundédu Pierre na Hérode va mbene oma muetso. Pierre ameeboga vio va gatse amigode mibaé gô eba atsôgôô. Amabaka amakatô na panga dibaé. Avo akeneyi atsôgôô amabaka mitie va kôbangô ombee eba atsôgôô.

⁷ Môsi g’ôba amavigédu na Kumu Nzambé amatsiga tsina na tsina. Gévede gévôni gématana gô tsongone émabaka Pierre. Môsi g’ôba amaginya Pierre va tsungu mbe: Timôgaka. Yavôga étema môtie. Vane pangaye dimabaka gô mogo maPierre dimatsôbôga na va tsina.

⁸ Môsi g’ôba amamôtôma mbe: Ditéga môkôdie woo v’oninge. Aataka ponduye. Pierre ameenda gamabeendu angô. Môsi g’ôba amoomba mbe: Aata ngoyine yoo épôni. Aanda me.

⁹ Pierre amakusa gô eba atsôgôô. Môsi g’ôba amoota gô mbene, Pierre amaanda va ngima. Asibangôé mbe: Te môsi g’ôba ôdôô akuséda me na gô pie gô tsôgôô. Amamenya mbe: Me neena te ndoti.

¹⁰ Ahmoota va mbene amigode miava ngenge eba. Ahmoota na va mbene amigode miagô môkii. Ahmatsiga v’okuké amianga agô môgômba ôseta eba wetso atsôgôô. Okukée ône ôkusa na gô môsenge. Omakukuga amuene na ahngô amoota. Vamakeahngô gô nzéa éamôsenge, tsina na tsina môsi g’ôba amatsika Pierre akea amuene.

¹¹ Vane te vamamenya Pierre mbe: Tambô éé kaka ndoti éena me. Endé ti na gô pie. Kumu Nzambé amavigéda môsi g’ôba na gôndé me. Ayuui me gô maguga mabaki me mbe natubédu n’Ajuif. Awaati me gô mogo maHérode.

¹² Vamabangôa Pierre ébégôe na vede, amayavôga ékea na gô eba aMarie, yeene aJean ône amoogu mbe Marc. Oma ayekani amabaka gô ebee ône gôévovo na Nzambé.

¹³ Pierre amabôkéda v’okuké amôgômba. Môgetone inedi Rhode, môyanzine akumu eba, amawesea v’ombaa gôémôkukuéa.

¹⁴ Amabangôa ôgie mbe te ône aPierre. Na asimôkukué môgômba. Amanika na va gatse eba atsôkéa mbe: Akasôni, Pierre aka v’ombaa.

¹⁵ Akedi amamôdékéda mbe: Tsika. Apatéda nane. Ivô tômbône amoomba mbe: Me tsapatéda. Te na gô pie andé v’ombaa. Akedi ahngô mbe: Eé-éé, ôeni te môsi g’ôba avigédiô na Nzambé gôékenea angô.

¹⁶ Andé gôévovo nane, Pierre amoomba ébôkéda v’okuké. Vamagogo ahngô étsumana pagaye amakea gôékanéga ékukua. Ameena Pierre te andé vangô. Ahmakuadima na amasôbasôbana.

¹⁷ Pierre amadékéda ahngô n’ogogo ôtévo mbe: Kôdani. Amanigôa akedi gamakusédu angô na Kumu Nzambé gô tsôgôô. Ameenda mbe: Beendani Jacques na ana a Tétee n’ami muetso. Te angô keaga na gô nyene tungu.

¹⁸ Vamaagiia nyee, migodemie miagô tsôgôô mimakumbuga gôébuta Pierre. Ahmatsapéô gémenye éne émabuéa gôndé Pierre.

¹⁹ Amuene Hérode amatôma omedi gôémôbuta. Pierre asieenanô. Vane Hérode amatsundéda migodemie. Ameetsa ôtômue mbe: Yôhani migodemi mine. Hérode amatimôga gô Judée gôékea môtôô na gô Césarée. Amadunda wangô ôkana apitsi.

Hérode amawa

²⁰ Hérode amabaka ti n’opisa ôvôni n’asi mbôkaye diindô mbe Tyr na Sidon. Asidigéé n’ahngô n’evamba. Tambô asi Tyr na Sidon amabôngôku te na môyakôe agô tsenge éaHérode. Omeaa amavangana gôébuéa na vandé Hérode gôémôduka mbe: Singéa wa n’anyô tôomba évamba. Tôbaké na gétabé. Amavooto môma môvôni, inedi Blastus, gôésungéa ahngô va mbene aHérode. Tambô Blastus te môgode agô eba amuene Hérode. Vane oma amakea n’edi gôévovo na Hérode.

²¹ Gô nyee ômasevouni, Hérode amaata maduani medi mokumaka. Amadigaa gô gédigaa sedi sagéneega v’ekanga gôévovo na omee.

²² Oma muetso amamôkuméda mbe: One avovoni kaka môma. One te nzambéne éasô avovoni.

²³ Oma andé gôémôkuméda nane, môsi g’ôba amavigédu na Kumu Nzambé amamôétsa tsina na tsina ébeea évôni. Otô aHérode wetso ômakaaô na pingô yamikiyô na amawa. Amasisédu nane gômawaatangô Nzambé kumane yedi mbe angô môma akumédu yangô.

²⁴ Ogi aNzambé ômatsanzabana gô mbene na gô mbene.

²⁵ Vamagôga éyanzee éaBarnabas na Saul gô Jérusalem, amanika na gô Antioche. Amakea na Jean atetu mbe Marc.