Mayanzame 1 - New Testament in Mitsogo

Jésus amavovo mbe: Nzambé anganôkudégéa Gédidi Sedi

¹ Wee éami Théophile. Gô gésangô sami samapanga namagônigôa metso mamayanza Jésus na metso mameekédangô, bandôa vamadigaangô va gatse oma,

² ngu na nyee ômatômbu angô na Nzambé na g’ôba. N’egébataka na g’ôba, Jésus te amamana éétsa mitômamie na ndongiye gôndé aneengi edi, ane amasevou na amatômu na amuene Jésus. Amavovo n’ahngô te gô ngudi yaGédidi SaNzambé.

³ Va mbene owedi Jésus amatsutsuga vandé ane amasevoukuni. Amatubéda ahngô gô minongo miyekani mbe: Nabaki g’ôwa, ivô na gô pie me nandé na monyo. Gô nzima yapitsi dinayi dimamana Jésus n’aneengie, amatsutsugaka na vandé ahngô kuka diyekani gôéahnigôa mabégô mokumu aNzambé.

⁴ Nyovo vamadigaa Jésus n’aneengie, amahdékéda mbe: Nômbianôtôga gô Jérusalem. Na amahbeenda mbe: Véngéani ône amavangana Téta Nzambé n’anye. Anganôkudégéa angô ôbiia, gameevéda me anye mbeego.

⁵ Na gô pie Jean amanôbatésa na meba, ivô vangoota pesu andéô Nzambé anganôbatésa na Gédidi Sedi.

Jésus amabata na g’ôba

⁶ Nyovo ane amadenganô na Jésus amamôévôa mbe: Kumu ?ndéône ébuéyi-a? ?Ene éngakôkanganéda éwe oma aIsraël g’ôkumue waô-a?

⁷ Jésus amanigôa ahngô mbe: Esaba gôndé anye gôémenya ndéône na pitsine. Amuene Téta gô ényangedi amamana ésevoa ndéône.

⁸ Menyani mbe anye nôngadiia ngudi vangaviga Gédidi SaNzambé na gôndé anye. Anye nôndéké mbangi yami na nôngatsua tsangô éami gô Jérusalem, na gô tsengeye yetso yaJudée, na yaSamarie, na ngu na tsengeye disibuéôkô na mbeego yagô makôdéô matsinane.

⁹ Vamamana Jésus évovo nane amabata na g’ôba, aneengie aboni nani. Obôngée ômasuéga Jésus va miso maô.

¹⁰ Aneengie amabaka gôébono na gégééba gamabata Jésus na g’ôba. Tsina na tsina oma abaé amaata maduani mavembo amatsutsuga na vandé ahngô.

¹¹ Angô abaé amavovo n’aneengie mbe: ?Anye asi Galilée nôtema gôégébaméa g’ôba gôndé? Jésus ôdôô, atômbiô va gatse anyô gôékea na g’ôba, angô anganika mônongovo geeni anye angô abata.

Môvo amavigana Judas

¹² Aneengie amanôtôga gô môkôdie ôtetu mbe Olivier gôénika na gô Jérusalem. Môkôdie ône ôsatongonéa na Jérusalem vandéké te kilometre épo.

¹³ Gô Jérusalem ameengéa muetso gô tsongo ébakangô kuka yetso gô môgényé agô ngongo. Ane ameengéani te Pierre na Jean na Jacques na André na Philippe na Thomas, na Barthélemy na Matthieu, na Jacques muana aAlphée. Gômeengéa dôta na Simon, ône amabaka gétômbiatômbia gô mabégô matsengene, na Jude muana aJacques.

¹⁴ Ahngô muetso amakôkangana vavo kuka yetso gôévovo na Nzambé. Ahngô na agetoe, na Marie yeene aJésus na aneyee amôgôô aJésus.

¹⁵ Ovo enyaa ône ane ameetsa Jésus mitémamie amawanya vavo. Amabaka ôkana amôkama na nzima dibaé yoma. Pierre amatema va gatse aô. Amavovo n’ahngô mbe:

¹⁶ Ana aTéta asi mbumu éaNzambé, menyani mbe éne émavovo Gédidi SaNzambé va mbeego gô mônya aDavid, na ématendu gô Matendeo MaNzambé, émeenanô. Ebégôe émeevéda mbe: Gôngaba môva angaba môtévédi gôndé ane abuta éyôha Jésus. Môtévédine te môkasô Judas.

¹⁷ Judas amabaka môvo va géômbége sasô, we tômasevouni na tômatômukuni. Ameetsô ôtômue wedi gôéyanza gameetsô we.

¹⁸ (Môma nône amasômba tsaga na dodeye dimabongo angô gô môkôbée wedi. Gô tsaga nene amaaga mavéndavénda. Ebuyi éedi émaatéga. Na miiamie miedi mimaba mika va bobo.

¹⁹ Asi Jérusalem muetso amookô gamawa mômôgôô nône. T’ebandô amooga tungu nene mbe Tsaga Eanzina. G’ôgi aHébreu mbe Hakeldama.)

²⁰ Oôkôni éne ématendu gô miganda miaMimbô mbe: Engaba mbe ebedi ôngatôtu Gôsangadôdigaa môma. Na ématendu dôta mbe: Gôngaba muene angaviagana g’ôtômue wedi gôéyanza.

^21-22 Tambô tôbuténi mômôgôône angaba gô géômbé sasô n’anyô tômatômukuni. Eyanzee éasô n’anyô n’edi tôndé mbangi gôétsua tsangô gamakunduga Kumu Jésus g’ôwa. One angatôsevoani ône, tôbonéni môvo amadenganô vamatôkea pitsi yetso na tungu yetso dimatôkénga na Jésus. Bandôa gô ndéô émeetsô Jésus bateme na Jean, ngu na nyaa ône ômatômbu Jésus na Nzambé va gatse awa n’anyô gôékea na g’ôba.

²³ Ane amadenganô amasoou mina mabaé mbe angasevoa môvo. Môvo môma te Joseph ameendô mbe Barsabbas na Justus. Môvo dôta te Matthias.

²⁴ Vane muetso amadenganôni amavovo na Nzambé ôgi ôvo mbe: Kumu, éwe ôsabômu mitéma mioma muetso. Tubéda we ône asevoyi éwe va gatse omee abade adua.

²⁵ One anyôngéô éwe gôéviagana Judas gô éyanzee na gô ényangee éane amatômukuni. Gôébégô Judas amatsika gétunguge sedi gômakeangô na gô sene gétungu gémasevoangô amuene.

²⁶ Vane omee amatséva na nzéké gôésevoa môvo va gatse amina mabaé mamasouni. Nzékéne émasevôa te ina aMatthias. Na vane Matthias amadugéda ôtangôe anzima na amôgôô abaé amatômukuni.