Matthieu 8 - New Testament in Mitsogo

Jésus amadôngéda môsi ébeea éagega (Bono na )

¹ Vamasuma Jésus gô môkôdi, géômbé gévôni soma gémamôaanda.

² Vane môsi ébeea éagega amaviga na gôndé Jésus. Amasiba mabongo medi va mbene aJésus na amamôgondo mbe: Kumu ôkô mbe ônyôngéô ôsadagéô édôngéda me.

³ Jésus amakonyo ôgogo edi na amamôbanda. Amamôaabéa mbe: Nanyôngéô égôdôngéda. Odôngi. Tsina na tsina ébeea éedi éagega émadônga.

⁴ Na vane Jésus amamôdékéda mbe: Ombiabeenda ta na môma môvo. Na amamôtôma mbe: Kiaka, ôkétubéda ôtôe woo gôndé môdeekedi adigondoku. Oétsa ôgondoku ômatôma Moïse mbe oma angamenya mbe, ôdôngi.

Jésus amadônéda môyanzi amôgode môsi Rome (Bono na )

⁵ Vamatsiga Jésus gô Capernaüm, tsesu amôkama amigode amawesea na gôndé Jésus na amamônemba mbe:

⁶ Môyanzi ami andé gô eba yama v’ekoko. Otôe wedi ôkati. Ookô ti pievia épôni.

⁷ Jésus amamôaabéa mbe: Nangaviga gôémôdôngéda.

⁸ Tsesu amigode amamônikéda mbe: Kumu, me tsaba kuanakue gôébambéa éwe mbe ôviga na gô ebami. Vovoko te n’ogi ôtévo. Môyanzine wami angadônga.

⁹ Me dôta nandé gô tsina otômu apeyami. Na me, nandé na migode g’ôtômue wami. Natôma môvo mbe: Kiaka. Akea. Natôma môvo mbe: Viga. Aviga. Natôma môvanzi ami mbe: Inda nani. Angô eenda.

¹⁰ Vamookô Jésus ôgie ône amasôbasôbana. Na amabeenda ane amamôaandakani mbe: Buéyé gô éongo éetso éaIsraël me madeo tsiena môma ga ôdôô asatsuma ngudi yami paga.

¹¹ Nanôbeenda mbe oma ayekani angaviga gô gésa géviga kômbéne na gô gésa gékea yangô. Angadigaa tabudé épo na Abraham na Isaac na Jacob g’ôkumu aNzambé.

¹² Ivô avo asi éongo éaIsraël angagunyu gô mbadi gô tsina evitsi. Wangô angadéa miéngé na angagéa ngeko gô pievia yaô.

¹³ Na vane, Jésus amatôma tsesu amigode mbe: Kiaka. Ene éduki éwe éngeenanô gôsitsuma éwe ngudi yami paga. Na émabaka te nane. Môyanzine wedi amadônga te gô ndéô nene.

Jésus amadôngéda oma ayekani (Bono na )

¹⁴ Na vane, Jésus amakea na gô eba aPierre. Wangô ameena ôgoyi aPierre, yeene amôgayedi andé yama abeea nzônzônzô.

¹⁵ Jésus amamôbanda g’ôgogoe na nzônzônzône émadônga. Môgetone amatimôga na amaambéa Jésus.

¹⁶ Na dikoo, oma amakea na gôndé Jésus na pingô oma amabaka na édidi ébévani. Jésus amapatsa édidie éne n’ogi edi ôtévo. Amadôngéda oma muetso amabeeakani.

¹⁷ Vane mabégôme mamavovo Esaïe môpandôédi amatasa maNzambé mameenanô. Esaïe amavovo mbe: Amabongo dipôpéa yasô. Na amanôtôa mabeea masô.

Ndongi gôndé ane anyôngéô ékea na Jésus géômbé gévo (Bono na )

¹⁸ Jésus ameena géômbé gévôni gô kôbangô edi. Ameenda mbe: Okani na gô dipo tsényé yamubu.

¹⁹ Mônigôi amige miaNzambé amawesea ne gôndé Jésus na amamôbeenda mbe: Môékédi, nangakea n’ewe na gô tungu yetso dingakeewe.

²⁰ Jésus amamônikéda mbe: Ngômba dindé na makii maô. Nyoyi dindé na mebu maô. Ivô me Muana Amôma, tsaba na gédigaa seebôga na seedunda.

²¹ Môvo môneengi aJésus amabeenda Jésus mbe: Kumu, kokoo yeewe, inda me napanga égunyéda téta.

²² Ivô Jésus amamônikéda mbe: Oka géômbé gévo n’ami. Ane amawani agunyédéké anguene.

Jésus amadékéda gékunga (Bono na )

²³ Jésus amapeka gô mbôngône n’aneengie edi.

²⁴ Tsina na tsina gékungage gémakungéda na miyôkiyôkimie mimeengéa na gô mbôngône. Jésus te andé gô viô gô mbôngône.

²⁵ Aneengie amawesea na vandé Jésus gôémôtimôa. Amaamugana mbe: Kumu, wedéa we kabaga tôwa.

²⁶ Jésus amaabéa ahngô mbe: ?Anye nôena gomo na nôtatéa nayee? ?Tambô nôgétsumaka ngudi yami paga‐a? Jésus amatimôga na amadékéda gékungage na miyôkiyôkimie. Vane mubue ômaba na sinzii.

²⁷ Aneengie muetso amasôbasôbana na amatsapéô mbe: O mônongo amôma ôgobedu na gékunga, buéyé na miyôkiyôkimie.

Jésus amadôngéda amôgôô abaé amabaka n’edidi ébévani (Bono na

²⁸ Jésus amabuéa gô dipo tsényé yamubu gô tsenge émadigaa Agadarénien. Amôgôô abaé amadigaaka gô tungu éangii amaviga na vandé Jésus. Omee ane amabaka n’edidi ébévani éadibagaa. N’akaô asiôngôé éôta gô tungune émabakahngô.

²⁹ Amôgôôe ane amaadôngana mbe: ?Ewe Muana ANzambé ôbé nayee n’asô? ?Tambô ôvigi gôésiséda we ndéône madeo ésibuéa‐a?

³⁰ Va tungu nene vasitongonéké na vamabaka ôbuée angudu ômakiaka ôaa.

³¹ Edidie ébévani émavovo na Jésus mbe: Okô ônyôngéô ékuséda we gôndé omeaa, tambô singa we tôengéa g’ôbuée angudu ôdôô.

³² Jésus amatôma éangô mbe: Kiakani. Edidie ébévani émakusa gôndé amôgôôe ane na émakea gôéengéa gô nguduye. Tsina na tsina ôbuée wetso ômasuma môkôdie na gô mubu na ômatôndôméa.

³³ Akeneyi anguduye amabusuga tungu nene amayavôga ékea na gô mbôka gôénigôa akôa tsangône gamakusédu amôgôôe abaé ane édidie ébévani.

³⁴ Vane asi mbôkane muetso amakea gôéwanyéda Jésus. Vameenahngô Jésus ahmamôvooto mbe: Kokooye éwe, nôtôga gô tsenge éasô.