Matthieu 7 - New Testament in Mitsogo

Nômbieeséda akanyô (Bono na 41–42 )

¹ Nômbieeséda akanyô kabanga anye nôesédu na Nzambé.

² Gôébégô Nzambé anganôeséda gô mônongoe ôesédanye akanyô. G’ôkanee ôkanéganye akanyô, na Nzambé anganôkanéga te mônongovo.

³ ?Nayee ôena tsengesengene éndé gô ésoe amôkoo na éwe ôseena éengôe éndé gô ésoe yoo?

⁴ Ewe ôndé n’eengô gô ésoe yoo ?nayee ôôngôa évovo na môkoo mbe: Wee ami, singéa me nagônôtôa tsengesengene éndé gô ésoe yoo?

⁵ Ewe te môma enyepa éamônya. Panga énôtôa éengôe éndé gô ésoe yoo. Vane ôngeenéa na vede gôénôtôa tsengesengene éndé gô ésoe éamôkoo.

⁶ Nômbieetsa inzua yôma éamisôba kabaga digéngôga gôénômbata na gôébunzéa anye. Nômbiagunya sôma soo sosunu ôvôni na vandé ngudu, kabaga diyeta sangô va tsina.

Dukani, butani, bôkédani v’okuké (Bono na )

⁷ Dukani na môvinéné, na nôngeetsô. Butani na môvinéné, na nôngadenga. Bôkédani v’okuké na môvinéné na nôngakukuéô.

⁸ Muetso aduka no môvinéné angadiia. Muetso abuta na môvinéné angadenga. Muetso abôkéda na môvinéné angakukuéô ôkuké.

⁹ ?Môma ndé va gatse anyô angeetsa muanedi étaé ôkô amôduki môyakô?

¹⁰ Okô muana amôduki nyama yagô mbéyi ?tétedi angamôétsa nyongoo‐a?

¹¹ Buéyé anye oma abévani, nômenya éétsa ananyô yôma éamisôba ?tambô na Tétanyô ône andé g’ôba, asangootéa éétsa anye yôma éamisôba gôndé anye nômôdukani‐a?

¹² Indakani akanyô éne ényôngéô anye mbe akanyô anôéndéa. Amuene Moïse amatôtôma te nane. Na apandôédi amatasa maNzambé amavovo te nane.

Meekédu mokuké ôgeôge (Bono na )

¹³ Ingéani v’ombaa ôgeôge. Gôébégô ômbee ôvôni na nzéane épôni ékeda môma na gôébungana. Oma ayekani akea gô yangô.

¹⁴ Ivô ômbee ôgeôge na nzéane ékeke, te yangô ékeda môma na gô monyo. Gôsaba oma ayekani akea gô yangô.

Meekédu magéétété na miônda miedi (Bono na )

¹⁵ Wemai gôndé eekédi adiboe. Aviga na va gatse anyô ga mandombo, tambô gô mitéma miaô te ga nzego.

¹⁶ Anye nôngamenya angô te gô ésima éaô. ?Môma anenga masagu gô minzembe‐a? ?Na môma abénza mbida gô gétsagaa‐a?

¹⁷ Géétété samôsôba gébôta te miônda miedi miamisôba. Na géétété gébévani gébôta te miônda miedi mibévani.

¹⁸ Géétété samôsôba gésoongôa ébôta miônda mibévani na géétété gébévani gésoongôa ébôta miônda miamisôba.

¹⁹ Eétété éetso ésabôta miônda miamisôba éngawangô na éngabéku gô soto.

²⁰ Anye nôngamenya eekédi adiboe gô ésima éaô.

Me tsanômenya ta na pesu (Bono na

²¹ Kaka muetso ateta me mbe: Kumu, Kumu, angeengéa gô tsenge éami éag’ôba. Ivô ane eenda éne ényôngéô Téta ône andé g’ôba, te ahngô angeengéani.

²² Gô nyee ône, ayekani angavovo n’ami mbe: Kumu, Kumu, gô inoo tômapandôéda ndongi dimeetsô we na Nzambé. Tômakuséda édidi ébévani gôndé oma te gô ngudi yainoo. Na dôta tômayanza émbégéa évôni na éyékani te gô ngudi yainoo.

²³ Vane nangavovo n’ahngô v’ekanga mbe: Me tsanômenya ta na pesu. Nôtôgani na gôdagôda n’ami, anye eendi amabégô mabévani.

Meekédu mayeba dibaé (Bono na

²⁴ Muetso ookéô mabégôme mavovo me na agobeda mangô andé ga môma eodo amasaa ebedi gô tungu éndé toto na mataé.

²⁵ Mbuuane émanyogo. Géningôge gémaviga. Ekunga émakungéda na ématinda ebee. Ivô ebee ône ôsikuéé gôébégô ômasipa gô tungu éamataé na toto.

²⁶ Ivô ône ookô mabégô mavovo me na angô asagobeda mangô andé ga mômane apaga, amasaa ebedi va tungu éamisige.

²⁷ Mbuuane émanyogo. Géningôge gémaviga. Ekungee émakungéda na ématinda ebee. Ebee ône ômakuéa na ômapanzéga.

Enyangee éndé na Jésus

²⁸ Vamamana Jésus évovo mabégô mema, oma muetso amasôbasôbana na amatsapéô gô meekédume mameekédangô.

²⁹ Asiikédé mônongovo gameekéda eekédie waô anigôi amige mia Nzambé. Ivô Jésus ameekéda n’enyanga évôni.