Matthieu 28 - New Testament in Mitsogo

Jésus amakunduga (Bono na )

¹ Nyee edunda aAjuif ômoota. Vamageeô manyaa tsono, Marie môsi Magdala na mavo Marie amakea na gô ngii.

² Tsina na tsina tsinane ématatéa pepe. Môsi g’ôba amavigédu na Nzambé na amakandanganéda étaé na va kôbangô angiine. Amadigaa gô ngongo etaé.

³ Amaba na ngeengéyi ga môkadikadi na maduani medi mamabaka na vee ga ôbôngé.

⁴ Migodemie mimatatéa na gomo na mimakoga ga oma amawani.

⁵ Môsi g’ôba amabandôa évovo n’agetoe mbe: Gôndé anye navovo mbe nôneena gomo. Anye nôbuta Jésus, ône akomediôkô va gésuma sowa.

⁶ Asabadô éva. Akundugi gameevédangô. Vigani nôviena tungune éyamédiôkô angô.

⁷ Yavôgani ékea. Nôkebeenda aneengi edi mbe: Akundugi. Oobégéyi na gô Galilée. Nôngamôdenga te gône. Nôeni, te ené évigi n’ami gôénônigôa.

⁸ Agetoe amayavôga énôtôga va ngiine. Amookô gomo. Ivô gô gomoe waô amatsôkéa na amakea pita gôétsua tsangône na gôndé aneengie aJésus.

⁹ Tsina na tsina Jésus amawanya n’ahngô. Na amasambanéa n’ahngô. Agetoe amawesea na amagudama na gô tsina gôémôbanda makôdôme na gôémôneegeda.

¹⁰ Jésus amasuméda ahngô mitémamie mbe: Nôneena gomo. Kiakani nôkebeenda ana aTétee n’ami mbe: Kiakani na gô Galilée. Nôngeena Jésus te gône.

Tsangô émanigôa migode

¹¹ Vamanika agetoe na gô mbôka, mivo migode dôta mimakea na gô mbôka gôénigôa tsesuye yadeekedi adigondoku mane mamabuéa vamabakahngô gôéwema ngiine éaJésus.

¹² Tsesuye yadeekedi adigondoku amadigaa gô kundu na peeye yAjuif. Amavangana mbe: Tôngeetsa migodemie ôkabô adode gôémivooto kabaga anigôa môma éne émeenahngô.

¹³ Amatôma migode mbe: Nôvovo te mbe: Gômeeboga we na pitsi, aneengie aJésus amaviga gôéesua nzumbine.

¹⁴ Okô môtômine atsenge ookiô tsangô nene, we avo tôndé na ngudi gôékônza n’edi ébégôe, na gôénôsungéa.

¹⁵ Migode amabongo dodeye na amookô ndongi dimeetsô ahngô. T’ebandô tsangô nene ématsanzabana va gatse Ajuif ngu na deo noo.

Jésus amatsutsuga vandé aneengi edi (Bono na )

¹⁶ Aneengie, nzima na môvo amakea na gô Galilée gôébuéa gô ngongo amôkôdi gamavangana ahngô na Jésus va mbeego.

¹⁷ Vameena aneengie Jésus amamôneegeda. Ivô avo va gatse aô amatsuma paga.

¹⁸ Jésus amawesea na vandé ahngô na amanigôa ahngô mbe: Otômue wetso ava tsina na ône ag’ôba ômeetsô te me.

¹⁹ Te ébandô nanôtôma mbe: Kiakani na gô tsengeye yetso. Ikédakani oma muetso gôéba aneengie ami gôékea nzéepo n’ami. Nôétsa ahngô bateme gô ina aTéta Nzambé, na Muanedi Jésus, na Gédidi sedi Sapie.

²⁰ Nôékédaka ahngô gôégobeda mabégô metso mamatôma me anye. Bangôani ébégôé édué. Me nandéké n’anye pitsiye yetso ngu na vangakôdéa tsengene.