Matthieu 27 - New Testament in Mitsogo

Jésus amabaka môtie gôétsundédu na Pilate (Bono na )

¹ N’ongôngôe wetso tsesuye yadeekedi adigondoku na peeye yAjuif amabuta mônongoe ôngayôhu Jésus.

² Amakata Jésus gésengo na amakea n’edi na gôndé Pilate môtômine atsenge.

Owa aJudas (Bono na

³ Judas, môkabine aJésus ameena mbe Jésus eesédu gôéyôhu. Vane amakoa matasame na amanyôngéô éyuéga gô ébégôe. Amanikéda dodeye na gôndé tsesuye yadeekedi adigongoku na peeye yAjuif.

⁴ Amavovo mbe: Gôkabi me môma agébé n’ôési mbe ayôhu, me neendi ébégô ébévani. Amôgôôe amaabéa angô mbe: We tôsaba gô éne. Ene ébégô te éômuene.

⁵ Judas amagunya dodeye gô eba aNzambé na amakea gôéaditéga amuene gôéwa.

⁶ Tsesu yadeekedi adigondoku amadingôa dodeye na amanigôana mbe: Mige miasô misasinga we tôkuya dode yedi gô gévumbéô sadode yagô eba aNzambé. Dode yedi dimasômba nzina yamôma.

⁷ Amadigaa gô kundu na amavanga mbe dodeye dine dingasômbu tungune éngasigô ngiiye yagenda. Tungu émasevôuni émabaka tsaga éamôsaayi ambéka yamabôô.

⁸ T’ebandô ngu na deo noo gétunguge géne gétetu mbe Gétungu Sanzina.

⁹ Gô mabégôme mane gôenanô éne émavovo Jérémie, môpandôédi amatasa maNzambé mbe: Amabongo nzima ditatô yayabi yadode, te ôsunue ômavanga avo Ajuif mbe ôsunue edi te nane,

¹⁰ na amasômba tsaga émadigaa môsaayi ambéka yamabôô. Te gamavovo Kumu Nzambé na me, Jérémie.

Pilate amatsundéda Jésus (Bono na )

¹¹ Jésus amatema va mbene aPilate gôétsundédu. Pilate ameevôa angô mbe: ?Ewe te môtômine aAjuif‐a? Jésus angô mbe: Otsimi.

¹² Vane tsesu yadeekedi adigondoku na peeye amamôsunda mabégo mayekani. Jésus asisiié.

¹³ Pilate ameevôa Jésus mbe: ?Ewe ôsookô gayeka misundamie gô mane mameendewe‐a?

¹⁴ Ivô Jésus asibiké ta n’ebégô évo. Pilate amatsapéô pepe.

Jésus amatsundédu gôéwa (Bono na )

¹⁵ Te gésima saPilate gô sueti yetso yaPâque akuséda môvo môsi gô tsôgôô. Akuséda te ône anganyôngéô géômbége.

¹⁶ Gômabaka môsi tsôgôô môvo amamenyanganôni inedi te Barabbas.

¹⁷ Pilate amavovo na géômbége gémadenganôni mbe: Sevôani ône anyôngéô anye mbe akusa ?Nanôkusédéa te Barabbas, vo manôkusédéa te Jésus, ône eendô mbe Christ‐a?

¹⁸ Gôébégô Pilate asibômu mbe tsesu yadeekedi adigondoku ameetsa angô Jésus‐Christ gô ngusu éaô.

¹⁹ Vamadigaa Pilate gô eba amisoso gôétsundéda ébégôé, môgayedi amakudéga angô ôgie mbe: Me na pitsi neeni panda na ndotine éeni me gôndé mômôgôô nône. Ombiakuyaméa gô ébégôe éne. Môma nône asaba n’oési.

²⁰ Tsesu yadeekedi adigondoku na peeye amoonguma na géômbége mbe: Nôenda te Pilate mbe: Kuséda Barabbas gô tsôgôô. Jésus ayôhu te yôhgu.

²¹ Pilate amoomba évovo. Angô mbe: Vandé ahngô abaé ?Nônyôngéô nakuséda ndaa? Ahngô muetso amavovo mbe: Okuséda te Barabbas.

²² Pilate ameevôa ane amadenganôni mbe: ?Neenda nayee na ône atetu mbe Jésus‐Christ? Ahngô muetso ahmaabéa mbe: Ayôhu te yôhgu. Akomedu te va gésumu sowa.

²³ Pilate amanikéda ahngô mbe: ?Ebégô ndé ébévani émeendangô? Géômbége amaadôngana mbe: Awa te va gésumu géyôhu oma.

²⁴ Vane Pilate amatsapéô. Ameenda mbe: Me tsabadô n’ogi. Oma anguene n’anguene amabandôa étsangatsangana gôévévéa ane asibaké n’ahngô étasevo gôéyôha Jésus. Na vane Pilate amabongo meba. Amoovôa mogome va mbene oma muetso. Pilate amavovo mbe: Bongoni ébégôe. Me tsaba g’ôwee amômôgôô nône. Nômôyôhéyee, nôsamôyôhéyee, memuene Pilate nayuégi gô éne.

²⁵ Géômbége setso gémamôaabéa mbe: Yuégaka. Owee wedi ôngaba te gôndé we n’anasô.

²⁶ Vane Pilate g’ôtômue enyangee yedi ameenda migodemie mbe: Nôbita Jésus na mibitô. Na Pilate amadeekeda géômbége Barabbas na Jésus. Barabbas amanzeegedu. Jésus amakomedu gô gésumu sowa.

Migode mimakeenga Jésus (Bono na )

²⁷ Migodemie mimakea na Jésus na gô wene môkii gô gatse eba amôtômine atsenge. Na géômbége samigode gémaseta Jésus.

²⁸ Amamôsasa mikandamie gôémôaatéda wene atsoo.

²⁹ Amamôdipea ngundu éamingôô gôégudéga yangô gô môtsé aJésus ga gépôkôdô sokumaka. G’ôgogo edi ômôgôô amamôétsa péndé gôékanéga yangô na môtunga okumaka. Vane amasiba mabongo maô va mbene aJésus gô dienza yaô amamôkômbôa mbe: Sambaa. Sambaa, môtômine aAjuif.

³⁰ Amamôkisuéa mate. Amamôyogo na péndé gô môtsé.

³¹ Vamamanahngô émôdeta ahmamôsasa môkandee atsoo. Ahmamônikéa éaatéda môkandedi. Vane ahmamôkuséda na gô mbadi gôémôkomeda va gésumu sowa.

Jésus amabôkédu va gésumu sowa (Bono na

³² Vamakeahngô amawanya gô nzéa na môsi Cyrène, inedi Simon. Migodemie ahmamôtindéga gôétsua gésumuge géngayôhu Jésus.

³³ Ahmakea na Jésus na gô tungu étetu mbe Golgotha. Evéndégéô mbe tungu éakokoh amôtsé.

³⁴ Gône, migode ahmeetsa Jésus maduku mamagésu na maganga manganye gôémanyua. Amabémba mangô na amakina ényua.

³⁵ Vane ahmamôkomeda va gésumu. Ahmakabana maduani medi. Ahmatséva na nzéké gôébuta édiia éduanie éne énganyôngéô ahngô.

³⁶ Vane migodemie mimadigaa va tsina agésumuge gôéwema Jésus.

³⁷ Gô gésumuge va ngongo amôtsé aJésus gômatendu môtsundue ômayôhu angô. Gômatendu mbe: Odôô te Môtômine aAjuif.

³⁸ Ahmakomeda dôta n’asi môkôbé abaé va ésumu éowa va kôbangô aJésus. Môvo gésa gémôgôô. Môvo gésa gégeto.

³⁹ Ane ahmootaka v’angô amadogima miôtsé miaô na amadeta Jésus

⁴⁰ mbe: Ehee. Ewe, ka te ômeendaka mbe: Me nangapanzéda eba aNzambé nasaa wene gô pitsi ditatô. Tambô ôkô mbe éwe te Muana ANzambé, yuégadôvôye gô panda yoo vandé éwe va gésumu sowa vane.

⁴¹ Te mônongovo, tsesu yadeekedi adigondoku, n’anigôi amige miaNzambé na peeye yAjuif amadeta Jésus na ahmavovo mbe:

⁴² Amanôtôa akedi gô panda yaô, géé amuene, asangoongôa. ?Nôéndi mbe angô te Môtômi aIsraël‐a? Tambô asutuméké va gésumuge vandé angô vane. Okô tôeni angô asutuméa we tôsangadôtsuma paga.

⁴³ Môtémedi wetso ômabaka te gôndé Nzambé. Amavovo mbe: Me te Muana ANzambé. Ehee. Aanakani gangoobou angô na Nzambéne yedi.

⁴⁴ Na asi môkôbé abaé amabôkédu va kôbangô aJésus na gésa na gésa amamôtoko te mônongovo.

Jésus amawa (Bono na )

⁴⁵ Bandôa vatsakama kômbéne ngu na vatengama yangô, tsengene nyetso émbaka te évitsi.

⁴⁶ Vamatengama kômbéne Jésus amaadôngana mbe: ?Eli lema sabachthani? Evéndégéô mbe, Nzambé ami. Nzambé ami. ?Otsiki me nayee?

⁴⁷ Avo ane amadenganô vangô ahmookô Jésus adôngana, ahmavovo mbe: ?Nôôkiô? Abambéa môpandôédi amatasa maNzambé, ône ambeego eendô mbe Elie.

⁴⁸ Môvo va gatse aô amabongo sôma géndé ga ébuyo géviva meba. Amayavôga ékuya sangô gô meba manganye. Amapatéga sangô gô péndé. Amabôgôa sangô na va mônya aJésus mbe aviva sangô.

⁴⁹ Ivô avo amavovo mbe: Nôvénga. Tôbéena gamahviga Elie gôémôpôtôô va gésumuge sowa géne.

⁵⁰ Vane Jésus amoomba éaamugana na gô ngongo. Te n’angô wakagane.

⁵¹ Tsina na tsina ômbôe agô eba aNzambé ômaatéga bandôa gô ngongo ngu na gô tsina. Tsinane ématatéa. Dibobo dimabôéga.

⁵² Ngiiye dimakukuga na ayekani asi mbumu éaNzambé amawani amakunduga.

⁵³ Amakusa gô ngiiye. Va mbene agékundugéô saJésus, ahngô muetso ameengéa na gô Jérusalem na ameenanô n’oma ayekani.

⁵⁴ Môsi Rome, môtômi amigode, na migode miedi mimabaka gôéwema Jésus, ameena gamatatéa tsinane na mavo mabégô mamabuéani. Ahmookô gomo. Ahmavovo mbe: Na gô pie, ôdôô te ti Muana ANzambé.

⁵⁵ Gômadenganô n’avo ageto ahndé gôdagôda ahmabono Jésus. Ahngô muetso ahmakea na Jésus géômbé gévo bandôa gô Galilée gôéyanzéa angô.

⁵⁶ Va gatse aô gômabaka Marie, môsi môsenge aMagdala, na Marie yeene aJacques na Joseph, na gômabaka dôta yeene anee aZébédée.

Jésus amagunyu gô ngii (Bono na )

⁵⁷ Vameeda nyee, mômôgôô môvo amaviga, angô gékiti môsi môsenge aArimathée. Inedi te Joseph. Amabaka môneengi aJésus.

⁵⁸ Amakea na gôndé Pilate gôémôduka ôtôe aJésus. Pilate ameetsa ôtômu mbe: Itsani Joseph nzumbine éne.

⁵⁹ Joseph amadipa nzumbine gô môkanda avembo osunu ôvôni.

⁶⁰ Amamôgunya gô ngiine éeduku éamôdungutu émasigédangô gô tsina amôkôdi amataé. Ngiine te éamuene Joseph émeendahngô mbe: Nangagunyu te gô yangô. Amakandanganéda étaé évôni gôékukéga ngiine, na amakea.

⁶¹ Marie, môsi Magdala na mavo Marie amabaka digaa tsényé na tsényé na ngiine.

Migode mimakenea ngiine

⁶² Ovo enyaa ône, te nyaa ômamana Ajuif ékônza mabégô maô manyee edunda, tsesuye yadeekedi adigondoku na Apharisien amakea na gôndé Pilate.

⁶³ Ahngô mbe: Môtômi asô, we tôbangôa gamavovo môpatine ôdôô vamabakangô agédôngaka. Amavovo mbe: Vangoota pitsi ditaô me nangakunduga.

⁶⁴ Tambô itsa ôtômu mbe ngiine ékekeneo na migode pitsi ditatô kabaga aneengi edi aviga gôéesua nzumbine na kabaga avovo mbe: Atimôgi g’ôwa. Vane ôboe amôyusumédu ôngootéa ône amapanga.

⁶⁵ Pilate angô mbe: Migodemie miangô mine. Kiakani. Nôkekenea ngiine ti wemaga.

⁶⁶ Amakea. Amananéga gémbégéa samôge amôtômi atsenge mbe: Nômbiabanda. Na migode mimatema gôékenea ngiine.