Matthieu 25 - New Testament in Mitsogo

Tsava éanzima atômbô waé yamuébee

¹ Okumu aNzambé ôgono na ébégô édué. Nzima atômbô waé yamuébee ahmakea na dambi yaô gôéwanyéda kumu ayômba, mômé amôkaô.

² Tômbô ditayi ahmabaka n’eodo. Ditayi dôta ahsibaké n’eodo.

³ Ane asibaké n’eodo ahmakea te dambi ditévo gétsué pitidodi.

⁴ Ane ahmabaka n’eodo ahmatsua dambiye yaô na ahmatsua na pitidodi.

⁵ Mômôgôô, kumu ayômba amadinga éviga. Tômbôye yetso ahndé gôévéngéa angô ahmeeboga vio.

⁶ Va gatse apitsi ahmookô ôgi ôadôngana mbe: Kumu ayômba avigi, vigani gôéwanyéda angô.

⁷ Tômbôye yetso dimatimôga. Ahmabosoo dambiye yaô.

⁸ Ane ahsibaké n’eodo ahmaduka akaô mbe: Itsani we pitidodi. Dambiye yasô dimani éema.

⁹ Ane ahmabaka n’eodo amaabéa mbe: Aé. Tôsangaduganéô wa n’anyô muetso. Kiakani gôésômba gôndé ane ahsômbédakani.

¹⁰ Vamakeahngô atayi, gôésômba pitidodine, mômôgôô nône, kumu ayômba amatsiga. Akaô atayi ahmabaka kuanakue gôévéngéa angô ahmeengéa n’edi na gô eba gôéaa sueti éayômba. Ebee ômabandéku.

¹¹ Va mbene éne, ahngô atayi ahsibaké n’eodo ahmatsiga na gô eba. Ahngô mbe: Kumu ayômba, kukuéa we.

¹² Ivô kumu ayômba amaabéa mbe: ?Anye yandaa? Me tsanômenya. Amapatsa ahngô.

¹³ Jésus angô mbe: Bakani misiki. Anye nôsamenya pitsi. Nôsamenya ndéô.

Tsava éayanzi atatô (Bono na

¹⁴ Oôkôni tsava nedué. Gômabaka mômôgôô môtômine amanyôngéô ékea môtôô. Amabambéa ayanzi edi gôétubéda ôkitie wedi.

¹⁵ Amakabéa ayanzie ôkitie wedi, môma na môma ngu na mônongoe angudiye yedi. One amapanga amamôétsa dode yedi yabi ditayi. One amôbaé amamôétsa dode yedi yabi dibaé. Na ône amôtatô amamôétsa dode yedi yaabi ôvo. Vane môtômine amakea.

¹⁶ Môyanzine ameetsô yabi ditayi amakea na yangô gôéyanza ôyôkô. Dodeye dine dimoomba ékuséda yene yabi ditayi yadode.

¹⁷ Na ône ameetsô yabi dibaé amayanza te mônongovo. Dodeye yedi dimoomba ékuséda yene yabi dibaé yadode.

¹⁸ Ivô ône ameetsô abi ôvo amakea akesigéa dodeye gô tsina gôésuéga yangô.

¹⁹ Vamoota ndéô épôni, môtômine ayanzie amaviga. Amadigaa n’ayanzie gôétubédu dodeye.

²⁰ Môyanzine amapanga, ône ameetsô yabi ditayi amamôtubéda yene ditayi na amamônigôa mbe: Kumu ami, éwe ômeetsaka me dodeye yami yabi ditayi vamakewe. Oeni yene ditayi dikusi gôyanzi me na dine yoo.

²¹ Môtômine amamôsénga ôséngu mbe: Mamisôba. Ewe môyanzi amavôma. Omagobeda me gô mane masibaké na tsoongo épôni, tambô nagôétsa mane mootéa na tsoongo. Viga tôtsôkéké, wa n’oo.

²² Môyanzine ameetsô yabi dibaé amaditubéda môtômine. Na amamônigôa mbe: Kumu ami, éwe ômeetsaka me yabi dibaé vamakewe. Oeni, yene dibaé dikusi gôyanzi me na dine yoo.

²³ Môtômine amamôsénga ôséngu mbe: Mamisôba. Ewe te môyanzi amavôma. Omagobeda me gô mane masibaké ne tsoongo épôni, tambô nagôétsa mane mootéa na tsoongô. Viga tôtsôkéké, wa n’oo.

²⁴ Môyusumédue te môyanzine ameetsô dode yedi yaabi ôvo. Amaningôa môtômine mbe: Kumu ami, me tsibômuku mbe môtômine wami te môma môdagani. Aa môyakô angô gépangé égaaba. Akuéga migônô angô gépangé émikandéda.

²⁵ Gômookô me éwe gomo, namakea gôésigéa dodeye yoo gô tsina. Oeni, dodeye yoo yangô dine.

²⁶ Môtômine amamôsemba tsembô mbe: Ewe môyanzi môbévani ôsanyôngéô éyanza. Osibômu mbe me naa môyakô me gépangé éôgaaba. Nakuéga migônô me gépangé émikandéda.

²⁷ Tambô éwe, mbe ômasuéga dodeye yami gô gétungu gésuéguku dode, vavigi me éva mbe nabongi yangô na dipo dode dimabôta yangô gône.

²⁸ Amatôma avo ayanzi mbe: Watani angô abi ôvo ôndé n’edi. Itsani angô ône andé na yabi ditayi.

²⁹ Endé te nane. Gôndé ône andéké na sôma te ône angoomba ékôndéguni na asangadôgômbéô sôma. Ivô gôndé ône asaba na sôma, abéyee na vi pedu, vingasuméô te watôgô.

³⁰ Géé gôndé môyanzine abobo ôdôô, tsôpani angô na gunyani angô gô môkii gô évitsi. Gône angadéa mindônga, na gô pievia yedi angagéa ngeko.

Gôngaba môtsundu ôvôni

³¹ Vangaviga Jésus Muana Amôma n’obébayi ondômbedi aviga n’asi gôba ayanzi aNzambé muetso, Muana Amôma angadigaa gô gédigaa sedi sokumaka.

³² Oma muetso ava tsina angakôkangana va mbene edi. Amuene angatatôa oma mônongovo gatatôa môkeneyi eebodu, atatôa mandombo na kange.

³³ Angakôngéga mandombome na gô géeyo sedi gémôgôô, na kangeye na gô géeyo sedi gégeto.

³⁴ Vane Kumu angavovo n’ane angaba gô géeyo sedi gémôgôô mbe: Vigani anye nôétsiô mate na Téta. Ingéani g’ôkumu aNzambé, ômavangéa angô anye bandôa vamakanangô tsina n’oba.

³⁵ Bangôani mbe vamookô me nzaa, anye nômeetsa me môyakô. Vamookô me sôé, anye nômeetsa me meba. Vamabaka me môgenda, anye nômakenea me gô yeba yanyô.

³⁶ Vamabaka me mônyenge anye nômaatéda me môkanda. Vamabeea me, anye nômamogeda me. Vamabaka me gô eba atsôgôô, anye nômaviga gôéena me.

³⁷ Oma amatsimamani amatsapéô na ameevôa ahngô nyivô mbe: ?Kumu tômadenga éwe na nzaa nyaa ndé? ?Tômeetsa éwe môyakô nyaa ndé? ?Tomadenga éwe na sôé na tômeetsa éwe meba nyaa ndé?

³⁸ ?Ewe ômavigéa we g’ôgenda gôékeneo gô yeba yasô nyaa ndé? ?Na ômabaka mônyenge tômagôétsaka môkanda nyaa ndé?

³⁹ We tôsigôene vamabeea éwe na we tôsibuéé gô eba atsôgôô gôégôena gône.

⁴⁰ Kumu amanigôa ahngô mbe: Kuka yetso veendéa anye mabégôme mane gôndé ane amavamba n’ami béyé mbe ti vianéngé, ti eembe nôéndéyi te me.

⁴¹ Vane Kumu angavovo n’ane angaba gô géeyo sedi gégeto mbe: Anye nôtôgani vandé me, anye nôndé nôdokiô na Nzambé. Kiakani na gô gétungu sasoto géseemakani gémakonzeo yabédé na ayanzi edi.

⁴² Vamookô me nzaa, anye nôsiitsé me môyakô. Vamookô me sôé, anye nôsiitsé me meba.

⁴³ Vamabaka me môgenda anye nôsikenee me gô yeba yanyô. Vamabaka me mônyenge, anye nôsiatédé me môkanda. Vamabeea me na vamabaka me gô eba atsôgôô anye nôsikenee me.

⁴⁴ Asi géeyo gégeto amamôévôa nyivô mbe: ?Kumu tôsigôwedéé nayee? ?Ewe ômabaka na nzaa na sôé nyaa ndé? ?Omabaka g’ôgenda na mônyenge nyaa ndé? ?Na ômabeea na ômabaka gô eba atsôgôô nyaa ndé? We tôsigôene. We mbe tômagôenaka, we mbe tômagôwedéa.

⁴⁵ Kumu amaabéa ahngô mbe: Nanôbeenda na gô pie mbe kuka yetso disiwedéé anye anami, béyé mbe viana vigevige, anye nôsiwedéa te na me.

⁴⁶ Asi géeyo gégeto angakedu na gô soto géseemakani. Géé asi géeyo gémôgôô angeengéa na gô monyo ôsakôdéakani.