Matthieu 24 - New Testament in Mitsogo

Jésus ameevéda oma mbe eba aNzambé ôngapanzô (Bono na )

¹ Jésus amakusa gô eba aNzambé. Gômakea angô aneengie amasôbasôbana mbe: Môékédi, bonoko ganyepa yeba yedi. Gamasaô yangô. Ti ôô mônongô ayeba.

² Jésus amaabéa ahngô mbe: Nôeni yebaye dipôni édi, gôsangasanéa ta n’etaé évo gô ngongo amôkedi. Metso mangapanzô.

Maguga mapitsi yamôyusumédu (Bono na

³ Jésus amadigaa va ngongo amôkôdi ôtetu mbe Olivier. Aneengi edi amaviga gôémôévôa mbe: Beenda we ndéône éngabuéa mabégôme mane. Nigôa we gémbégéage gengatubéda mbe Jésus asangaamba éviga, na tsinane éngabunganédu.

⁴ Vane Jésus amakeneda angô mbe: Nôwema kabaga anya nôbômédu n’ene oma.

⁵ Oma ahngaviga atsua inami na apata mbe: Me te Christ, namatômu na Nzambé. Ahngabôméda oma ayekani.

⁶ Nôngookô nzongodi yamabadi mandé gôpégôpé n’anyô, na tsangô yamabadi magôdagôda n’anyô. Nôneena gomo. Mabadime mane mangagenyu. Ivô tsengene ésangakôdéa vane.

⁷ Eongo évo éngagenya na évo éongo. Tsenge épo éngagenya na épo tsenge. Ayekani angookô nzaa gôsangabahngô na môyakô. Tsinane éngatatéa gô dipo tsenge disitaté yangô na mbeego.

⁸ Mabégôme metso mane mangaba te gandé gégôngôta géôkô môgeto gébeenda mbe muanee amahiviga.

⁹ Engaba mbe oma angakaba anye omami gôénôtubéda maguga na gôénôyôha. Muetso angavinga anye te gô inami.

¹⁰ Gô ndéô nene ayekani amabaka n’ami môtémovo anganôtôga gôndé me na Mabégô Mami. Oma angavingana na angakabana anguene n’anguene.

¹¹ Gôngaba eekédi adiboe angabôméda ayekani.

¹² Mane mabévani mangatsanzabana. Na oma asangamenya étatôa mane mamisôba na mane mabévani. Ayekani asangaba na tsôvé éaNzambé gamamônyôngéô ahngô v’ebandô.

¹³ Ivô ône angasipa gô Mabégô MaNzambé ngu na v’ekôdéô, angagoobou.

¹⁴ Tsangô Eamôsôba éenyanga éndé n’ami éngeekédu gô tsengeye yetso yava tsina gômbe oma muetso angookô gamatômu me na Nzambé na gô tsina. Vane te vangaba ékôdéô éatsengene.

Ebégô éaSôma Géôtéa Ebévani (Bono na )

¹⁵ Nôngeena ône atetu mbe Sôma Géôtéa Ebévani angatemedu gô tsongo éadisambô édigaa Nzambé gô eba aNzambé. Te ône amanigôa Daniel, môpandôédi amatasa maNzambé. Me Jésus nanôongô ndongi nedué mbe, ône atangani aditégé ébégéôe édué.

¹⁶ Vane ane ahngaba gô Judée abusagé na gô ngongo amikôdi.

¹⁷ One angaba gô ngongo eba, vasutuméa angô gôébusuga aseengéa na gô ebedi gôébongo éômee éedi gôétsua éangô na gôkeangô.

¹⁸ Na ône angaba gô tsaga éedi asanika na gô mbôka gôébongo ngoyine éedi.

¹⁹ Te ngeba épôni gô panda dingeena agetoe pitsiye dine ane ahnagadenganô andé na mimé n’ane angadenganô anyuéséda ana.

²⁰ Dukani Nzambé mbe mabégô mema kabaga matsiga gô ndéône éasodi gévôni vo gô nyaa edunda.

²¹ Gôébégô gô pitsiye dine oma angeena maguga mamootéani. Ti mônongoe amaguga ône madeo masienanô, bandôa vamakana Nzambé tsina n’oba ngu na pitsi yedi. Ngu na vangakôdéa tsinane, gôsangadôba ga ône môngongoe amaguga.

²² Mbéka mbe Kumu amatasa mbe: Nasusué pitsiye, mbe gôsangasanéa môma adôngani. Ivô Kumu angasusua pitsiye te gôndé omedi amasevôa angô.

²³ Okô nôbeendiô mbe: Bononi Christ te angôô. Vo Christ te angôône. Nômbiôôkô mane.

²⁴ Gôngaviga eekédi adiboe apata mbe: Me te Christ. Avo dôta angapata mbe: Me te môpandôédi amatasa maNzambé. Angayanza émbégéa na mabégô manyônganéôni masoongôa môma ésupua. Eetso éne te gôebôméda oma, buéyé mbe ti n’ane amasevôu na Nzambé.

²⁵ Tambô anye ôôkôni. Namani énôévéda ébégôe madeo ésibuéa.

²⁶ Okô môma anônigôa mbe: Nôeni Christ avigi. Aka gô tsenge émagasani. Nômbiakea na gône. Môma angeenda mbe: Christ andé gôésomo gô tungu asimbe na mbôkaye. Nômbiôôkô mane.

²⁷ Nôsabômu gakadima mikadikadi gésa na gésa bandôa gôviga kômbéne na gôpénda kômbéne. Menyani mbe génikéô sami, Muana Amôma na gô tsina géngaba te nane.

²⁸ Gô tungu édenganô ésenze, nyoeye diaa ésenze dikôvana na wangô.

Génikéô saJésus, Muana Amôma na gô tsina (Bono na )

²⁹ Gô pitsiye dine, va mbene andéône éamaguga, kômbéne éngeemédu na ngondene ésangadôtanéda midanga. Minangamie mingaaga g’ôba na bobokoboboko. Ane atôma ngudi yava gatse atsina n’oba angatatéa.

³⁰ Vane gémbégéa samemuene Muana Amôma géngatsutsuga g’ôba. Asi mongo metso mava tsina angadéa na mindônga. Ahngeena me, Muana Amôma natsutsuga va gatse adibôngé yag’ôba na ngudi yetso na ôkumaka ondômbami.

³¹ Vangatoongu émbômba nangavigéda asi g’ôba ayanzie ami gôékôkéga omami andé gô ékoo na gô dongu na gésa na gésa amasevôu na Nzambé.

Meekédu maviga g’ôfiguier (Bono na )

³² Menyani gémbégéage gétubéda géétété gééndô mbe ôfiguier. Mitabé miedi mibandôa égeenya na yabiye dipunzua nôsabômu mbe mbuuaye dimoba.

³³ Te mônongovo veenanye mabégôme metso éma mabuéa. Menyani mbe amuene aka gôpégôpé. Asabô gôpégôpé, aka ti v’omba.

³⁴ Me nanôbeenda na gô pie mbe muetso ahndé adôngani asangawa mbe mabégô mema masatsigaka.

³⁵ Diôba na tsinane éngoota na éngadimbana. Ivô Mabégô Mami te môgunanza.

Nzambé amuene asabômu pitsiye (Bono na 34–36 )

³⁶ Gôsaba môma angoongôa émenya pitsi vo ndéô éngabuéa mabégô mema, ivô te gô mbene n’okendô. Béyé asi g’ôba ayanzi aNzambé asamenya. Na me, Muana ANzambé tsamenya. Te amuene Téta asabômuni.

³⁷ Mane mameenanô gô ndéô émabaka Noé, te mangô mangeenanô va génikéô same, Muana Amôma.

³⁸ Menyani mbe gô ndéô nene géningôge madeo gésiviga, oma amaaka na amanyuaka. Ahmabaaka na amabeedaka anaô ngu na nyee ômapeka Noé gô mbôngône.

³⁹ Ahsibaké na môkeda ngu na vamabuéa géningôge gôégudéda ahngô muetso. Engaba te mônongovo gô gévigéô same, Muana Amôma.

⁴⁰ Ekegea te nane. Amôgôô abaé angaba gôéwanga. Môvo angabongu. Môvo angatsikô.

⁴¹ Ageto abaé angatsuaka gésô gévo. Môvo angabongu. Môvo angatsikô.

⁴² Imbakani géembemba gôébégô nôsamenya nyee ôngaviga Kumu anyô.

⁴³ Vôtanganôni édué. Kumu eba mbe amenya pitsine éviga muisui, angô mbe angeemba géembemba mbe asangasinga ebedi ôpadô.

⁴⁴ T’ebandô anye dôta bakani nômakoamani kuanakue gôévéngéa me, gôébégô me Muana Amôma nangaviga gô ndéône ésangatasanye.

Môyanzi agobedani na môyanzi asagobedani (Bono na )

⁴⁵ Môyanzi agobendani andé n’eodo ?eenda nayee? Angô eetsô éyanza na môtômine wedi mbe: Okenea ayanzi n’oo. Gô ndéô yetso ôkabéaka ahngô môyakôe.

⁴⁶ Ti gô gényônga géngaba na môyanzi nône vanganika kumu éyanzee na adenga môyanzine andé gôékabéa n’akedi môyakôe.

⁴⁷ Nanôbeenda na gô pie mbe kumu éyanzee angeetsa môyanzi nône énvanga évôni gôékenea n’okitie wedi wetso.

⁴⁸ Ivô ôkô môyanzine asinyepa, angô atasa gô môtémedi mbe, môtômine wami adinga éviga.

⁴⁹ N’angô abandôa égenya n’ayanzi n’edi. Aaka na anyuaka n’asi édangi.

⁵⁰ Vane kumu éyanzee angaviga gô nyee ôsangatasa môyanzine na gô ndéône ésangamenya angô mbe kumu angaviga.

⁵¹ Kumu éyanza angamôsiséda tsôgôô édagani gasisédu asi enyepa éamiônya. Vane vangadéa ahngô mindônga, na gô pievia yaô angagéa ngeko.