Matthieu 23 - New Testament in Mitsogo

Jésus amakeneda oma gôndé anigôi amige miaNzambé (Bono na 46 20:45–46 )

¹ Jésus amavovo n’aneengi edi na géômbége mbe:

² Anigôi amige miaNzambé n’Apharisien andé n’eyanza éaô gôénigôa oma mige mimatsika Moïse.

³ Enyepa gôndé anye gôégobeda ahngô. Nôaanda te meekédume. Nômbiaanda ésimee éaô. Anguene asagobeda éne éékéda ahngô.

⁴ Ahkata magumba maditani na atsakéga anye mangô. Ivô anguene gôénôwedéa, asanôbono ta n’eso.

⁵ Mane mayanzahngô amayanza v’ekanga mbe ényepee éaô éenanô n’oma. Môbôtô aMatendeo MaNzambé ôtsua eekédi, ahngô avundéda angô na atsua angô kataga va panza yaô na va mogo maô gômbe ôenanô. Ngoyi yaô yeekédi, aditongeda na adinyepeda gôéenanô n’oma.

⁶ Gô môambô anyôngéô édigaa va kôbangô akumu éasueti. Gô eba agéwanyéô asevoa édigaa éokumaka éenanôni n’oma.

⁷ Ahnyôngéô émekedu n’oma mbe: Môékédi, Môékédi.

⁸ Ivô nanôongô ndongi mbe nônasinga oma anômekeda mbe: môékédi. Gôébégô anye muetso te ana aTétee atévo. Môékédine wanyô te môvo.

⁹ Nônamekeda môma atsengene mbe: Téta, gôébégô nôsaba na nyene tétee. Tétanyô te ône andé g’ôba.

¹⁰ Nônasinga môma anômekeda mbe tsesu. Gôébégô tsesune yanyô énôtômani, te épo na koo, te amuene Christ.

¹¹ One andé môvôni va gatse anyô abaké môyanzi aakedi.

¹² One aabatéda amuene angasugédu. Na ône aasugéda amuene angabatédu.

Jésus ameeséda anigôi amige na Apharisien (Bono na 44 52 20:47

¹³ Jésus amavovo mbe: Ti gô maguga mandé n’anye anigôi amige miaNzambé n’Apharisien nôndé ti anyepi amiônya. Anye nôkukégéa oma ôkuké ag’ôkumu aNzambé. Anyene nôseengéa gô angô, na nôsatsika ane anyôngéôni mbe eengéa. [

¹⁴ Ti go maguga mande n’anye anigoi amige miaNzambe n’Apharisien. Nônde ti anyepi amiônya. Anye nôeesuéa mikue vipesuvie vinde n’ahngo. N’anye nôsambéda disambô ditongoni gôétubéda ényepee éanyô. T’ebandô gésisédéô sanyô géngootéa édaga.]

¹⁵ Ti gô maguga mandé n’anye anigôi amige miaNzambé n’Apharisien nôndé ti anyepi amiônya. Nôkénga mitôô tsengene nyetso gô tsényé na gô mubu gôédiia môma môvo asinga meekédume manyô. Vakangô mômanyô, nômôkoa mbe ébévee éedi éngootéa pepe éne éanyô.

¹⁶ Ti gô maguga mandé n’anye asi pogu nôtévéda akanyô nzéa éanyô. Nôvovo mbe: Okô môma asongéa gô ina eba aNzambé, môsongia ône ôsaba na ngudi. Géé ône asongéa gô ina adodo éndé gô eba aNzambé, môsongie ône ôndé na tsoongo.

¹⁷ Anye asi pogu. Anye nômavétsu mikambô. ?Ene éôtéa évôni yéni? ?Te dodo? ?Vo te eba aNzambé ôdeekediô dodo nene?

¹⁸ Anye nônovo dôta mbe: Okô môma asongéa gô ina agétumbéô sadigondoku môsongie ône ôsaba na ngudi. Géé ône asongéa gô ina ogondoku ôvumbu va gétumbéô, môsongie ône ôndé na tsoongo.

¹⁹ Anye asi pogu. ?Ene éôtéa évôni yéni? ?Te ôgondokue‐a? ?Vo te gétumbéôge sogondoku?

²⁰ One asongéa gô ina agétumbéô sadigondoku, asongéa gô ina agétumbéôge na asongéa te na éetso éndé wangô.

²¹ One asongéa gô ina eba aNzambé, asongéa te go ina eba na asongéa te na amuene Nzambé andé wangô.

²² One asongéa gô ina oba, asongéa te gédigaa saNzambé na asongéa dôta te n’Amuene Nzambé andé digaa gô sangô.

²³ To gô maguga mandé n’anye anigôi amige miaNzambé n’Apharisien. Nôndé ti anyepi amiônya. Gô éne égésu gô môyakô gôényepeda angô, te tôkôdô tôtetu mbe menthe, na fenouil na cumin, gô nzima atsangi nôétsa Nzambé tsangine yedi épo. Géé gô mabégôme mavôni nôseetsa nane. Gô mitômamie mivôni na meekédume mavôni mangeba, na mamavôma, na meetsimama, nôsagobeda mangô. Tambô, buedi mbe nôgôbeda mane mavôni na gétsike mane magemage.

²⁴ Anye te asi pogu nôtévéda akanyô na gô nzéane yanyô. Anye nôeengoa éne ényua anye gôénôtôa vitsaguna, ivô anye nômina ti gényamanyama samôbongo.

²⁵ Ti gô maguga mandé n’anye anigôi amige miaNzambé n’Apharisien, anye nôndé ti anyepi amiônya. Gô ébungue éanyô na épedee éanyô nôsabômu éôvôa te gésa géngongo géenanôni. Géé gô gatse éangô éndé émayôa na mane mameesua anye, na mane makuséda manyima manyô mabévani.

²⁶ Anye Apharisien, te asi pogu. ?Nôsamenya mbe môma apanga éôvôa gébungu te gô gatse‐a? Vangoovôu sangô gô gatse, na gésa géngongo gégôgéa te kukepo.

²⁷ Ti gô maguga mandé n’anye anigôi amige miaNzambé na Apharisien, anye nôndé ti anyepi amiônya. Anye nôgono na ngii dimanyepédu va ngongo na pemba, tambô gô gatse dindé dimayôa na épaa éamômane amawani, na dikusa mbônga éôtô edi ômabooni.

²⁸ N’anye te mônongovo. Gô éne éenanôni nônyepa va miso moma. Géé gô mitéma mianyô nôndé oma amayôa na buembe na ébéva.

Jésus ameevéda gésisédeô (Bono na )

²⁹ Ti gô maguga mandé n’anye anigôi amige miaNzambé n’Apharisien, nôndé ti anyepi amiônya. Anye nôsaa yeba yamisôba gôényepeda ngiiye yapandôédi amatasa maNzambé. Nôdinyepeda na suadô gômabakahngô oma amisôba.

³⁰ Anye nôyuéga anyene mbe: Mbe te we tômadenganô gô ndéô éaô, we mbe tôsiyôhé ahngô.

³¹ Vane nômena anyene mbe tétee yasô te ane amayôha apandôédi amatasa maNzambé gébé n’ebégô. Na we tôndé ti pidi anaô.

³² Tambô mangôakani éyanza éne émabandôa na tétee yanyô.

³³ Anye te ti gandé nyogoye. Nôgono na mbigé. Anye nôndé n’etasa mbe: We tôsangakea gôébungana. ?Nôngabusuga mungu asoto nayee?

³⁴ Oôkôni buedi édué. Nangatôma avo apandôédi amatasa maNzambé na oma eodo, n’oma agéneenga gévôni na gôndé anye. ?N’anye nôngaba n’ahngô nayee? Me tsabômu mbe anye nôngayôha avo. Na nôngabôkéda avo va gésumu sowa. Avo dôta nôngabita ahngô na mibitô mievongo gô yeba yanyô yewanyéô. Nôngayunza ahngô mbôka yetso.

³⁵ T’ebandô éngaba mbe gésisédéô gévôni géngaba gôndé anye. Muetso ane amayôhu gébé n’ebégô, bandôa n’Abel, ône ameenanô na Nzambé ti eembe asibé n’oési, ngu na Zacharie, muana aBarachie, ône amayôhu bobo. Zacharie amayôhu andé va kaba agétumbéô sadigondoku na tsongo eadisambô édigaa Nzambé. Gésisédéô sayôhiye waô géngaba te gôndé anye.

³⁶ Nanônigôa na gô pie mbe tsôgôône éane amayôha omami éngaba gôndé anye asi pitsi yedi.

Jésus amasôbasôbana gô môsenge aJérusalem (Bono na )

³⁷ Jésus amavovo mbe: Ah anye Jérusalem. Ah anye asi Jérusalem. Nômayôha apandôédi amatasa maNzambé. Nômatuma na mataé ane amatôma Nzambé na gôndé anye. Kuka yetso me namanyôngéô énôweseda gôénôgudaméa gagudaméa tsôsô anedi. Ivô anye nômakina.

³⁸ Tambô menyani mbe gô ebanyô gôsangadôba môma.

³⁹ Endé te nane. Me nanôevéda mbe anye nôsangadôena me ngu na nyee ôngavovo anye mbe: Mate MaNzambé mabaké gôndé ône aviga gô ina aKumu asô.