Matthieu 22 - New Testament in Mitsogo

Tsava éasueti époni éayômba (Bono na )

¹ Jésus amoomba égunya oma tsava gôéékéda ahngô. Angô mbe:

² Okumu aNzambé ôgono na môtômi atsenge akônzéa muanedi amômôgôô sueti éayômba.

³ Amatôma ayanziedi gôéwanyéda ane amabambéôkôni. Ivô oma asinyôngéô éviga.

⁴ Amoomba étôma avo ayanzie mbe: Kiakani nôkebeenda ane amabambéôni mbe: Okani môyakôe ôbéyi. Mandombo mami na mivangô miami mimayôhuni mimani ébea. Okani gô suetine éayômba.

⁵ Ivô muetso ahmabambéôkôni asivigé. Ahmakea môvo môvo gô mayanza maô. Môvo na gô tsagedi. Môvo g’ôyôkô edi.

⁶ Avo amatsôpa ane amatômukuni gôéabômôa na gôéayôha.

⁷ Môtômine atsenge amaba n’opisa. Amatôma migode miedi gôéyôha dôta ane amayôha ayanzie wedi. Amatumba mbôka yaô.

⁸ Môtômine atsenge amavovo n’avo ayanzi mbe: Môyakô asuetine éayômba ôbeyi, ivô ane amabambéôkôni asangaadô angô.

⁹ Kiakani na gô mingômbémie miagô môsenge nôkebambéa muetso angadenga anye.

¹⁰ Ayanzie amakea gô mingômbémie gôékôva muetso amadenganôni na ane abévani n’ane amisôba ngu na vamayôa tsongone émaakô suetine.

¹¹ Môtômi atsenge ameengéa na gô tsongo émabaka ane amakôvukuni. Amadenga môma môvo asiatéké maduani mokumaka asueti éayômba.

¹² Angô mbe: ?Waé nayee ôéngéyi na maduani gébé masueti? Môma nône asibubué.

¹³ Môtômi atsenge amatôma ayanzie mbe: Katani angô makôdôme na mogome. Gunyani angô gô mbadi gô évitsie. Gône te gôngadéangô miéngé na gôngagéangô ngeko gô panda dienangô.

¹⁴ Vamabambéô ahngô te ayekani. Vamasevôu ahngô ahsibé ayekani.

Depu émavanéda môtômi atsenge (Bono na )

¹⁵ Apharisien amavanga gépangô gôétambéa Jésus pago na nyivô gôémôkubéda.

¹⁶ Ahmatôma avo aneengie aô na avo ava géômbé saHérode gôévovo na Jésus mbe: Môékédi, tôsabômu mbe mane mavovo éwe te mapie matévo. Oékéda môdigédi apie ônyôngéô Nzambé. Gô meekédu moo ôsaba na ônzenze amôma. Ahmanyôngéôyee, ahsamanyôngéôyee, ébégôe te éanguene.

¹⁷ Beenda we gookô éwe mitôma mimatsikéô we. ?Tôvanéa môtômi atsenge César depune vo tôsavana?

¹⁸ Ivô Jésus asibômu buembee ôbévani ômaba n’ahngô. Na amaabéa ahngô mbe: ?Anye nôviga gôékanéga me nayee? Anye nôndé ti anyepi amiônya.

¹⁹ Tubédani me dode divanôkô depu. Omee amamôétsa dodene.

²⁰ Jésus ameevôa ahngô mbe: ?Gégonige soso ége saanda? ?Na ina ématenduni éandaa?

²¹ Ahmaabéa Jésus mbe: Eetso te éaCésar, môtômi atsenge. Vane Jésus amavovo n’ahngô mbe: Ene éndé éamôtômi atsenge, nikédani na gôndé angô. Ene éndé éaNzambé, nikédani na gôndé Nzambé.

²² Vamookô angô mbikô nene, ahmasôbasôbana mbe: Oô môma aseebéôkôni. Na ahmamôtsika na ahmakea.

Nyivô éagékundugéô sowa (Bono na )

²³ Nyoone, avo Asadducéen ahmaviga na gôndé Jésus. (Asadducéen te asi gésôgage géékéda mbe ane amawani asangakunduga.) Ahmeevôa Jésus mbe:

²⁴ Môekédi ôôkô ébégô édué. Ndongi dimatendéô we na Moïse dibeenda we mbe: Okô muanayoo amômôgôô awéyi atsika môgayedi gékômba, ôviagana môkuée. Obôta n’edi ana gô ina amuanayoo amawani.

²⁵ Gô mbôkasô gômabaka anamôgôô tsambué, aneyee. Pene amabaa môgeto. Na amawa amatsika môgayedi gébé na muana. Môdimine amaviagana môkuée.

²⁶ Gôndé ôné amôbaé émabaka te nane. Na ône amôtatô, na ahngô muetso tsambué te mônôngovo.

²⁷ Gô ngima amôgôôe muetso na môgetone amawa.

²⁸ ?Gô nyee ôngakunduga ane amawani, môgeto nône angaba waanda? Bonoko, muetso tsambué amamana émôbaa.

²⁹ Jésus amaabéa ahngô mbe: Anye nôbômu te gôsamenyanye Matendeo maNzambé na gôsamenyanye ngudi yaNzambé.

³⁰ Bangôani mbe vangakunduga ane amawani amôgôô n’ageto, gôsangaba yômba. Angadigaa gadigaa asi g’ôba ayanzi aNzambé.

³¹ ?Gôébégô éagékundugéô sowa anye madeo nôsitanga éne émavovo Nzambé‐a? Angô mbe:

³² Me te Nzambé éneegeda Abraham na Isaac na Jacob. Nzambé te Nzambé ane adôngani, kaka Nzambé ane amawani.

³³ Géômbégé gémadenganô v’angô gématsapéô na meekédu medi.

Môtômee ôôtéa mietso (Bono na )

³⁴ Apharisien amookô mbe Jésus amatseda Asadducéen. Na asadducéen asibubuédô miônya miaô. Vane te Apharisien amavanga pangô.

³⁵ Môvo v’Apharisien, gévovige, amanyôngéô ékanéga Jésus gô nyivô mbe:

³⁶ Môékédi, gô migemie mietso na mitômamie mietso ?ébégôe éôtéa évôni yeni?

³⁷ Jésus amamôaabéa mbe: Nyôngéô Kumu Nzambé éôô na môtémoo wetso, na gédidi soo setso na matasa moo metso.

³⁸ One te môtôma ôvôni amapanga.

³⁹ Oeni môtômee ôaandani ôgono n’one amapanga. Nyôngéô môkoo ganyôngéô éwe ôtô omuene.

⁴⁰ Mige mietso mimatsika Moïse na meekédu metso mamatsika apandôéndi amatasa maNzambé, ébandôe éaô te mitômamie mibaé émi.

Ebégô éaChrist na David (Bono na )

⁴¹ Vameena Jésus mbe Apharisien muetso te anguaa, ameevôa ahngô nyivô mbe:

⁴² Gôébégô éaChrist, ône angatômu na Nzambé ?anye nôtasa nayee? ?Angô vita muana andaa? Apharisien amaabéa mbe: Angô te muana aDavid.

⁴³ Jésus amanigôa mbe: Okô mbe éndé nane ?nayee amuene David amatévédu na Gédidi SaNzambé amateta Christ mbe: Kumu ami? Nôsabômu éne émavovo David. Angô mbe:

⁴⁴ Kumu Nzambé amavovo na Kumu ami mbe: Ewe digaa gô géeyo sami gémôgôô, na me nangagudaméda adudeoe woo gô tsina amakôdô moo.

⁴⁵ Jésus angô mbe: Amuene David amateta môma nône mbe: kumu ami. ?Mbe muanedi nayee angamôénda mbe Kumu ami?

⁴⁶ Gôsibé môma amabubua ta n’ogi ôvo. Bandôa nyoone oma asiyeegedô émôévôa nyivô.