Matthieu 2 - New Testament in Mitsogo

Kumu yeodo amaviga gôéena Jésus

¹ Jésus amabôtu gô Bethléhem gô tsenge éndô mbe Judée. Te gô ndéô ématôma Hérode. Vamabôtu Jésus, kumu yeodo évôni ahmabuéa gô Jérusalem. Kumuye dimaviga gô gésa gétsiga kômbéne.

² Amôgôôe ane amabambéa mbe: ?Muanee abôtiôni, ône angaba Kumune éAjuif andé gôni? We tômeena g’ôba mônanga ômatubéda ôbôtue wedi. We tôvigi gô gésa gétsiga kômbéne gôémôneegeda.

³ Vamookô môtômine atsenge, Hérode ookô nane, angô n’asi Jérusalem muetso ahmakebangana.

⁴ Hérode amabambéa tsesu yadeekedi adigondoku, n’anigôi amige miaNzambé gôéwanya n’edi tungo épo. Ameevôa ahngô mbe: ?One eendô mbe Christ, angabôtu gôni gamatenduni?

⁵ Ahmamôaabéa mbe: Angabôtu gô Bethléhem gô tsenge ééndô mbe Judée. Te gamatenda môpandôédi amatasa maNzambé va mbeego. Ameenda mbe:

⁶ Ewe, Bethléhem gô tsenge éaJudée. Ewe ôsaba môsenge ôgeôge va gatse amisenge mivôni miagô Judée. Gônde éwe, gôngabôtu Kumu. Angô angatôma omami, ana aIsraïl.

⁷ Vane Hérode ameevôa kumuye yeodo v’esooe mbe: ?Mônangee ômapanga éenanô nyaa ndé?

⁸ Na Hérode amatôma kumu yeodo gôékea na gô Bethléhem. Angô mbe: Kiakani. Buéni. Vangamôenanye, nômenya mabégô mamuanee ône, anye nôngavibeenda me. Na me dôta nangakea gôémôneegeda.

⁹ Vamookôahngô môtômee, kumu yeodo dimakea. Na vane mônangee, ône ômeenahngô gô tsenge étsiga kômbéne, ômakea va mbene ahngô. Vamabuéa mônangee va ngongo atungune émabaka muanee ône, ômasikama.

¹⁰ Vameenahngô mônangee ône, kumu yeodo ahmatsôkéa na gényônga gévôni.

¹¹ Dimeengéa na gô eba. Ahmeena muanee na yeedi Marie. Ahmasiba mabongo maô va mbene amuanee na ahmamôneegeda. Na vane ahmapunzua magumba maô. Ahmabongo ôkiti aô gôéétsa dibiia. Ahmamôétsa dodo, na mônongo amôyombo atumbaga, na wene môyombo ôéndô mbe myrrhe.

¹² Nzambé amakeneda kumu yeodo évôni gô ndoti. Angô mbe: Nônanika na gôndé Hérode. Te vane kumuye dimakea nyene nzéa gôébuéa na gô tsenge yaô.

Joseph amabusuga na Jésus na Marie na gô Egypte

¹³ Vamakea omee ane, môsi g’ôba amavigédu na Nzambé na gôndé Joseph gô ndoti. Amabeenda angô mbe: Nôtôga éva. Bongo muanee na yeedi. Busugani na gô Egypte. Gôébégô Hérode anyôngéô éyôha muanee. Digaani wangô ngu na vanganôbeenda me mbe: Nikani.

¹⁴ Joseph amatimôga. Amabongo yeene na muanee na pitsi. Amakea na gô Egypte.

¹⁵ Amadigaa wangô ngu na vamawa Hérode. Vane mabégô mamasupua môpandôédi amatasa maNzambé mameenanô. Nzambé amanigôa va mbeego mbe: Nangatôma muanami mbe: Nôtôga gô Egypte.

Ana ayekani amayôhu

¹⁶ Vameena Hérode mbe kumu yeodo dimamôenza na dimanika na gô tsenge yaô gô nyene nzéa, Hérode amaba n’opisa ôvôni. Amakudéga migode gôéyôha anee muetso ageage amabaka gô Bethléhem na gô tsengene nyetso ématômangô. Amayôha muetso, bandôa n’ana avembo ngu n’anee amabaka aka éma abaé. Ngu na mipuma mimookô Hérode na kumuye yeodo gô gétsigéô samônangee.

¹⁷ Jérémie, môpandôédi ambeego amatasa maNzambé amanigôa mbe:

¹⁸ Oma angookô mindônga gô tsenge éaRama. Angookô miséma na diamô. Rachel angadéaka anedi. Buéyé mbe oma avooteke angô, Asangatsika édéa gôébégô anedi ayôhyiô. Mabégôme mane mamapandôéda Jérémie mameenanô.

Jésus amanôtôga gô Egypte

¹⁹ Vamawa Hérode, môsi g’ôba amavigédu na Nzambé amatsiga na gôndé Joseph gô ndoti gô Egypte.

²⁰ Môsi g’ôba amabeenda Joseph mbe: Nôtôga éva. Bongo muanee na yeedi. Nikani na gô tsenge éaIsraël gôébégô ane amanyôngéô éyôha muanee, awéyi.

²¹ Joseph amatimôga. Amabongo yeene na muanee, na amanika na gô Israël.

²² Ivô vamookô angô mbe Archelaüs aviagani v’enyangee éatétedi Hérode gôétôma gô Judée, amookô gomo gôénika na gô tsengene yangô. Angô n’ekenedu na Nzambé gô ndoti, amakea na gô Galilée.

²³ Amadigaa wangô gô mbôka étetu mbe Nazareth. Va mbeego môpandôédi amatasa maNzambé amabeenda mbe: Angatetuku mbe môsi Nazareth.