Matthieu 16 - New Testament in Mitsogo

Apharisien na Asadducéen ahbuta éena gémbégéa (Bono na )

¹ Apharisien na Asadducéen amaviga na gôndé Jésus gôémôkanéga na mavovia maô. Ahngô mbe: Tônyôngéô éena gémbégéa gétubéda mbe ngudi yoo diviga gôndé Nzambé.

² Ivô Jésus amaabéa ahngô mbe: Vapénda kômbéne ôbee na tsoo, anye nôvovo mbe, ôbee ôénga mbe mene nyee ônganyepa.

³ Ovo inya n’ongôngô na kué, ôbee ôngaba na tsoo, anye nôvovo mbe ôbee ôénga mbe deo gôngaba mbuua. Anye nôsabômu émbégéa éoba, ivô nôsamenya émbégéa éandéône étôndéni édué.

⁴ Oma apitsi yedi, anôtôga gôndé Nzambé gôémôviia ngima, andé abévani, ahbuta éena gémbégéa sangudi yami. Ivô asangeena gémbégéa gésoongôa môma ésupua buétsé te géne gémeenanô gôndé Jonas. Vane Jésus amatsika ahngô na amakea.

Apharisien na Asadducéen amabaka na maô meekédu (Bono na )

⁵ Vamaabôga aneengie na gô dipo tsényé yamubu, ameeba étsua mipemba.

⁶ Jésus amakeneda ahngô gô tsava mbe: Nôwema. Baani n’ekena gô levure éApharisien na gô levure éAsadducéen.

⁷ Aneengie ahmavovo anguene n’anguene mbe: Avovo nane te gôsaba we na mipemba.

⁸ Jésus asibômu éne émavovo aneengie. Na angô mbe: ?Anye nôvovo nayee mbe te gôsaba we na mipemba? Nôgétsumaka ngudi yami paga ?nayee?

⁹ ?Anye madeo nôsiditéga‐ma? Bangôani mipembamie mitayi mimabukua me gôéyeseda mitônisa mitayi mioma. ?Anye nômatsua tsaô dikee yatseseye dimasanékani?

¹⁰ Bangôani dôta na mipembamie tsambué mimabukua me gôéyeseda mitônisa minayi mioma. ?Anye nômatsua tsaô dikee yatseseye dimasanéakani?

¹¹ Menyani mbe vavovo me tsanôkeneda gô mipemba miaakôni. Tambô wemani gô levure éApharisien na éAsadducéen.

¹² Vane aneengie amookô na vede mbe Jésus asivovo gôébégô éalevure éaahndéda mipemba miaakôni, ivô levure te meekédu mApharisien na mAsadducéen.

Pierre amapandôeda mbe Jésus te ône amatômu na Nzambé (Bono na )

¹³ Jésus amakea na gô tsenge édenganô mbôka étetu mbe Césarée na étômu na Philippe. Ameevôa aneengie nyivô mbe: ?Gô matasa moma, gôndé me Muana Amôma atasa nayee?

¹⁴ Amamôaabéa mbe: Avo ahmenya mbe éwe te Jean‐Baptiste. Avo dôta ahmenya mbe éwe te Elie. N’avo ahmenya mbe éwe te môvo va gatse apandôédi amatasa maNzambé gandé Jérémie.

¹⁵ Jésus ameevôa ahngô mbe: ?Gô matasa manyô me ndaa‐vo?

¹⁶ Simon Pierre amamôaabéa mbe: Ewe te Christ, ône amatômu na Nzambé. Ewe te Muana ANzambé, angô Kumu amonyo.

¹⁷ Jésus amanigôa angô mbe: Ti gô gényônga géndé na éwe Simon muana aJean gôébégô éne éapie ésupuyi éwe. Osibeendu éangô na môma. Otsigédiô éangô te na Téta, ône andé g’ôba.

¹⁸ Me Jésus nagôpandôéda dôta mbe: Inee éoo te Pierre, événdégéô mbe étaé. Gô ngongo oboboe ône me nangasaa eba ôtetu mbe mbumu éami. Buéyé n’owa ôsangaba na ngudi gôébunganéda ebee ône.

¹⁹ Me nagôétsa môsapi ôkukua ôkumu aNzambé ag’ôba. Ene ékata éwe gô tsengene ékatiô dôta gô tsenge éaNzambé g’ôba. Ene étsôbôa éwe gô tsengene étsôbôyiô dôta gô tsenge éaNzambé g’ôba.

²⁰ Vane Jésus amadékéda aneengie mbe: Nômbiayeega ébeenda môma mbe: Odôô te Christ, ône amatômu na Nzambé.

Jésus amabeenda ôwedi na gékundugéô sedi (Bono na

²¹ Bandôa nyoone Jésus amapandôéda aneengi edi na vede mbe: Engaba mbe me nangakea na gô Jérusalem gôngeena me maguga mamootéani. Peeye na tsesu yadeekedi adigondoku, n’anigôi amige miaNzambé angatseda me. Nangayôhu. Gô mbene apitsi dibaé, éne éamôtatô nangakunduga.

²² Na Pierre amabambéa Jésus na v’anguene. Amasungéa Jésus mbe: Ah Kumu ésangaba nane. Nzambé angagôkenea.

²³ Ivô Jésus amanikéda miso na amakangéa Pierre mbe: Nôtôga na gôdagôda n’ami Satan. Onyôngéô ébôméda me gôéénda ébégô ébévani. Ewe ôsatasa éne ényôngéô Nzambé. Otasa te éne ényôngéô oma.

²⁴ Vane Jésus amavovo n’aneengie muetso mbe: Okô môma anyôngéô ékea nzéepo n’ami, aviié mane maamuene ngima. Atsué gésumuge sedi sowa na akéé geômbé gévo n’ami.

²⁵ One akebangana ôwa, angô angawa. One asabusuga ôwa gô inami te angô adengi monyo.

²⁶ ?Tsoongo ndé ôkô môma adiia éôma éetso éava tsina na adimbanéda monyoe wedi apie? ?Môma angavana monyo na sôma ndé?

²⁷ Endé te nane. Me Muana Amôma nangaviga g’ôkumaka wetso aTéta na ayanzi edi asi g’ôba. Nangeetsa môma na môma ngu na éne émeenda angô gô monyoe wedi.

²⁸ Nanôbeenda ébégô édué éapie mbe avo va gatse anye nôndé éva, nôsangawa ta madeo nôsiena me, Muana Amôma naviga n’okumaka gôétôma.