Matthieu 10 - New Testament in Mitsogo

Aneengie amasevou na Jésus (Bono na )

¹ Jésus amasevoa nzima amôgôô n’amôgôô abaé gôéba aneengie edi. Ameetsa ahngô ényanga gôékuséda édidi ébévani gôndé oma na gôédôngéda mabeea metso na dipôpéa yetso.

² Ane amasevoukuni na amatômuku na Jésus nzima n’oma abaé mina maô, ône amapanga te Simon amatetuku mbe Pierre, na muaneyedi André. Môvo te Jacques na muaneyedi Jean angô abaé te ana aZébédée.

³ Avo te Philippe na Barthélemy na Thomas na Matthieu môbongi adepu. Avo dôta te Jacques muanee aAlphée na Thaddée.

⁴ Môvo te Simon amabaka gétômbiatômbia gô mabégô matômi atsenge. Na môvo dôta te Judas Iscariote to ône amavanga gôékaba Jésus gô mogo madudeo.

Jésus amakeda ane amasevouni nzima n’abaé (Bono na )

⁵ Jésus amatôma aneengi edi nzima n’abaé na gô mbôkaye. Amadékéda ahngô mbe: Nônakea na gô tunguye didigaa ane asaba Ajuif. Nônabuéa na gô misenge miaSamarie.

⁶ Buedi gôékea na gôndé oma aIsraël andé ga mandombo mamadimbanani.

⁷ Gôkeanye ikédani na nigôani mbe, ôkumu aNzambé ôweseyi na gôndé wa n’anyô.

⁸ Dôgédani ane abeeani, na kunduani ane awani, na dôngédani asi ébeea éagega na patsani édidi ébévani. Anye nômadiia ôbiia gévané, tambô itsani akanyô te ôbiia gévanéô.

⁹ Na Jésus amadékéda aneengie mbe: Nônatsua ta na ôkiti gô ébémbé éangoyi yanyô.

¹⁰ Nônakea na gébémbé samitôô na ngoyi dibaé. Nônakea na pondu, na péndé gôésipéda anye. Endé te nane. Môyanzi eetsô môyakô edi te itsôgô.

¹¹ Na Jésus amoomba éongô ahngô mbe: Vangatsiga anye gô mbôka na gô môsenge, nôbono te ane anganôtubéda gédigaa. Digaani gô ebee ône ngu na vanganôtôganye gô mbôka nene.

¹² Vangeengéa anye na gô eba amôma vovoni mbe: Mbe gétabé saNzambé gébaké n’anye.

¹³ Okô kumu eba asinyôngéô énôkenea, nôtôani kômbône éanyô éagétabé gôndé angô.

¹⁴ Okô kumu yambôka asinôsingéa gôéengéa na asanyôngéô éôkô meekédu manyô, nôtôgani vandé angô. Dumédani makôdôme ébisie. Te géevédéô saô mbe: Nôwema.

¹⁵ Nanôbeenda na gô pie mbe gô nyaa amôtsundu asi mbôka nene angasisédu. Na gésisédéôge saô géngootéa géne sasi Sodome na asi Gomorrhe.

Gékuanô géngaba gô mbene (Bono na

¹⁶ Jésus angô mbe: Oôkôni buedi. Me nanôkeda mônongovo ga mandombo mandé va gatse anzego. Tambô banaki n’ekena ga nyogo. Bakani dôta ga ménga gébé na mangônzô.

¹⁷ Bakani n’ekena gôébégo oma anganôkeda na gô yeba yamisoso. Anganôbita na mibitô gô yeba yewanyéô.

¹⁸ Nôngabuédu va mbene ane atômani na ve mbene amôtômi atsenge te gô inami. Vandé anye mbangi yami nônganigôa ahngô tsangô éami. Buéyé na ane asaba Ajuif angookô.

¹⁹ Vangakedu anye gôétsundédu gô eba amisoso nônakebangana môtangôe ôngaba n’anye na mônongoe ônganigôa anye. Vangaba anye va mbene aatsundédi, nigôani te éne éngabeendu anye na Nzambé.

²⁰ Esangavovo anye, éngavovo te gédidi SaTétanyô Nzambé géndé n’anyô.

²¹ Oma angakaba anayaô gôéahyôhéda. Tétee ahngakaba anaô te mônongovo. Anee angakoga aka avingi atétee yaô na iyee yaô na ahngahyôhéda.

²² Oma muetso ahngavinga anye gôébégô nôndéké omami. One angasipa gô gékuanô ngu na v’ekôdéô, angoobou.

²³ Vangakuanô anye gô mbôkane édigaanye, tôtani na gô nyene mbôka. Me nanôpandôéda mabégô mema mapie. Nôsangoongôa ékôdéda mbôkaye yetso yagô tsenge éaIsraël mbe me Muana Amôma tsavigaka.

²⁴ Jésus angô mbe: Môneengi asoongôa éôtéa môékédi edi. Na môyanzi asoongôa éôtéa môtômine wedi.

²⁵ Ene éamôsôba te mbe môneengine abaké ga môékédine wedi, na môyanzine abaké ga môtômine wedi. Okô pene éambumune nyetso étetu mbe Béelzébul, tambô na muetso asi mbumu nene angatetu te mônongovo.

One ookanô gomo (Bono na

²⁶ Nônookô môma gomo. Eetso émasuéguni éngaba ématsutsuuni na éetso éav’esooe éngaba v’ekanga.

²⁷ Ene ébeenda me anye gô tsina evitsi, nigôani éangô g’ômanda. Ene éôkô anye v’esooe, pandôédani éangô v’ekanga.

²⁸ Nônookô oma gomo, ane andé na ngudi yeyôha ôtôe woo. Ivô ôôkôni Nzambé gomo. Te ône andé na ngudi yeyôha ôtôe na gédidige setso gô mungu asoto.

²⁹ Tônyoyi tôbaé tôsômbédu dodepo. Buéyé vane, ôkô vivo viaagi na gô tsina, amuene Nzambé asabômu mbe viaagi.

³⁰ Tambô n’anye oma, buéyé n’otangôe atsôgé yanyô Nzambé asambômu angô.

³¹ T’ebandô neendi mbe, nônookô gomo. Na môma, na nyoyi diyekani, te môma ootéa na tsoongo va mbene aNzambé.

Ane amema Jésus na ane atôna Jésus (Bono na

³² Jésus angô mbe: Muetso ane amema va mbene oma mbe: Me te môma aChrist, me dôta nangamômema va mbene aTéta andé g’ôba mbe: Odôô te wami.

³³ Ivô ône atôna me va mbene oma, me dôta nangamôtôna g’ôba va mbene aTéta.

Yenga étatôa oma (Bono na 14:26–27

³⁴ Menyani mbe me tsiviga gôéétsa oma atsengene gétabé. Me Jésus tsiviga gôévambéda oma, navigi na yenga éaaganéda oma.

³⁵ Me navigi gôéaaganéda muana na tétedi na muana na yeedi, na tômbô n’ogoyedi ogeto.

³⁶ Adudeo amôma te asi mbumu edi.

³⁷ One anyôngéô me, na angô ootéa ényôngéô yeedi na tétedi asaba kuanakue gôétetu mbe mômami. One anyôngéô me, na angô ootéa ényôngéô muanedi amômôgôô na muanedi amôgeto, angô kaka mômami.

³⁸ One asatsua gésumuge sedi sowa na akea nzéepo n’ami, angô asangatetu mbe, mômami.

³⁹ One anyôngéô ékenea monyoe wedi amuene, angaôdimbanéda. Ivô ône adimbanéda monyo edi gô inami angaôdenga.

Misendamie (Bono na )

⁴⁰ One asinga anye, asinga dôta na me. One asinga me asinga dôta na ône amatôma me.

⁴¹ One asinga môpandôédi amatasa maNzambé gôndé angô môpandôédi, angadiia misenda ngu na mine mingadiia amuene môpandôédi. Na ône asinga môgobedi aNzambé gôndé angô môgobedi aNzambé, angadiia misenda mivo na mine miamômane aNzambé.

⁴² Nanôbeenda ébégô édué éapie mbe, ône eetsa gébungu sameba masodi na gôndé môvo va gatse aneengie ami, gôndé angô mômami, môétsine angadiia misenda.