Marc 9 - New Testament in Mitsogo

¹ Jésus amoomba évovo na géômbége n’aneengie mbe: Nanôbeenda ébégô édué éapie mbe avo va gatse anye nôndé éva nôsangawa ta madeo nôsiena ôkumu aNzambé ôviga na ngudi yedi.

Otô aJésus ômakoga pesu andéô (Bono na Matt. 17:1–13 )

² Vamoota pitsi môtôba, Jésus amakea na Pierre na Jacques na Jean na gô ngongo amôkôdi ôdooda. Vasibaké muene môma te Jésus n’aneengie atatô. Otô aJésus ômakoga va miso maô.

³ Maduani medi mamakoga moobébayi avembo ti ga pemba. Gôsaba môma gô tsina égô oongôa étsigéda mônongo avembo ône.

⁴ Vane aneengie atatô ahmeena oma abaé, Elie na Moïse amatsutsuga, na amavovo na Jésus.

⁵ Na Pierre dôta amavovo na Jésus mbe: Môékédi te buedi gadenganiô wa n’anyô éva. Tôsaéni yeba ditatô yagébandé. Ovo woo. Ovo aMoïse. Ovo aElie.

⁶ Pierre amavovo nane gémenye éne émavovo angô gô mangongome mamookô angô na Jacques na Jean muetso.

⁷ Obôngé ômakukéga ôbee na ômeebéda ahngô muetso. Ogi ômookanô ôvovo g’ôbôngé mbe: Odôô te muanee ami amôtéma. Oôkéoni angô.

⁸ Vane aneengie amageengageengana na ahsienedô môma buétsé te Jésus môtévo andé n’ahngô.

⁹ Vamasutuméa ahngô gô môkôdi ône, Jésus amavovo n’aneengie mbe: Nômbiabeenda môma ta na môvo éne éeni anye. Nôngabeenda te vangakunduga me, Muana Amôma g’ôwa.

¹⁰ Ahmakuya ébégôe éne gô mitéma miaô. Ivô ahmeevôana anguene n’anguene mbe: ?Ebégô évovi Jésus angô gôékunduga g’ôwa ékegea nayee?

¹¹ Vane ahmeevôa Jésus mbe: Anigôi amige ahvovo mbe mabégô mema n’egébuéaka, te Elie apanga étsigani. ?Avovo nane nayee?

¹² Jésus amaabéa mbe: Okô mbe éendéké gavovo anigôi amige mbe te Elie angapanga étsigani gôénikéa ékônza mabégô metso tambô ?nayee Matendeo MaNzambé mabeenda mbe me, Muana Amôma nangatubédu n’oma maguga mavôni na gékuanô?

¹³ Buéyé mbe nane, nanôbeenda mbe Elie amani étsiga. Oma amamôénda gamanyôngéô ahngô. Te gabeenda matendeo MaNzambé gôndé Elie.

Jésus amadôngéda muana amabaka na gédidi gébévani (Bono na Matt. 17:14–21

¹⁴ Vamabaka Jésus n’aneengie atatô aka gôétsiga na vandé akaô ahmeena géômbé gévôni géndé n’avo aneengie. Na ahmeena anigôi amige miaNzambé andé gôénigôana n’ahngô.

¹⁵ Vameena géômbége Jésus aviga ahmamôtsôkéa. Ahmakumbuga gôésambanéa n’edi.

¹⁶ Jésus ameevôa aneengie edi mbe: ?Anye na omeaa nôbé nayee?

¹⁷ Mômôgôô môvo amabaka gô géômbége amaabéa mbe: Môékédi, navigi na gôndé éwe na muanami amakaô na gédidi sobôbô.

¹⁸ Kuka yetso vatsôpu angô na sangô agunyéga na va tsina. Muanee te aka na magudé gô mônya, na agéa ngeko. Otôe wetso te ôka na sényényée. Me nabambéyi aneegie woo mbe: Kusédani muanee gédidige gébévani. Ivô ahngô asiôngôé égékuséda.

¹⁹ Jésus angô mbe: Anye oma apitsi yedi nôndé asi paga. ?Nangoomba édigaa n’anye pitsi dikee? ?Nangoomba ésipéda anye éma ékee? Viga na muanee.

²⁰ Amamôétsa muanee. Vameena gédidige gébévani géena Jésus, tsiigane ématsôpa muanee. Amamesegea na va tsina. Amabisongono na magudé gô mônya.

²¹ Jésus ameevôa tétee amuanee mbe: ?G’ebandôgéô angô áka éma ekee? Tétee angô mbe: Emabandôa agébaka muanéngé.

²² Dipo kuka gédidi gémôgunya na gô soto. Dipo kuka na gô tungu yameba gôémôyôhéda. Eena we ngeba. Okô mbe éwe ôngoongôa éwedéa we, wedaka we.

²³ Jésus angô mbe: ?Nayee ôénda mbe: Okô mbe ôngoongôa? Gôndé ône eetsa môtémedi westo éngeendégégéa.

²⁴ Tsina na tsina amayavôga éaabéa mbe: Me tsatsuma paga, ivô wedéa me mbe nangeetsa môtémee wetso.

²⁵ Jésus ameena oma ayekani ahviga pita na gôndé angô. Vane amakangéa gédidi gébévani mbe: Gédidi, éwe ôsasinga muanee gôévovo na gôéôkô, me nagôtôma mbe: Kusa gôndé muanee ôdôô. Ombianikea éengéa na gôndé angô.

²⁶ Gédidi gébévani gémaamugana môndônga na tsiigane ématsôpa muanee na sangô gémakusa. Otô amuanee ômabaka na nyegôdani. Ayekani ahmavovo mbe: Awéyi.

²⁷ Vane Jésus amamôtsôpa g’ôgogoe gôémôtimôa. Na muanee amatema môtie.

²⁸ Jésus n’aneengie ahmeengéa agô eba. Gôsibaké muene môma. Aneengie ahngô mbe: ?Ebégô ndé ésiôngôa we ékuséda gédidige géne?

²⁹ Jésus angô mbe: Mônongo agédidi ône ôkusédu te gô ngudi yosambô.

Jésus amoomba ébeenda ôwedi na gékundugéô sedi (Bono na Matt. 17:22–23 )

³⁰ Ahmatimôga gône amoota tsengene nyetso éaGalilée te ootaga. Jésus asinyôngéô émenyanganô mbe andé va tungu éasimbe.

³¹ Gôébégô angô amabaka gôénigôa aneengie mbe: Me, Muana Amôma nangakabô na gô mogo moma angayôha me. Nangawa. Gô mbene apitsi dibaé, éne éamôtatô nangakunduga.

³² Aneengie ahsiôkô événdégéô éamane mavovi angô ivô amookô gomo gôémôbambéa nyivô.

?Mômane môvôni indaa? (Bono na Matt. 18:1–5 )

³³ Ahmatsiga na gô Capernaüm. Vameengéa ahngô na gô eba, Jésus ameevôa aneengie mbe: ?Anye gô nzéa nôtsundiki mandé?

³⁴ Ahngô ahsisiié. Gôébégô gô nzéa ahmabaka gôégagana ényangee. Oô mbe: Me nootéa émenyanganô na Kumu.

³⁵ Vane Jésus amadigaa na amabambéa ahngô nzima n’aneengi abaé mbe: Vigani n’eva. Jésus angô mbe: One anyôngéô éôta na gô mbene abésanéa gô ngima. Ayanzéé akedi muetso.

³⁶ Vane Jésus amatsôpa muana muanéngé v’ogogo. Amamôweseda na va mbene aô. Amamôvaata va mitanda miedi na amavovo mbe:

³⁷ One agobeda viana gandé éevi gô inami, agobedi na me. Na ône agobedi me eembe agobedi te na ône amakudéga me.

One asaba môvingi asô n’anyô andé te asô n’anyô (Bono na )

³⁸ Jean amavovo na Jésus mbe: Môékédi, we tôeni mômôgôô andé gôékuséda édidie ébévani gôndé oma gô ngudi yainoo. Na we tôbaki mbe tômôdékéda gôébégô asaba gô géômbé sasô.

³⁹ Jésus amavovo mbe: Nômbiamôdékéda. Gôsaba môma oongôa éyanza ébégô éamôsôba ényônganéôni gô inami, n’angô tsina na tsina atsuava me.

⁴⁰ One asaba môvingi asô n’anyô andé te asô n’anyô.

⁴¹ One anôétsa pengo gébungu sameba gôényua gô ina aChrist étôvambani, nanôbeenda na gô pie mbe angadiia môsenda.

Gôéyanza ébéva te ébégô édagani (Bono na Matt. 18:6–9 )

⁴² Okô môma anyôngéô ébôméda muana andé môtémovo n’ami, buedi mbe nôditéga étaé évôni va môngônga amômane na nômôgunya gô mubu kabaga abômédadô muanee.

⁴³ Okô ôgogoe woo ôndé ga pagô gôégôkubéda gô mabégô mabévani, kitsa angô. Okô ôndé n’ogogo ôvo na monyo apie gô môtémoo, ésadaga gôndé éwe. Okô ôndé na mogo moo mabaé na ôkea na gô mungu asoto, te éne éôtéa édagani. Gône te gô sotoge géseemakani. [

⁴⁴ Gône te gôndé misôbô miaaka ôtô misawakani na sotoge géseemakani.]

⁴⁵ Okô ôkôdôe ôndé ga pagô gôégôkubéda gô mabégô mabévani, kitsa angô. Okô ôndé n’okôdô ôvo na monyo apie gô môtémoo, ésadaga gôndé éwe. Okô ôndé na makôdô moo mabaé na ôkea na gô mungu asoto te éne éôtéa édagani. [

⁴⁶ Gône te gôndé misôbô miaaka ôtôe misawakani na sotoge géseemakani.]

⁴⁷ Okô mbe isoe yoo éndé ga pagô gôégôkubéda gô mabégô mabévani yuua éangô. Gôndé éwe gôéengéa g’ôkumu aNzambé n’eso évo ésadaga. Ivô gôékea na gô mungu asoto na miso mabaé te éne édagani.

⁴⁸ Gône te gôndé misôbô misawakani miaaka ôtôe, na sotoge géseemakani.

⁴⁹ Soto géngatumbu gôndé muetso mônongovo gamuakô vianga gô mabunza.

⁵⁰ Vianga te sôma samôsôba. ?Ivô ôkô viangô visabadô na duegi, môma angavinikéda duegi nayee? Bakani ga vianga viaduegi. Digaani na mitéma mimasumani anyene n’anyene.