Marc 8 - New Testament in Mitsogo

Jésus amayekedea mitônisa minayi mioma môyakô (Bono na Matt. 15:32–39

¹ Gô ndéô nene oma ayekani amawanyéa tungu épo. Gôsibaké ahngô na môyakô, Jésus amabambéa aneengi edi.

² Amavovo mbe: Neena omeaa ngeba. Aanakani. Pitsi ditatô dikahngô n’ami asabadô na môyakô.

³ Okô me nakeda ahngô na gô mbôka yaô, ahngô géé môyakô, yôtô yaô dingaba dimadeedani n’angakuéa gô nzéa na nzaane. Ayekani va gatse aô ahmaviga gôdagôda.

⁴ Aneengie amamôévôa mbe: Gôéngutéda omeaa muetso ?tôngadenga éne éaakôni gô tsenge émagasani égô nayee?

⁵ Jésus ameevôa aneengie mbe: ?Nôndé na mipemba mikee? Ahngô mbe: Tôndé na tsambué.

⁶ Na vane, Jésus amatôma géômbége mbe: Digaani va tsina. Na amabongo mipemba tsambué. Amaduka Nzambé mate gô miangô. Amamibukua na amamiétsa aneengie. Aneengie amamikabanéa na géômbége.

⁷ Ahmabaka agébaka na tôvo tônyama tagô mbéyi. Jésus amaduka Nzambé mate gô yangô na amatôma aneengie mbe: Ombakani ékabanéa na géômbége.

⁸ Muetso amaa amanguta. Aneengie amadingôa tsaô tsambué dimayôa n’ebéndéké émasanéakani.

⁹ Tambô gômabaka ôkana amitônisa minayi mioma. Jésus angô mbe: Nikakani, te vane.

¹⁰ Jésus n’aneengie ahmapeka gô mbôngô gôékea na gô tsenge ééndô mbe Dalmanoutha.

Apharisien abuta éena ngudi yaNzambé gô gémbégéa (Bono na Matt. 16:1–4 )

¹¹ Apharisien ahmaviga ahmabandôa étsunda na Jésus. Ahmanyôngéô émôkubéda buéyé gô mayanza medi mamisôba. Ahngô mbe: Tônyôngéô éena gémbégéa gétubéda mbe ngudi yoo diviga gôndé Nzambé.

¹² Jésus amavéguma na gégogomeo. Angô mbe: ?Anye asi pitsi yedi nôbuta gémbégéa sangudi yaNzambé nayee? Nanôbeenda na gô pie mbe: Gôndé ane abuta gémbégéa gôsaba gémbégéa.

¹³ N’angô amatsika ahngô. Amoomba épeka gô mbôngône gôékea na gô dipo tsényé yamubu.

Apharisien na kumu Hérode amabaka na meekédu maô (Bono na Matt. 16:5–12 )

¹⁴ Aneengie ameeba étsua môyakô. Gômabaka n’ahngô gô mbôngône môpemba ôvo.

¹⁵ Jésus amakeneda ahngô gô tsava mbe: Nôwema, baani n’ekena gô levure éApharisien na gô levure éaHérode.

¹⁶ Aneengie ahmavovo anguene n’anguene mbe: Avovo nane te gôsaba we na mipemba.

¹⁷ Jésus amookô éne émavovo aneengie. Na angô mbe: ?Anye nôvovo mbe, te gôsaba we na mipemba nayee? ?Anye nôsookô‐ma? ?Nôsiditéga‐a? ?G’ôsôbee wanyô mitéma mianyô mindé nayee?

¹⁸ Anye nôndé na miso ?nôseena‐a? Anye nônde na matô ?nôsookô‐a? ?Nôsabangôa‐a?

¹⁹ Vamabukua me mipemba mitayi gôéyéséda mitônisa mitaya mioma ?anye nômadingôa tsaô dikee yatsese dimasanéakani? Aneengie amaabéa mbe: Nzima na tsaô dibaé.

²⁰ Jésus amoomba éévôa ahngô mbe: Na vamabukua me mipemba tsambué gôéétsa mitônisa minayi mioma ?anye nômadingôa tsaô dikee yatseseye? Aneengie amaabéa mbe: Tsambué.

²¹ Vane Jésus angô mbe: ?Anye madeo nôsiôkô‐ma?

Jésus amadôngéda môsi pogu

²² Ahmabuéa gô mbôka étetu mbe Bethsaïda. Oma ahmatsuéa Jésus môsi pogu. Ahmamôénda mbe: Banda angô.

²³ Jésus amasumbéda môsi pogu g’ôgogo gôékea n’edi na gô étumba éambôka. Vane amatuéa mate gô mogo medi na amabanda mogome va miso. Jésus amamôévôa mbe: ?Ewe te ôena sôma‐a?

²⁴ Môsi pogu amabono na amaabéa mbe: Neena oma ga éététée. Namenya mbe oma te vakeahngô.

²⁵ Jésus amoomba ébanda mogo medi gô miso mamôma nône. Môma amabono na nzôô. Amadônga na ameena éetso ti na vede.

²⁶ Vane Jésus ameenda angô mbe: Kiaka na gô eboo. Ombianika na gô mbôka.

Pierre amapandôéda mbe: Jésus te Christ (Bono na Matt. 16:13–20 )

²⁷ Jésus na aneengi edi ahmakea gô nzéa éagésa satsenge ééndô mbe Césarée étômu na Philippe. Vamakeahngô gô nzéa, Jésus ameevôa ahngô mbe: ?Gô matasa moma me ndaa?

²⁸ Amamôaabéa mbe: Avo amenya mbe éwe te Jean‐Baptiste. Avo dôta amenya mbe éwe te Elie. N’avo mbe éwe te môvo va gatse apandôédi amatasa maNzambé.

²⁹ Jésus ameevôa ahngô mbe: ?Gatasanye, me nda‐vo? Pierre amamôaabéa mbe: Ewe te Christ, ômatômu na Nzambé.

³⁰ Vane Jésus amadékéda ahngô mbe: Nômbiayeega ébeenda môma.

Jésus amabeenda ôwedi na gékundugéô sedi (Bono na Matt. 16:21–28

³¹ Na vane Jésus amabandôa éékéda aneengie mbe: Engaba mbe me, Muana Amôma nangeena maguga mamootéani. Peeye na tsesu yadeekedi adigondoku n’anigôi amige miaNzambé angatseda me. Nangayôhu. Gô mbene apitsi dibaé, éne éamôtatô nangakunduga.

³² Amavovo mabégô mema ti na vede. Na Pierre amabambéa Jésus na v’anguene. Amasungéa Jésus mbe: Ombiavovo. Esangaba nane.

³³ Ivô Jésus amanikéda misome na gôndé aneengie muetso. Amakangéa Pierre mbe: Nôtôga na gôdagoda n’ami, Satan. Ewe ôsatasa éne ényôngéô Nzambé. Otasa te éne ényôngéô oma.

³⁴ Na Jésus amabambéa géômbége n’aneengie na amavovo mbe: Okô môma anyôngéô ékea nzéepo n’ami, aviié mane maamuene ngima. Atsué gésumuge sedi sowa na akéé géômbé gévo n’ami.

³⁵ One akebangana ôwa angô angawa. One asabusuga ôwa gô inami na gô Tsangô Eami Eamôsôba andé na monyo.

³⁶ ?Tsoongo ndé ôkô môma adiia éôma éetso éava tsina na adimbanéda monyoe wedi apie‐a?

³⁷ ?Môma angavana monyo na sôma ndé?

³⁸ Okô môma eena tsoyi gôndé me na mabégô mami va mbene oma andé n’edi ane anôtôga gôndé Nzambé gôémôviia ngima, na andé abévani; menyani mbe me, Muana Amôma nangeena tsoyi gôndé angô vangaviga me g’ôkumaka ondômbee a Téta Nzambé n’asi g’ôba ayanzie wedi.