Marc 5 - New Testament in Mitsogo

Jésus amadôngéda môma amabaka na gédidi gébévani (Bono na Matt. 8:28–34

¹ Jésus n’aneengi edi ahmabuéa gô dipo tsényé yamubu ôtetu mbe Galilée. Te tsenge émadigaa Agérasénien.

² Jésus amasutuméa gô mbôngône. Mômôgôô môvo amaviga gô tungu éapesi na amawanya na Jésus.

³ Mômôgôô nône amabaka na gédidi gébévani. Amadigaaka te gô tungu éapesi. Gôsibé môma oongôa émôkata béyé mbe na panga.

⁴ Kuka diyekani amamôkanéga émôkata makôdôme gô gébéngé samianga, na mogome na tsônô yamisagô. Ivô angô amapaba pangane éava mogo na amaboa gébéngége sagô makôdô. Gôsibaké môma na ngudi gôémôsikéga.

⁵ Na pitsi n’omanda amakiaka okangana gô tungu éapesi na gô mikôdi. Amaamugana na amaabetéga na mataé.

⁶ Ameena Jésus andé gôdagôda. Mômôgôô nône amaviga pitapita. Amakotomo. Amasiba mabongo medi va mbene aJésus gôémôneegeda.

⁷ Amavovo n’ogi agô ngongo mbe: ?Obé nayee n’ami, éwe Jésus Muana ANzambé ône amôbô na môbô? Nagôgondo ti na kokoo gô ina aNzambé, ôneetsa me tsôgôô.

⁸ (Amavovo nane te Jésus amamôtôma mbe: Gédidi gébevani, kusa gônde môma nône.)

⁹ Vane Jésus ameevôa mômôgôô nône mbe: ?Inoo ndaa? Angô mbe: Inami te Légion. Evéndégéô mbe menga na menga. We tôndé ayekani.

¹⁰ Amagondo Jésus na maninganinga mbe: Kokooye éwe ônapatsa édidi ébévani na gôdagôda na tsengene.

¹¹ Vamabaka ôbua ôvôni angudu amakiaka aa môyakô aô va tungu éamôkôdi.

¹² Edidi émavovo na Jésus mbe: Keda we tôengéa gô ngudu yedi. Tôdigaa gôndé yangô.

¹³ Jésus amasingéa éangô. Vane édidi ébévani émakusa gôndé mômôgôô nône na émeengéa gô nguduye. Obuee wetso ômabaka ôkana amitônisa mibae miangudu. Omavéndama gô môkôdie ômabaka mavéndavénda na gô mubu. Obuee wetso ômatôndôméa.

¹⁴ Akeneyi anguduye ahmayavôga ékea gôébeenda oma gô mbôka na gô mitsaba mbe: Nguduye digudi. Oma ahmaviga gôéena éne émabuéani.

¹⁵ Ahmatsiga na vandé Jésus. Ahmeena mômôgôô akusédiô édidi ébévani andé digaa. Amaata maduani medi. Na môtémedidô ômasumani. Oma muetso amookô gomo.

¹⁶ Ane ameena éetso émabuéa gôndé mômôgôô nône na nguduye, amanigôa akaô tsangône.

¹⁷ Muetso amapatsa Jésus mbe: Noôtôga gô tsenge éasô.

¹⁸ Vamapeka Jésus gô mbôngône, mômôgôô nône akusédiô édidi ébévani, amabambea Jésus mbe: Singa me nadigaa n’ewe.

¹⁹ Jésus amakina ékea n’edi. Ameenda mbe: Kiaka. Nika na gô eboo, na gô mbumu éoo. Okebeendahngô éne éenaniô éwe ngeba na Kumu.

²⁰ Te vane mômômôô amakea na gô tsenge étetu mbe Décapole. Amanigôa éetso éne émeendô angô na Jésus. Muetso amookôni amagogo ésôbasôbana.

Muanamôgeto aJaïrus na môvo môgeto amadôngéduni (Bono na Matt. 9:18–26 )

²¹ Jésus amanikea éabôga na mbôngône na gô dipo tsényé. Géômbé gévôni gémakôkangana va kôbangô aJésus andé gôpégôpé na mubu.

²² Tsesu eba agéwanyéô sAjuif amaviga. Inedi te Jaïrus. Ameena Jésus. Amakotomo na amasiba mabongo medi va mbene aJésus.

²³ Amaduka Jésus na maninganinga gôémôwedéa. Angô mbe: Muanami amôgeto atsikandéda ti tsikanéda. Viga ôvimôtsakéga mogome moo. Buta mbe adônga gôéba na gétabé.

²⁴ Jésus amakea n’edi. N’oma ayekani ahmakea gôégôngana n’edi na gésa na gésa.

²⁵ Vamabaka môgeto môvo amabeea môvôva, môsingi nzima ema n’ema ébaé.

²⁶ Amagogo ékénga gô pingô yanganga na amatubédu maguga na ngangaye. Okitie wedi wetso ômadimbana te gô ébeea éne. N’angô asidôngé ivô ébeea émoomba ébata.

²⁷ Môgeto nône amookô oma anigôa éne émeenda Jésus. Amaviga tsongono gô ngima edi gôébanda môkandee ômaata Jésus.

²⁸ Amatasa gô môtémedi mbe, ôkô me nakea nakebanda angô pengo gô môkandee, nangadônga.

²⁹ Vamabandangô môkandee, ôgi yadingani, môvôvee ômabeea môgeto nône ômadônga. Amookô ôtô edi mbe: Nadôngi.

³⁰ Tsina na tsina Jésus amookô mbe dipo ngudi yedi didôngéda oma dikeyi. Amagéngôga gôébono géômbége gémabaka n’edi. Angô mbe: ?One abandi me môkandee indaa?

³¹ Aneengi edi ahmakéma ahngô mbe: ?Oseena oma ahndé na ndaandaa adua, na gésa na gésa? ?Nayee ôénda mbe ône abandi me indaa?

³² Béyé mbe nane, Jésus amabono oma muetso gôétsutsua ône amôbandini.

³³ Môgeto nône asibômu mbe: Te me nadôngédiôni. Amatatéa na gomo. Amasiba mabongome va makôdô maJésus na amamema mabégô metso.

³⁴ Jésus amavovo n’edi mbe: Muanami, ôdôngédiô te gôsitsumé éwe ngudi yami paga. Kiaka na gétabé. Oyuuégi gô pievia yoo.

³⁵ Jésus agébaka gô nzéa gôévovo, kima émaviga gô eba aJaïrus gôémôbeenda mbe: Muanoo awéyi. ?Nôgôbanganéda môékédi na gône nayee?

³⁶ Ivô Jésus asiôkéô éne émavovo angô. Amavovo na Jaïrus mbe: Ombiookô mangongo. Suméda môtémoo gétsumé me paga.

³⁷ Jésus asisingé muene môma akea n’edi buétsé te Pierre na anayaa Jacques na Jean.

³⁸ Ahmatsiga gô eba aJaïrus. Ahmadenga oma ahndé na piokipioki gôédéa na aamugana mindônga.

³⁹ Jésus ameengéa na gô eba. Angô mbe: ?Piokipiokine éandé? ?Nôdéa ndé? Muanee asiwa. Andé gô vio.

⁴⁰ Oma ahmakeenga Jésus. Jésus amakuséda ahngô muetso gô eba. Amasinga téta n’eyee amuanee n’aneengi edi atatô eengéa n’edi na gô tsongone émabaka muanee.

⁴¹ Jésus amatsôpa muanee g’ôgogoe na ameenda angô mbe: Talitha Koum. Evéndégéô mbe muana, me nagôénda mbe: Timôga.

⁴² Muanee amôgeto amatimôga na amakea. Amabaka te aka na nzima n’ema ébaé. Vameena oma nane, ahmatsapéô na ahmasôbasôbana.

⁴³ Jésus amadékéda ahngô mbe: Nômbiayeega ébeenda môma. Na angô mbe: Itsani muana môyakô.