Marc 4 - New Testament in Mitsogo

Tsava éamômuaki amibie (Bono na Matt. 13:1–9 )

¹ Jésus amoomba éékéda gô môgogu amubu. Vamayeka omee ga mabunza gô kôbangô edi, amapeka gô mbôngône na amadigaa. Géômbége setso gémaba va tsényé.

² Ameekéda ahngô pingô yamabégô gô tsava.

³ Angô mbe: Oôkôni. Mômuaki amakea gôémuaka mibie.

⁴ Vamamuakangô mibiemie, mivo mimaaga gô nzéa na nyoeye dimaviga gôéminzomeda.

⁵ Mivo mimaaga gô tungu éamataé. Gôsidenge mibiemie toto éyekani mimayavôga ékanda.

⁶ Ivô vamatsiga ômandee, mibeendimie mimasinégéa. Gôsitibéké totone, ngangiye gébé na meba, mibeendimie mimawa.

⁷ Mivo mibie mimaaga gô tungu yakavanga. Kavangaye dimoongôga, na dimapika mibeendimie. Na miangô misibôté.

⁸ Mivo mibie mimaaga gô toto éamôsôba. Mimakanda na mimoongôga. Mimabôta, gévo géétété te nzima ditatô. Gévo te nzima môtôba. Gévo dôta kama na kama.

⁹ Vamamana Jésus égunya tsava nedué, angô mbe: Anye nôndé na matô gôeôkô, ka te nôôkôkô‐ma.

?Gôébégô ndé Jésus amagunya tasva? (Bono na Matt. 13:10–17 )

¹⁰ Géômbé gémakea. Avo oma amasanéani amaseta Jésus. Ahngô n’aneengie amamôévôa nyivô gôébégô éatsavaye dimagunyangô.

¹¹ Jèsus amaabéa mbe: Mabégô mokumu aNzambé masinigôganéô na mbeego mameetsô te anye. Ivô ane ahsaba gandé anye ahngookô mabégôme te gô tsava ditévo.

¹² Endé te nane. Ahngô ahngeena ivô gémanéé. Ahngô angookô ivô génigôgéô. Ahngô kabaga ahkoga na ahngô kabaga ahsingéô kokoo gô ébévee éaô.

Jésus amatimbôanéda tsavane (Bono na Matt. 13:18–23 )

¹³ Jésus amoomba évovo mbe: ?Anye nôsanigôgéô tsava nedué‐a? ?Nayee nôngookô dipo tsava‐a?

¹⁴ Mômuaki amibie te angô anigôa Ogi aNzambé.

¹⁵ Avo oma agono na toto éagô kôbangô anzéa émaaga mibiemie. Vookô ahngô mabégôme, tsina na tsina Satan aviga gôéwata mangô gô mitéma miaô.

¹⁶ Mônongovo, avo agono na toto éamataé émaaga mibiemie. Ookô Mabégô MaNzambé na gényônga.

¹⁷ Ivô agono na géétété gésaba na ngangi, ahngô asaba na môvinéne. Vaviga maguga na vabuéa gékuanô gô Mabégô MaNzambé ahngô Asasipa.

¹⁸ Avo te ane agono na tungu éndé kavangaye. Ahngô ane te ane ookô Mabégô MaNzambé.

¹⁹ Ivô matasa maô metso te mikebanganô miava tsina. N’ahngô ahndé n’onzôô okiti na mavo manyima mabévani. Te mabégô mema mayôha Mabégô MaNzambé na makoa mangô maka na sawa na meendô mbe mabégô mabobo.

²⁰ Avo ahgono na toto éamôsôba. Te ahngô ahmookô Mabégô MaNzambé na ahkenea mangô, makuséda ésima éamisôba gô mitéma miaô. Môvo nzima ditatô. Môvo nzima môtôba. Môvo môkama.

Tsava éadambi (Bono na )

²¹ Jésus amoomba évovo n’ahngô mbe: ?Dambi éyôani épikô na môdômbô‐a? ?Vo évumbuku gô tsina éekoko‐a? ?Esavumbuku te va gévumbéô sambe éngeenéa buedi‐a?

²² Metso mamasuéguni mangaba mamatsutsugani. Na metso mav’esooe mangaba mav’ekanga.

²³ Okô mbe gôndé môma na matô gôéôkô, ka te ookôkô‐ma.

²⁴ Jésus amoomba ébeenda ahngô mbe: Keneani mane mookô anye mane. Nôngeetsô te ôkanee ôétsanye, yénôombu ti nôombugu.

²⁵ One andé na sôma te ône angoomba ékôndéguni na asangadôgômbéô sôma. Ivô ône asaba na sôma, abéyee na vipesu vingasuméa te watôgô.

Tsava éamibie mikandani

²⁶ Jésus amoomba évovo mbe: Okumu aNzambé ôndéké mônongovo ga môma amuaka pôto gô tsaga.

²⁷ Mômuaki eeboga na pitsi na atimôga n’omanda. Esoe éapôtô ékanda na éôngôga, angô gémenye gakanda éangô.

²⁸ Totone ékandéda pôtône. Na pôtône épanga étubéda te tsongi. Vabôta yangô étubéda tsangu. Veenanô géeduge gébômu mbe pôtône éoodi.

²⁹ Na voodo pôtône môma akea akeduka yangô. Ndéône éeduka pôtône ébuéyi.

Tsava éagéétété gévôni (Bono na Matt. 13:31–32 34

³⁰ Jésus amavovo n’ahngô mbe: ?Wa n’anyô tôgoneda ôkumu aNzambé na sôma ndé? ?Tôngagunya tsava ndé gôégoneda n’angô?

³¹ Okumu aNzambé ôgono na môbie ôéndô mbe moutarde. Vagaabô angô gô toto, ôôtéa ôge na mibiemie mietso miava tsina.

³² Ivô vagaabô angô ôkanda na ôvunda ôôtéa évo éétété éambôtô nyetso. Nyoyi diviga gôésaa mebu maô gôésomo gô tsina amitabé miedi.

³³ Te gameekéda Jésus oma mabégô gô tsava. Ameekéda gangoongôa oma éôkô yangô.

³⁴ Jésus asiikédé ahngô gégunyé tsava. Vamabaka Jésus n’aneengi edi anguene, amasupuaka ahngo mabégô metso.

Jésus amadékéda gékunga (Bono na Matt. 8:23–27 )

³⁵ Na dikoo yanyoone, Jésus amabeenda aneengie edi mbe: Okani na gô dipo tsényé yamubu.

³⁶ Amatsika géômbége vane. N’aneengi edi ahmamônugaka mbôngône émabaka angô. Dipo mbôngô dimabaka gôpégôpé n’edi.

³⁷ Gékunga gévôni gémakungéda. Miyôkiyôki mimeengéa na gô mbôngône, na yangô émaba gôpégôpé na tôndôméa.

³⁸ Jésus te andé gô vio gô maténa na môtsée ômabaka tsakéga gô gétandô. Aneengi edi ahmamôtimôa na ahmamôbambéa mbe: ?Môékédi, éwe ôsakebangana gômatôwani‐a?

³⁹ Vamatimôgangô amakaméa ôpungee, na amavovo na miyôkiyôkimie mbe: Digaagana. Ténga na suii. Opungee ômoota, na gômbana yôkôyôkô.

⁴⁰ Na Jésus amasemba aneengie mbe: ?Nôôkô gomo gôndé? ?Nôgétsumaka ngudi yami paga nayee?

⁴¹ Ahngô amatsapéô na ahmasôbasôbana anguene n’anguene mbe: ?Odôô môma andé nayee? ?Oôkanéô ti n’opungeena miyôkiyôkimie?