Marc 3 - New Testament in Mitsogo

Gômabaka mômôgôô n’ogogo ômasombegani (Bono na Matt. 12:9–14 )

¹ Jésus amoomba éengéa gô eba agéwanyéô. Amadenga wangô môma andé n’ogogo ômasombegani.

² Muetso ahmabaka wangô ahmasingégéda Jésus gôémôbono mbe mavooe angadôngéda môma nyee edunda. Ahmeenda nane te gôémôsoseda.

³ Jésus amovovo na gékonzoge géne mbe: Timôga va mbene omeaa muetso.

⁴ Jésus ameevôa géômbége mbe: ?Nyee edunda, na gôéyanza mamisôba, na gôéyanza mabévani éne éabuedi yééni? ?Na gôédôngéda môma, na gôéyôha môma, éne éabuedi yééni? Muetso ahsibubué.

⁵ Te vane Jésus amabono ahngô n’opisa. Ameena panda gô disôba yamitéma miaô. Amavovo na gékonzoge mbe: Konyoko ôgogoe woo. Amookonyo na ômadônga.

⁶ Apharisien amakusa gô eba agéwanyéô gôédigaa gétungu na géômbé saHérode mbe ahvanga gépangô gôéyôha Jésus.

Pingô yeômbé émaviga na gôndé Jésus

⁷ Jésus n’aneengi edi ahmanôtôga vangô. Ahmakea gô môgogu amubu. Géômbéômbé soma gémaanda angô. Gématsiga gô matumbame metso bandôa gô Galilée, na gô Judée,

⁸ na gô Jérusalem wetso, na gô Idumée, na gô dipo tsényé yaJourdain na gô kôbangô aTyr na gô Sidon. Pingô yoma ahmookô mane mamayanzaka Jésus na ahmakea na gôndé angô.

⁹ Jésus amatôma aneengi edi mbe: Vigani na mbôngône napeka kabaga oma abéba me.

¹⁰ Vamookô oma mbe Jésus adôngéda oma ayekani ahmagagana nzéane gôémôgônga gôébuta édôngédu.

¹¹ Edidi ébévani émasibaka mabongo maô ôkô émamôena na émaadôngana mbe: Ewe te Muana ANzambé.

¹² Ivô Jésus amadékéda éangô mbe: Nômbiayeega ébeenda oma mbe Odôô te Muana ANzambé.

Jésus amasevoa aneengi edi nzima n’abaé (Bono na Matt. 10:1–4 )

¹³ Jésus amabata na gô ngongo amôkôdie. Na amabambéa ane ahmasevoangô. Ane ahmabambéôkôni te ane ahmakea na gôndé angô.

¹⁴ Jésus amasevoa nzima n’oma abaé. Amanyôngéô mbe ahdigaa n’edi, na mbe atôma ahngô gôétsua tsangône éedi.

¹⁵ Jésus ameetsa ahngô ényanga gôékuséda édidi ébévani gôndé oma.

¹⁶ Ane ahmasevoaka Jésus nzima n’oma abaé, mina maô môvo te Simon. (Jésus amoogaka angô mbe Pierre.)

¹⁷ Avo aneengie te Jacques na môdimi edi Jean, anamôgôô aZébédée. (Jésus amooga ahngô mbe Boanergès, événdégéô mbe oma andé ga môdumu.)

¹⁸ Avo mina maô te André, Philippe, Barthélemy, Matthieu, Thomas, Jacques muana aAlphée, Thaddée, Simon amoogu mbe Zélote, te ône amabaka gétômbiatômbia gô mabégô matsenge.

¹⁹ Na Judas Iscariote, ône angakaba Jésus.

Kinde éaJésus ahmaviga gôébongo angô

²⁰ Ahngô ahmakea na gô eba. Géômbége gémoomba ékôkangana. Vane Jésus n’aneengi edi ahsiôngôé ta na éaa môyakôe waô.

²¹ Vamookô kinde éaJésus éne émabuéa gôndé angô, ahmaviga gôébongo Jésus. Ahmavovo mbe: ?Andé nayee? ?Avétsi môkambô mani?

Jésus amaabéa atsumi apaga (Bono na Matt. 12:22–32 12:10 )

²² Anigôi amige miaNzambé ahmaviga na gô Jérusalem. Ahmavovo mbe: Jésus ôdôô atômu na Béelzébul. Te yabédé amuene andé gôndé angô. Avo ahmavovo mbe: Ii, te na gô pie. Akuséda édidi ébévani te gô ngudi yakumu éayangô.

²³ Jésus amabambéa oma na gôndé angô. Ameevôa ahngô mônongovo ga tsava mbe: ?Satan kumu éedidi ébévani angapatsa amuene nayee?

²⁴ Okô asi tsenge épo asaba n’evambevo, tsengene ésangadinga n’ebudangana.

²⁵ Na eba te nane. Okô asi ebovo asaganédana eembe na mbumune étatôani.

²⁶ Okô Satan akambôgi mane maamuene eembe amani éatôa pingô yamivôva, n’okumu edi ôsangadôôkanô.

²⁷ Eba agengaa ôseesuégéaka amuene aboni nani buétsé nôpanga émôkata gésengo. Vane nôeesuaka.

²⁸ Me nanôevéda ébégô édué éapie mbe oma muetso ahngasingéô kokoo gô mabégô maô metso mabévani madienza yamavovia maô.

²⁹ Ivô Nzambé asasinga kokoo gôndé ône eenza Gédidi Samuene Nzambé. Gô ébévee éne, môma angatsundédu na gô môbô na môbô.

³⁰ Ebandô émeevéda Jésus nane, te gômavovo oma mbe: Akayiô na gédidi gébévani.

Iyee n’adimi aJésus ahmamôbuta (Bono na Matt. 12:46–50 )

³¹ Yeedi n’adimi edi amôgôô ahmaviga na v’ombaa na ahmavovo mbe: Bambéani we angô vane.

³² Géômbé gévôni soma gémabaka digaa gô kôbangô aJésus. Môvo amabeenda Jésus mbe: Oôkiô, yoo n’anayoo ahndé v’ombaa. Abambéa éwe.

³³ Jésus amaabéa mbe: ?Iya indaa? ?Aneya yandaa?

³⁴ Vamavova angô nane, amabono oma ahmabaka digaa va kôbangô edi. N’angô mbe: Iya n’aneya te adua.

³⁵ Me nanôbeenda mbe aneya na iya te ahngô eenda éne ényôngéô Nzambé.