Marc 2 - New Testament in Mitsogo

Jésus amadôngéda môbeeyi amakata éeyo (Bono na Matt. 9:1–8 )

¹ Vamoota ôkana apitsi, Jésus amanika na gô Capernaüm. Gômookanô mbe Jésus andé te gô ebee égô.

² Pingô oma ahmabaka na mbanzambanza bandôa v’ombaa na gô mbadi. Jésus ameekéda ahngô tsangô éaNzambé.

³ Avo oma ahmaviga na gôndé Jésus ahmatsua môbeeyi amakata éeyo. Môbeene ône amatsuaô n’oma anayi.

⁴ Ahsiôngôé éwesea na gôndé Jésus, oma ayekani ahmabaka vangô. Ahmatuba môahnzee eba va tsimatsima na vandé Jésus. Gô épôdékée éne ahmasuméda môbeene andé yama gô gékakage.

⁵ Jésus ameena mbe: Omeaa asatsuma ngudi yami paga. Na amavovo na môbeene mbe: Muanami, ébévee éoo ésingéiyô kokoo.

⁶ Vangô vamabaka avo anigôi amige miaNzambé digaa. Ahmatasa gô tsina yamitéma miaô mbe:

⁷ ?Môma noo, avovo vita nane nayee? Eenza Nzambé. ?One oongôa ésingéa oma kokoo gébé amuene Nzambé, indaa?

⁸ Jésus amamenya mabégô metso mamatasa ahngô gô tsina yamitéma miaô na amavovo mbe: ?Nôndé n’one mônongo amitéma nayee?

⁹ ?Gô mabégô mema mabaé, éne ésadaga évovoni yééni? Okô neenda mbe ébévee éoo ésingéiyô kokoo. Vo neenda mbe timôga, bongo gétava soo, kiaka na makôdô moo. ?Ene ésadaga évovoni yééni?

¹⁰ Ivô nanyôngéô étubéda anye mbe me Muana Amôma va tsina éva nandé n’enyanga gôésingéa oma kokoo gô ébévee éaô. Vane Jésus amavovo na môbeene mbe:

¹¹ Me natôma éwe mbe, timôga. Bongo gétava soo. Kiaka na gô eboo.

¹² Ogi yadingani môbeene amatimôga. Amabongo gétava sedi na amakusa, te muetso aboni nani. Na muetso ahmatsapéô na ahmakuméda Nzambé. Ahmavovo mbe: We madeo tôsiena nani.

Jésus amabambéa Lévi (Bono na Matt. 9:9–13 )

¹³ Jésus amoomba ékea na gô kôbangô amubu. Géômbége setso gémaviga na gôndé angô. Na Jésus ameekéda ahngô.

¹⁴ Vamoota Jésus oota nani, ameena Lévi muana aAlphée andé digaa gô tsongo ékôkégu dode yedepu. Amamôbeenda mbe: Oka nzéepo n’ami. Lévi amatimôga na amakea na Jésus géômbé gévo.

¹⁵ Jésus amabaka va tabudé gô eba aLévi gôéaa môyakô. Gômabaka va tabudé n’edi abongi adepu ayekani, n’oma aminongo mibévani, n’aneengi edi. Ti ahngô ayekani ahmaanda Jésus nzéepo.

¹⁶ Anigôi amige miaNzambé gô géômbé sApharisien ahmeena Jésus andé gôéaa va tabudé épo n’oma abévani n’abongi adepu. Apharisien ahmeevôa aneengi aJésus mbe: ?Jésus aa n’omeaa vavo nayee?

¹⁷ Vamookô Jésus ahvovo nane, amaabéa mbe: Ane ahsabeeani ahsookô tsôvé éamôbôgani. Te abeeyi amôôkô tsôvé. Me tsivigé gôébambéa ane anyepani ivô namaviga gôébambéa abévie gôékoa mitéma miaô.

Gékinéô samôyakô gôévovo na Nzambé (Bono na Matt. 9:14–17

¹⁸ Aneengi aJean n’Apharisien ahmakina môyakô gôévovo na Nzambé. Oma ahmaviga gôéévôa Jésus mbe: Aneengie aJean n’Apharisien ahkina môyakô gôévovo na Nzambé. ?Aneengi woo gékiné nayee?

¹⁹ Jésus amaabéa ahngô gô kôgô mbe: ?Géômbé sasueti ayômba géngakina môyakô asueti amuene mômôgôô, kumu ayômbaye andé vangô‐a? Gésangakina.

²⁰ Gô ndéône ésangaba mômôgôô kumu ayômba v’angô, géômbé sedi géngakina môyakô te nyoone.

²¹ Môkanda edôngé ôsananôkô gébambo gô épôdéké éangoyi émani ébooni. Gébamboge sedôngé gésusuga gôôvôu sangô na gékaka ngoyine ébooéni. N’epôdékée ébaki égegé te éka vembe na memba.

²² Môma asoongôa éetéa maduku mamiduengi gô géeteô sedi sagégôbôkô sanyama gémagasani. Vatogo madukume, gégôbôkôge gémagasani gésavutuga. Sangô géatéga. Na géetéôge na madukume ébungana éetso. Buedi mbe môma eetéa maduku mamiduengi gô gégôbôkô gédeedani.

Jésus na mabégô manyee edunda (Bono na Matt. 12:1–8 )

²³ Nyee edunda Jésus n’aneengi edi ahmakea akitsangana gô tsaga éapôtô. Aneengi aJésus ahmakea ahkudua aduka pôtô.

²⁴ Apharisien ahmeevôa Jésus mbe: Bonoko. ?Aneengie woo, nayee eenda gô nyee edunda éne émakitsô môge mbe, gééndô nyee edunda?

²⁵ Jésus amaabéa ahngô mbe: ?Anye madeo nôsitanga éne émeenda David, angô n’ane amabaka n’edi vamookô ahngô nzaa‐a?

²⁶ Gô ndéô émabaka Abiathar payi éadeekedi adigondoku, David ameengéa na gô eba aNzambé. Amabongo môpemba amôge, ône ôsaaka oma muetso, buétsé te adeekedi adigondoku anguene. David amaa na ameetsa ane ahmabaka n’edi.

²⁷ Jésus amabeenda Apharisien mbe: ?Na nyee edunda, na môma, ône atômani indaa? Te môma.

²⁸ Te me Muana Amôma nandé Kumu anyee edunda.