Marc 15 - New Testament in Mitsogo

Jésus amatsundédu na Pilate (Bono na Matt. 27:1–2 11–14 )

¹ N’ongôngôe wetso, tsesuye yadeekedi adigondoku amaduga tungu épo na peeye, n’anigôi amige, n’asi kundu épôni éAjuif gôésevoa môsônda gôékatéda Jésus. Ahmakea n’edi gôéétsa angô gôndé Pilate, môtômi atsenge.

² Pilate ameevôa Jésus mbe: ?Ewe te môtômine aAjuif‐a? Jésus amamôaabéa mbe: Otsimi.

³ Tsesuye yadeekedi adigondoku ahmatsua misunda miyekani gô mane mameendaka Jésus.

⁴ Vane Pilate amoomba éévôa Jésus mbe: ?Ewe ôsaabéa‐a? ?Osookô gayeka misundamie gô mane mameendewe‐a?

⁵ Ivô Jésus asibiké ta n’ebégô évo. Pilate amatsapéô pepe.

Jésus ameesédu n’oma gôéyôhu (Bono na Matt. 27:15–26 )

⁶ Te gésima saPilate gô sueti yetso yaPâque akuséda môvo môsi gô tsôgôô. Akuséda te ône anganyôngéô géômbége.

⁷ Gômabaka môma môvo, inedi Barabbas. Ameengedu gô eba atsôgôô gômakinangô ôtômu amôtômine atsenge na gômayôhangô môma.

⁸ Géômbége soma ayekani ahmawesea na va komu eba aPilate. Avo ahmaduka angô mbe: Inda éne ééndaka éwe kuka yetso gô Pâque.

⁹ Pilate amabambéa géômbége mbe: ?Nônyôngéô mbe nanzeegeda môtômine aAjuif‐a?

¹⁰ Gôébégô Pilate asibômu mbe tsesu yadeekedi adigondoku ameetsa angô Jésus gô ngusune yaô.

¹¹ Ivô tsesu yadeekedi adigondoku amoonguma ne géômbége mbe: Nôénda te Pilate mbe: Kuséda Barabbas gô tsôgôô.

¹² Pilate amoomba évovo na géômbége mbe: Na ône atetanye mbe môtômine aAjuif ?nônyôngéô neenda angô nayee?

¹³ Ahngô ahmaadôngana mbe: Komeda angô va gésumu sowa.

¹⁴ Pilate ameevôa ahngô mbe: ?Ebégô ndé ébévani émeendangô? N’ahngô amoomba éadôngana mbe: Ayôhu te gô gésumu sowa.

¹⁵ Gôévooto géômbége, Pilate amakusédéa ahngô Barabbas. Na amabitéda Jésus. Ameetsa angô na gôndé migodemie mbe ahngamôkomeda va gésumu géyôhu oma.

Migode mimakeenga Jésus (Bono na Matt. 27:27–31 )

¹⁶ Migodemie mimakea na Jésus na gô wene môkii. (Te môkii ôndé gô gatse eba amôtômi atsenge.) Na géômbége samigode gémakôvana.

¹⁷ Ahmaatéda Jésus ngoyine éatsoo. Ahmadipa ngundu éamingoo gôémôaatéda yangô gô môtsé ga gépôkôdô sokumaka.

¹⁸ Gô deti éaô amamôkômbôa mbe: Sambaa. Sambaa, môtômine aAjuif.

¹⁹ Ahmamôyôgô na péndé gô môtsé. Ahmamôtuéa mate. Ahmasiba mabongo maô. Ahmakotomo va mbene edi gôémôdeta.

²⁰ Vamamanahngô émôdeta, ahmamôsasa ngoyine éatsoo. Ahmamônikéa éaatéda môkandedi. Vane amamôkuséda na gô mbadi gôémôkomeda va gésumu sowa.

Jésus amakomedu va gésumu sowa (Bono na Matt. 27:32–44

²¹ Vamakeahngô ahmawanya na mômôgôô inedi Simon, amaviga gô tsagedi. Simon nene amabaka môsi tsenge étetu mbe Cyrène. Angô tétene aAlexandre na Rufus. Vamadengahngô Simon gô nzéa, migodemie ahmamôtindéga gôétsua gésumuge géngayôhu Jésus.

²² Ahmakea na Jésus na gô tungu étetu mbe Golgatha. Evéndégéô mbe kokoh amôtsé.

²³ Ahmanyôngéô émôétsa maduku mamagésu na maganga magéôkô pievia, matetu mbe myrrhe. Ivô Jésus amakina.

²⁴ Vane ahmamôkomeda va gésumu. Ahmakabana maduani medi. Ahmatséva na nzéké gôésevoa ône angadiia éduanie énganyôngéô ahngô.

²⁵ Emabaka n’ongôngô, nyee ômatsanya vamakomedahngô Jésus va gésumu.

²⁶ Gô gésumuge gômatendu môtsundue ômayôhu angô. Gômatendu mbe: Odôô te môtômine aAjuif.

²⁷ Ahmakomeda dôta asi môkôbé abaé va gésumu sowa va kôbangô aJésus. Môvo gésa gémôgôô. Môvo gésa gégeto.

²⁸ [Te gamadugédu Matendeo MaNzambé mane matôbeenda mbe: Angô amamenyanganôkô g’ôtangôe oma abévani.]

²⁹ Ane ahmootaka v’angô ahmadogima miôtsé miaô na ahmadeta Jésus mbe: Ehee. Ewe, ka te ômeendaka mbe, me nangapanzéda eba aNzambé nasaa wene gô pitsi ditatô.

³⁰ Tambô yuuéga gô panda yoo vôyé vandé éwe va gésumu sowa vane.

³¹ Te mônongovo tsesu yadeekedi adigondoku, n’anigôi amige miaNzambé amadeta Jésus na ahmavovo anguene n’anguene mbe: Amanôtôa akedi gô panda yaô, géé amuene ?asangaanôtôa‐a?

³² Tambô Christ, ône eendô mbe môtômi aIsraël, asutuméké va gésumu vandé angô vane. Okô tôeni angô asutuméa we tôsangadôtsuma paga. N’ahngô abaé ahmakomedu kukepo n’edi ahmamôtoko te nane.

Jésus amawa (Bono na Matt. 27:45–56 )

³³ Ndéône émabaka kômbéne ématsakama, évitsi émakukéga tsengene nyetso. Evitsie émaba ngu na ndéône étengama kômbéne.

³⁴ Va ndéône étengama kômbéne, Jésus amabambéa n’ogi agô ngongo mbe: ?Eloi, Eloi lema sabachthani? Evéndégéô mbe Nzambé ami. Nzambé ami. ?Otsiki me nayee?

³⁵ Avo ahmadenganô vangô ahmookô Jésus aadôngana, ahmavovo mbe: ?Nôôkiô‐a? Abambéa môpandôédi amatasa maNzambé, ône ambeego eendô mbe Elie.

³⁶ Môvo va gatse aô amabongo sôma géndé ga ébuyo géviva meba. Amayavôga ékuya sangô gô meba manganye. Amapatéga sangô gô péndé. Amabôgôa sangô na va mônya aJésus mbe aviva sangô. Amavovo mbe: Nôvénga. Tôbéena gômahviga Elie gôémôpotoo va gésuma sowa.

³⁷ Ivô Jésus amaamugana na gô ngongo. Te n’angô wakaga.

³⁸ Ombo agô eba aNzambé ômaatéga bandôa gô ngongo ngu na gô tsina.

³⁹ Môsi Rome, môtômi amigode amatema tsimatsima na Jésus. Amookô gamaamugana Jésus na ameena gamawa angô tsina na tsina. Amavovo mbe: mômôgôô noo, ti na gô pie Muana ANzambé.

⁴⁰ Avo ageto ahmabaka vangô ahmabono ahndé gôdagôda. Va gatse aô gômabaka Salomé na Marie môsi Magdala, na Marie yeene aJoses na aJacque ône amabaka mônzambu.

⁴¹ Ahngô muetso ahmakea na Jésus géômbé gévo, bandôa vamabakangô gô Galilée gôémôyanzéa. Na gômabaka ageto ayekani ahngô dôta ahmakea n’edi na gô Jérusalem, ahmadenganô va tungune éagésumuge sowa.

Jésus amagunyu gô ngii (Bono na Matt. 27:57–61 )

⁴² Nyee ômabaka te ômeeda. Te pitsine ékônza Ajuif éômee éaô éasueti. Nyee ôdundaka Ajuif ômabaka madeo ôsigiia.

⁴³ Gômabaka gévovi sAjuif gémanyônganéôni, inedi Joseph. Amabaka môsi Arimathée. Ameenéa ôkumu aNzambé ôviga. Gô ngeba yedi amabaka na bôkédé gôékea na gôndé Pilate gôémôduka ôtô aJésus.

⁴⁴ Vamookô Pilate nane amatsapéô gôsidingé Jésus éwa. Amabambéa môtômi môvo amigode gôéôkô n’edi ôkô mbe Jésus awaki te mbeego.

⁴⁵ Vamookô angô na môgode mbe awéyi, amasingéa Joseph gôébongo nzumbine.

⁴⁶ Joseph amasômba môkanda avembo osunu ôvôni. Amapotoo nzumbine gô gésumu sowa. Ahmamôdipôa na môkanda avembo. Amamôgunya gô éduku éamôdungutu émasigô gô tsina amôkôdi. Amakandanganéda étaé évôni gôékukéga ngiine.

⁴⁷ Marie môsi Magdala na Marie yeene aJoses, ahmakea ahmanyôngéô éena gôgunyu nzumbine.